Sră Jop 2 - Sră Goh 2018

Jop kòl toh sa mồr

¹ Dô ngai ne, ală cau gơnrơh lòt tus tơlik mat di đap Yàng Jehôwa, Satan kung lòt tus bal mơ bol khai nàng tơlik mat di đap Yàng Jehôwa sơl.

² Yàng Jehôwa lùp Satan lah: “Mbơh mê tus taih?” Satan ho mơ Yàng Jehôwa lah: “Añ lòt yơng tòm plai ù, mơ lòt ma kiau làm bă tiah.”

³ Yàng Jehôwa lùp Satan lah: “Mbe mê sền gŏ Jop la cau duh broă Añ jê taih? Hơđang plai ù ò gơs dô nă cau lơi be khai, wil tơl mơ song ring, la cau duh rngòt di Yàng Tom Trồ, mơ pleh ngài di bơta iơh bơsak. Khai ơm kơ̆ tòm bơta song ring khai dê, bulah mê neh bơchồt Añ tòmdră mơ khai ò bồ.”

⁴ Satan ho Yàng Jehôwa lah: “Ai gơltau tơm gơltau; jơh ală phan mơna cau gơs nàng tơm ala bơta kis khai dê.

⁵ Mơya tŭ do, pò tĕ tê Yàng ƀư di poac să khai dê, gen khai rơp srat sơntơm di đap mat Yàng mo.”

⁶ Yàng Jehôwa đơs mơ Satan lah: “Niam ngan, khai ơm tòm gơnoar mê dê, mơya mìng prap gàr bơta kis khai dê.”

⁷ Behơ̆ Satan lik lòt bơh di đap Yàng Jehôwa, mơ lơh Jop in jê sồt toh sa mồr gơlik bơh kơndòl jơng tus di cồng bồ khai dê.

⁸ Jop ai dô nơm nsàng mơngàn nàng kwàc să mơ nggui tòm bùh.

⁹ Gen bau ùr khai đơs mơ khai lah: “Mê gam ơm kơ̆ tòm bơta wil tơl mê dê ơ? Srat sơntơm tĕ Yàng Jehôwa mơ chơt tĕ!”

¹⁰ Mơya khai ho wơl bau ùr khai lah: “Ai đơs kung be dô nă cau ùr bơrngơl gơla. Bol he dòp bơta niam bơh tê Yàng Tom Trồ, mơ ò bài dòp bơta iơh ơ?” Tòm jơh ală bơta hơ̆, Jop ò tìs glài bơh jơnau đơs khai dê.

Pe nă cau bơyô Jop dê

¹¹ Mơ tai, tòm tŭ pe nă cau bơyô Jop dê, kơno jơh ală bơta bòl glar rung rài neh dùh hơđang khai, kòp nă neh lik bơh hìu he dê hơ̆ la Eliphas cau Theman, Bildat cau Sua, mơ Sôpha cau Naama. Bol khai tìp bal nàng lòt tòmpà bơta moat jrùng mơ pơndòm pơniang khai.

¹² Tòm tŭ bol khai sền gŏ Jop bơh ngài, bol khai ò git đal khai; bol khai nggà ñìm dờng, crè ào mơ rsìh kơmbuh ù hơđang bồ bol khai dê.

¹³ Bol khai nggui tòm ù bal mơ Jop tòm poh ngai poh mang, ò gơs cau lơi đơs dô jơnau lơi mơ khai, bơh bol khai gŏ bơta jê sồt khai dê la kơnjơ̆ ngan.