Sră Jop 18 - Sră Goh 2018

Bildak đơs lah Yàng Tom Trồ lơh glài cau iơh bơsak

¹ Gen Bildak cau Sua ho lah:

² “Jơl tus di tŭ lơi sồng ồng ơm mơ ò pơt dă tòm jơnau đơs behơ̆ taih? Sền sơwì tĕ, lồc behơ̆ bol he rơp đơs tai.

³ Ñchi bơh tài bol hi gơkòl sền kung be phan poan jơng, Mơ gơkòl kòp kung be la cau bơrngơl gơla di đap ồng taih?

⁴ Ồng crè is să he tòm bơta gơhào gơjrañ, Tài bơh ồng mơ plai ù kong sang lòi ơ? Hala ală pơnai lŭ pal kong cèng pơrdô bơh di tiah gơ dê ơ?

⁵ Ồs đèng cau iơh bơsak dê kong tơnchơt, Lơmpiat ồs khai dê ò sòl pơnđàng tai.

⁶ Bơta àng tòm sàl khai dê rơp gơlik jơngo, Ồs đèng hơđang bol khai ò àng tai.

⁷ Bơta pràn kơldang ală cơnđòa khai dê gơlik liah wơl, Ală kai gơrmơ̆i bol khai dê tơlo gơpừ bol khai.

⁸ Bơh jơng bol khai yar tòm dô nơm bơtơng, Mơ cơnđòa lòt tòm trồm cau pơt dă.

⁹ Dô nơm dă kup di kơndòl jơng khai, Dô nơm bơtơng pùt bol khai.

¹⁰ Dô dang che pồn ndơp bol khai tòm ù, Dô nơm dă neh pơt bol khai tòm gùng lòt.

¹¹ Bơta rngòt rngơt tơn iu bol khai gùt dar, ting jat kòp cơnđòa khai dê.

¹² Bơta pràn bol khai dê siar roh bơh jơgloh tơhìr, Bơta rung rài ơm kơp tŭ bol khai gơpừ.

¹³ Bơta kòp jê lơh gơltau bol khai siar roh. Kòn tơnhoa bơta chơt di sa loan ală tơwòr tê bol khai dê.

¹⁴ Khai kong bơtrơh tơlik bơh di sàl khai dê, Mơ kong cèng tus hơ bơtau pal rngòt rngơt.

¹⁵ Tòm sàl bol khai ò gam phan lơi, ồs siau sa hìu ơm khai dê.

¹⁶ Hơđơm ryas bol khai ro rañ, hơđang ntê bol khai ñòp jrùh.

¹⁷ Bơta kirsơnre bol khai roh bơh di ù, Sơnđan khai ò gam tai tòm gùng ƀòn.

¹⁸ Bol khai kòl tơlo lik bơh bơta àng tus tòm bơta jơngo, Mơ kong bơtrơh tơlik bơh lơgar dunnia.

¹⁹ Bol khai ò gơs kòn sau hala jơi bơtiàn lơi digùl làng bol bol khai dê, Ò gơs cau lơi gam kis tòm tiah bol khai òs ơm.

²⁰ Ală cau đah mattơngai mut ai lơh mơp dơl bơh bơta neh lơh nền rài kis bol khai dê, Ală cau đah mattơngai lik ai lơh rngòt rngơt ngan.

²¹ Ngan, hơ̆ la hìu dô nă cau ò dòn duh dê, Hơ̆ la tiah ơm dô nă cau ò git Yàng Tom Trồ.”