Sră Age 1 - Sră Goh 2018

Jơnau hòi jà bơt hìu duh khoai Yàng Jehôwa

¹ Nam dơ̆ bàr rài at bồ bơtau Darius dê, ngai dùl kơnhai dơ̆ prau, gơs jơnau Yàng Jehôwa dê sồr cau gơnoar hwơr Age đơs mơ Jerubabel, kòn klau Sealthiel, cau kwang dờng at bồ lơgar Juda, mơ đơs mơ Jôsua, kòn klau Jehôjadak, la cau gơnoar dờng lam bồ ơn phan duh khoai lah:

² Yàng Jehôwa Gơnap Gơnoar Dờng Làm Jơh đơs be do: “Làng bol do đơs lah: ‘Tŭ tơngai òhềt tus, nàng bơt bơtào wơl hìu Yàng Jehôwa dê.’”

³ Gen gơs jơnau Yàng Jehôwa đơs bơh cau gơnoar hwơr Age lah:

⁴ “Tŭ do la tŭ să tòm bol mê in ơm tòm ală hìu gơs rkàng mơ mpồng pơng mơ mpàn, mơ tòm tŭ hìu do sang lòi tơrlah tơrling behơ̆ sơl ơ?

⁵ Gen tàng tŭ do, Yàng Jehôwa Gơnap Gơnoar Dờng Làm Jơh đơs be do: ‘Ơn tĕ nùs kơlôi sơwì bơh ală gùng dà bol mê dê.

⁶ Bol mê neh sih oă, mơya neh toès wơl dô êt; bol mê sa, mơya ò gơs tŭ lơi tơl; bol mê hùc, mơya ò gơs tŭ lơi bềng; bol mê soh ồi ào, mơya ò gơs tŭ lơi ram; bol mê dòp leng jền tơngai mìng prap ơn gơtòm dô nơm kơldung bluh.’

⁷ Yàng Jehôwa Gơnap Gơnoar Dờng Làm Jơh đơs be do: ‘Ơn tĕ nùs kơlôi sơwì ală gùng dà bol mê dê.

⁸ Guh tĕ hơđang ală mơnơm mơ cèng brê mpàn nàng bơt bơtào hìu do, tồ lơh Añ in niam nùs bơh bơta hơ̆ mơ geh jòng ro,’ Yàng Jehôwa đơs behơ̆.

⁹ ‘Bol mê kơp kòñ oă, mơya sền do, bol mê mìng geh dô êt. Ñchi bơta bol mê cèng tơmut tòm hìu gen Añ khồm roh thit. Ñchi bơh tài behơ̆ taih?’ Yàng Jehôwa Gơnap Gơnoar Dờng Làm Jơh đơs lah: ‘Hơ̆ la tài bơh hìu Añ gam sang lòi tơrlah tơrling, tòm tŭ kòp nă bol mê giga bơt hìu is he dê.

¹⁰ Gen tàng, tài bơh bol mê, trồ neh krơ̆ wơl dà tŭ, mơ ù prap lòi wơl plai đo gơ dê.

¹¹ Añ neh sồr tus dô bơta ro rañ hơđang ală ƀlàng sre mơ hơđang ală mơnơm, hơđang kòi mbo, hơđang tơrnòm pa, hơđang mơñà mơ hơđang ală phan ù tiah tơnggơs, hơđang jơi kòn mơnus mơ hơđang jơi phan poan jơng, mơ hơđang ală broă bòl glar bol mê neh lơh.’”

¹² Behơ̆ Jerubabel, kòn klau Sealthiel, mơ Jôsua, kòn klau Jehôjadak, cau gơnoar dờng lam bồ ơn phan duh khoai, mơ làng bol gam wơl dòn bơr Jehôwa Yàng Tom Trồ bol khai dê, mơ jơnau bơto yal cau gơnoar hwơr Age dê, tài bơh Jehôwa Yàng Tom Trồ bol khai dê neh sồr khai tus, mơ làng bol rngòt di Yàng Jehôwa.

¹³ Gen Age, cau kong sồr Yàng Jehôwa dê, bơto yal làng bol in jơnau sồr Yàng Jehôwa dê, lah: “Añ ơm bal mơ bol mê,” Yàng Jehôwa đơs behơ̆.

¹⁴ Behơ̆ Yàng Jehôwa chồl hwềng nùs Jerubabel, kòn klau Sealthiel, kwang dờng at bồ lơgar Juda, mơ chồl hwềng nùs Jôsua, kòn klau Jehôjadak, cau gơnoar dờng lam bồ ơn phan duh khoai, mơ chồl hwềng nùs jơh làng bol gam wơl. Bol khai lòt tus, lơh broă bơt hìu Jehôwa Gơnap Gơnoar Dờng Làm Jơh la Yàng Tom Trồ bol khai dê,

¹⁵ tòm ngai bàr jơt poan kơnhai dơ̆ prau nam dơ̆ bàr rài at bồ bơtau Darius dê.