Sră Jop 16 - Sră Goh 2018

Jop đơs nền tai lah khai ò gơs glài

¹ Jop ho lah:

² “Añ neh kơno oă jơnau behơ̆; Jơh ală oh mi la cau pơndòm pơniang lơh jê sồt bòl glar lơm.

³ Tŭ lơi sồng jơh ală jơnau be càl do taih? Bơta lơi gơchồl oh mi tàng oh mi đơs sùm behơ̆ taih?

⁴ Añ kung rgơi đơs be oh mi sơl, dilah oh mi neh ơm tòm bơta gơlik gơs kung be añ; Añ kung rgơi đơs ală jơnau tòmdră mơ oh mi, Mơ rtơs bồ añ bơh oh mi.

⁵ Bơr añ kung chồl pơndòm nùs oh mi; Jơnau pơndòm pơniang sơndồi añ jê rơp lơh rài bơta jê sồt oh mi dê.

⁶ Dilah añ đơs, bơta jê sồt añ jê ò gơhuc; Mơ dilah añ ơm mŏ mŏ, kàr lơi gơ neh ngài bơh añ taih?

⁷ Ngan, tŭ do Yàng Tom Trồ neh lơh añ in siar lồi; Yàng neh phà tơnroh jơh mpồl añ jê.

⁸ Yàng neh kup cap añ, bơta hơ̆ la cơng tàng tòmdră mơ añ, Bơta rgai rgong añ jê gơbơtào lơh cơng tòmdră mơ añ.

⁹ Kơnràñ neh crè añ tòm bơta gơjrañ Kơnràñ dê, mơ gơjrañ di añ; Kơnràñ rkiat sề di añ, Cau sò tơm añ sền trol mat tòmdră di añ.

¹⁰ Bol khai nggàp ha bơr di añ, bol khai pah di tơrmồ añ dô bă lac lèo; bol khai dô nùs bal tòmdră mơ añ.

¹¹ Yàng Tom Trồ neh jào añ tòm tê cau ò dòn duh, Mơ sang lòi añ tòm tê cau iơh bơsak dê.

¹² Tòm tŭ añ ơm lơngai Kơnràñ neh dơrkă añ gơs bàr; Kơnràñ neh sơmbat kup di ngko añ mơ tơnlề añ gơs rpot rpet, Kơnràñ ơn añ lơh gơs tơnggu Kơnràñ in pañ.

¹³ Ală cau pañ kam Kơnràñ dê gơrwàng añ, Kơnràñ pañ bluh plai leh añ, mơ ò nđàc sơngit, Kơnràñ tuh tơlik plai bơtang añ tòm ù.

¹⁴ Kơnràñ lơh añ in jê sồt do tus jê sồt ndai; Brồ lơh añ kung be dô nă cau ling tòmlơh.

¹⁵ Añ neh jing ƀào bài sơnò kiat nàng jơm gơltau añ, Añ ơn bơta pràn añ jê tòm kơmbuh ù.

¹⁶ Muh mat añ pơrhê tài bơh ñìm, mơ klam jơngo cik ơm hơđang sơmbir mat añ.

¹⁷ Bulah ò gơs bơta jàñ bơsak tòm tê añ jê, Mơ jơnau hòi dan añ jê la sàng goh.

¹⁸ Ơ ù tiah, bañ bồr mhàm añ; lòi jơnau hòi rac añ jê ò gơs tiah rlô bòl!

¹⁹ Bulah tŭ do, Bơtau lơh cơng añ jê ơm hơđang trồ, mơ Bơtau dong tò añ jê ơm hơđang tiah jơnhoa.

²⁰ Cau bơyô añ jê dơñŏ tơnhial di añ, mat añ gơhòr dà tus hơ Yàng Tom Trồ.

²¹ Kơnràñ rơp pơnjat sùm dong tò kòn mơnus mơ Yàng Tom Trồ, Kung be dô nă cau rac dan ala cau gơp ƀòn khai dê.

²² Bơh tòm tŭ dô êt sơnam rơp tus, añ rơp lòt gùng mơ añ rơp ò rê wơl.”