Sră Jop 13 - Sră Goh 2018

Jop mìng kòñ yal tơlik mơ Yàng Tom Trồ lơm

¹ “Do, mat añ neh gŏ ală bơta hơ̆, tồr añ neh kơno mơ wă wơng.

² Bơta lơi oh mi git añ kung git sơl; Añ ò gơhuc rlau mơ oh mi.

³ Mơya añ kòñ đơs mơ Bơtau Gơnap Gơnoar Làm Jơh, Mơ añ kòñ tòmbơyai bơh broă añ jê mơ Yàng Tom Trồ.

⁴ Ai ală oh mi, la cau pih cùr mơ jơnau ma blac; Jơh ală oh mi la cau lơh sơnơm ò kwơ.

⁵ Dilah oh mi mìng ơm mŏ mŏ, hơ̆ la bơta jak chài oh mi dê!

⁶ Tŭ do iat tĕ jơnau gơrềng tus añ jê, Ơm iat tĕ jơnau tò să sơndồi añ jê.

⁷ Oh mi rơp đơs jơnau ma blac Yàng Tom Trồ in ơ? Oh mi rơp đơs ală jơnau blac pơrlồm ala Kơnràñ ơ?

⁸ Oh mi rơp cah is gơwèt mơ Kơnràñ ơ? Oh mi tò să bơh ală broă ala Yàng Tom Trồ ơ?

⁹ Tòm tŭ Kơnràñ sền sơwì oh mi gen gơlik niam oh mi in sơl? Hala oh mi rgơi pơrlồm Kơnràñ kung be kòn mơnus pơrlồm bal mơ gơp sơl?

¹⁰ Ngan la Kơnràñ rơp lah pơrhơng oh mi, dilah tòm bơta ndơp ndơr oh mi yal tơlik ò song ring.

¹¹ Ò di bơta ryŭ ryơm Kơnràñ dê tơrngòt oh mi ơ? Bơta rngòt rngơt bơh Kơnràñ rơp ò dùh hơđang bol mê ơ?

¹² Jơnau đơs pla oh mi dê la jơnau đơs pơnđik bùh dê; Ală jơnau tò să oh mi dê la ală jơnau tò să be ù kơnàng dê.

¹³ Ơm tĕ mŏ mŏ, mơ añ rơp đơs, Gen lòi tĕ bơta lơi rgơi tus di añ.

¹⁴ Añ rơp kap poac añ mơ sề añ, Mơ phi bơta kis añ tòm tê añ.

¹⁵ Do, Yàng rơp tơnchơt añ, añ ò gơs bơta gơn kơnòm. Mơya añ rơp dong tò gùng dà añ jê di đap mat Kơnràñ.

¹⁶ Bơta hơ̆ rơp gơlik gơs bơta dong klàs añ jê; Dô nă cau ò duh rngòt ò khin tus di đap Yàng.

¹⁷ Iat tĕ nền nền ală jơnau đơs añ jê, Ơn tĕ bơta yal loh añ jê tòm tồr oh mi dê.

¹⁸ Tŭ do añ neh rcang sir nàng tò să añ, Añ git lah añ rơp geh kòp la song ring.

¹⁹ Gơs cau lơi rgơi tòmdră mơ añ sơl? Dilah gơs, añ rơp ơm mŏ mŏ mơ chơt.

Jop hòi dan tòm bơta gơplơ̆ nùs

²⁰ Dan Yàng ai añ in mìng bàr bơta, Gen añ rơp ò pồn să añ jê di đap mat Yàng:

²¹ Dan Yàng tă tê Yàng ngài bơh di añ, Mơ bañ tơn iu añ bơh ală bơta kìr rngòt Yàng dê.

²² Gen Yàng hòi añ, añ rơp ho wơl, Hala dan lòi añ đơs mơ Yàng rơp ho wơl.

²³ Nđò bơta tồi glài iơh bơsak mơ ală tồi glài añ jê? Dan Yàng lơh añ in git bơta tìs bal mơ bơta tồi glài añ jê.

²⁴ Ñchi bơh tài Yàng pồn mat Yàng, Mơ kòp añ be cau sò tơm Yàng dê taih?

²⁵ Yàng kòñ tơrngòt dô nơm nha càl khồm pơrdô sơl ơ? Yàng rơp ting jat ngkòng rhe ro sơl ơ?

²⁶ Bơh Yàng neh cih ală bơta sràt bơtang tòmdră mơ añ Mơ lơh añ in toès ală bơta tồi glài añ neh tìs tŭ gam kơnòm să.

²⁷ Yàng đò jơng añ tòm gơsàng, Yàng kơp sền jơh ală gùng dà añ jê, Yàng ơn nhàr di kơndòl jơng añ jê.

²⁸ Cau siar roh be dô nơm phan ồm lề, Kung be dô nơm ào gơkòl tu sa.”