Sră Jop 15 - Sră Goh 2018

Eliphas đơs lah Jop đơs roh lơm bơh bơta dòn duh

¹ Eliphas, cau Theman, ho lah:

² “Cau jak chài rơp ho wơl mơ bơta git wă càl dê, mơ tơmbềng să tòm khai dê mơ càl đah mattơngai lik ơ?

³ Khai rơp ai jơnau tò să ò kwơ, Hala tòm ală jơnau mơ bol khai rgơi lơh bơta ò niam sơl?

⁴ Mơya ồng sang lòi bơta duh rngòt di Yàng Tom Trồ, Mơ kơryan bơta dòn duh di đap Yàng Tom Trồ.

⁵ Bơh tồi glài ồng dê bơto bơr ồng dê, Mơ ồng sac rwah lơmpiat cau lac lèo dê.

⁶ Bơr tòm ồng dê lơh nền glài ồng, ò di añ; Sơndồi tòm ồng dê lơh cơng tòmdră mơ ồng.

⁷ Ồng la cau deh sơnròp jơi kòn mơnus dê sơl ơ? Ồng geh gơs lài mơ ală kơh mơnơm ơ?

⁸ Ồng neh kơno ală jơnau bơyai Yàng Tom Trồ dê ơ? Mơ ồng neh kơryan bơta jak chài ồng in lơm ơ?

⁹ Ñchi bơta ồng git mơ bol hi ò git taih? Ñchi bơta ồng wă wơng mơ ò loh làng bol hi in taih?

¹⁰ Cau sŏ kò mơ jòng sơnam ơm đah bol hi, Bol khai kra rlau mơ bèp ồng dê.

¹¹ Jơnau pơndòm pơniang Yàng Tom Trồ dê mơ jơnau lơbơn niam đơs mơ ồng gam dềt ir ồng in ơ?

¹² Ñchi bơh tài nùs ồng lơh ồng in ò suk ơm, mơ ñchi bơh tài mat ồng gơlik bơta àng lơr taih?

¹³ Gen tàng ồng tơrwơl hwềng ồng dê tòmdră mơ Yàng Tom Trồ, Mơ lòi ală jơnau behơ̆ lik bơh di bơr ồng dê taih?

¹⁴ Jơi kòn mơnus la ñchi mơ rgơi gơlik sàng goh taih? Hala ală cau deh bơh cau ùr rgơi geh kòp la song ring ơ?

¹⁵ Yàng Tom Trồ ò dòn kơnòm di ală cau sàng goh Kơnràñ dê, Mơ ală tap trồ kung ò sàng goh di đap Kơnràñ;

¹⁶ Tơ ài lah dô nă cau la ngkòr ngkàc mơ jak sa loă, La cau hùc bơta tồi glài iơh bơsak be hùc dà!

¹⁷ Iat tĕ añ gen añ rơp sơnio ồng in; ală bơta añ neh gŏ, gen añ rơp yal loh,

¹⁸ la ală bơta cau jak chài neh yal, Ò pồn ndơp bơta lơi ồng pàng bol khai dê neh yal.

¹⁹ Mìng ală cau hơ̆ neh geh pà lơgar, mơ ò gơs cau crih mat lòt gan digùl bol khai.

²⁰ Cau iơh bơsak kong jê sồt moat jrùng jơh rài kis bol khai dê, Jơh ală nam kong tòm bơta iơh bơsak.

²¹ Jơnau driau rngòt bềng trồm tồr bol khai; Tòm bơta pas gơs lơngai lơngò, cau tơnroh rơp brồ tus hơđang bol khai.

²² Bol khai roh bơta gơn kơnòm rê wơl bơh bơta klam jơngo, mơ bol khai rcang lòi đào in.

²³ Bol khai lòt gơlềng gơlàng bơh piang lă mơ đơs lah: ‘Ntềng đah gơ taih?’ Bol khai git la dô ngai klam jơngo neh tus rềp.

²⁴ Bơta bòl glar mơ moat jrùng jê sồt tơrngòt bol khai; Tòmdră mơ bol khai kung be dô bơtau rcang lik lòt nàng tòmlơh.

²⁵ Tài bơh khai neh pò tê tòmdră mơ Yàng Tom Trồ, Mơ tòmpơrlòng mơ Bơtau Gơnap Gơnoar Làm Jơh.

²⁶ Khai kơldang nùs tòmdră mơ Yàng, mơ dô nơm khèl lơut ngan.

²⁷ Tài bơh muh mat khai neh jơm mơ dơngi, Mơ tơrgòm dơngi hơđang but khai dê.

²⁸ Bol khai rơp ơm tòm ală ƀòn dờng srau gòi, tòm ală hìu ò gơs cau ơm, Ală hìu neh rcang lòi gơlik gơs gơnru tơrlah tơrlơm.

²⁹ Khai rơp ò gơlik gơs pas sơm, ală phan mơna khai dê ò gam jŏ tai, Mơ phan jơtài bol khai dê kung ò sro ryas tòm ù.

³⁰ Khai rơp ò geh pleh klàs bơh klam jơngo; lơmpiat ồs rơp sa roh ală sơmbut bol khai dê, Mơ nhơm tă bơh di bơr Yàng Tom Trồ rơp cèng pơrdô khai roh thit.

³¹ Lòi bol khai ò kơnòm di bơta roh lơm, pơrlồm să he, Bơh bơta roh lơm rơp la phan ƀàn bol khai dê.

³² Gơ rơp geh tơm wơl wil tơl lài mơ tŭ di tŭ tơngai gơ dê, Mơ ală ntê bol khai dê rơp ò gơlik tơlir.

³³ Bol khai rơp jrùh be plai ño òhềt dum, be tòm ño, Kung be dô nơm chi ôlibe rung jơh ală bơkào gơ dê.

³⁴ Bơh mpồl cau ò duh rngòt rơp kơnền, Mơ ồs rơp sa pơrguc sàl cau sa kwì.

³⁵ Bol khai bun bơta tồi glài mơ tơnggơs bơta iơh bơsak, Nùs bol khai dê rcang bơta blac pơrlồm.”