Sră Jop 17 - Sră Goh 2018

Jop hòi dan bơta dong tă

¹ “Hwềng añ neh mòr lồi rau, ală ngai añ jê neh jơh. Mơ bơtô ƀồc neh rcang sir gơn añ.

² Ngan cau dơñŏ tơnhial gùt dar añ. Mơ mat añ gŏ sùm bơta bơrsèl tơnhial bol khai dê.

³ Dan ai dô nơm phan ai bồ añ in bal mơ să tòm Yàng. Rlau mơ Yàng ñcau rơp dong ala añ taih?

⁴ Yàng neh til dơngoh kơlôi bol khai dê ò git wă; Gen tàng Yàng ò ai bol khai in geh pha lin rlau.

⁵ Cau lơi tài bơh phan ƀàn mơ pơndang sang ală cau bơyô he dê, Gen mat kòn sau khai dê rơp roh rui.”

Jop đơs mơ ală cau bơyô

⁶ “Yàng lơh añ in gơlik gơs jơnau bơrsèl tơnhial tơl nă cau dê. Lòi bol khai choh dà diau di muh mat añ.

⁷ Mat añ kơrlu kơrli tài bơh moat jrùng, Tê jơng să bồ añ mìng be dô nơm mƀur.

⁸ Cau song ring ai lơh krơi bơh bơta hơ̆, Cau ò gơs glài rơp ntào tòmdră mơ cau ò dòn duh.

⁹ Bulah behơ̆, cau song ring rơp ntào kơ̆ tòm ală gùng dà khai dê, Mơ ală cau gơs tê sàng goh rơp sơlo ngai sơlo pràn rlau.

¹⁰ Ơ ală oh mi tus tĕ tòmbơyai tai, mơ añ ò jòi bàn cau lơi jak chài tòm oh mi.

¹¹ Ală ngai añ neh rlau, ală bơta rcang lài añ jê neh roh jơh, Ală bơta hàm kòñ nùs añ jê neh roh.

¹² Bol khai lơh mang la ngai; Bơta àng bol khai đơs lah rềp di bơta klam jơngo.

¹³ Dilah añ sền lơgar làng ƀồc be hìu añ jê, dilah añ lă cơnòng bic añ jê tòm tiah klam jơngo;

¹⁴ Dilah añ neh đơs mơ bơtô ƀồc lah: ‘Mê la bèp añ,’ Mơ đơs mơ tu rhài lah: ‘Bol mê la mè añ’ hala ‘ruh lŏ añ,’

¹⁵ Gen ntềng đah bơta gơn kơnòm añ jê taih? Ñcau rơp gŏ gam bơta gơn kơnòm lơi añ in taih?

¹⁶ Gơ rơp lòt bal mơ añ tus hơ mpồng lơgar làng ƀồc dê ơ? Bol he rơp dô bă bal mut tòm kơmbuh ù ơ?”