Sôphôni 1 - Sră Goh 2018

¹ Do la jơnau Yàng Jehôwa đơs mơ Sôphôni, kòn klau Kusi, sau Gedalia, se Amaria, set Ejekia dê, tòm rài at bồ Jôsia, kòn klau Ammôn bơtau Juda dê:

Jơnau gơnoar hwơr bơh bơta tơnroh rơp tus hơđang Juda

² Yàng Jehôwa đơs: “Añ rơp pơs jơh ală bơta bơh di plai ù,”

³ “Añ rơp pơs jơh kòn mơnus bal mơ ală phan poan jơng, añ rơp pơs jơh sềm hơđang trồ bal mơ ală ka tòm dàlềng. Añ rơp lơh cau iơh bơsak in gơtup pừ. Añ rơp tơnroh jơi kòn mơnus bơh di plai ù.” Yàng Jehôwa đơs behơ̆.

⁴ Añ rơp pò tê Añ jê tòmdră mơ Juda mơ jơh ală cau ơm tòm Jerusalem. Añ rơp tơnroh jơh ală bơta gam wơl Baal dê, mơ jùt sơnđan jơh ală cau gơnoar ơn phan duh khoai duh khoai rùp ràk;

⁵ Mơ ală cau kun bồ hơđang rkàng hìu mơ duh khoai ală mpồl ling hơđang trồ, ală cau kun bồ ai sơnđan Yàng Jehôwa mơ srat să mơ kung ai sơnđan Milkom mơ srat să;

⁶ Mơ ală cau wèt ngkòi ò lòt jat Yàng Jehôwa, la ală cau ò jòi jat Yàng Jehôwa hala hòi lùp Kơnràñ.

⁷ Ơm tĕ mŏ mŏ di đap Jehôwa Yàng Tom Trồ, bơh ngai Yàng Jehôwa dê neh tus rềp. Yàng Jehôwa neh rcang sir dô nơm phan ơn duh khoai; Kơnràñ neh ơn is ală cau neh geh jà.

⁸ Tòm ngai ơn phan duh khoai Yàng Jehôwa dê, Añ rơp lơh glài ală kwang at bồ mơ ală kòn klau cau bơtau dê, mơ jơh ală cau soh ồi ào lơgar ndai.

⁹ Tòm ngai hơ̆, Añ rơp lơh glài jơh ală cau sơnđoh di ƀlong mpồng, ală cau tơmbềng hìu cau tòm bol khai dê mơ bơta rhung rhang mơ bơta sa kơrlơm.

¹⁰ Yàng Jehôwa đơs lah: “Tòm ngai hơ̆ rơp gơs jơnau driau dờng di Mpồng Ka, pơt wòl bơh di Ƀòn Dờng Dơ̆ Bàr, mơ dô ntas dờng tơrlah tơrlơm bơh ală dòr.

¹¹ Ơ ală cau ơm tòm ƀòn Mortar dê, pơt wòl tĕ; Bơh ală cau kă bro rơp gơkòl tơnroh jơh, ală cau kơr priă neh kòl tơnroh.

¹² Tòm tŭ hơ̆ Añ rơp ngui ală ồs đèng nàng jòi tòm Jerusalem, mơ lơh glài ală làng bol la cau jòng să pơnhừ să hơđang iah tơrnòm mơ ală cau kơlôi òm tòm nùs lah: ‘Yàng Jehôwa rơp ò lơh bơta lơi niam hala bơta lơi iơh.’

¹³ Phan mơna bol khai dê rơp kòl tòmpìt, ală hìu tum bol khai dê lòi srau gòi. Bol khai rơp bơt ală hìu mơya ò geh ơm tòm hơ̆; bol khai rơp tam ală suơn ño mơya ò geh ñô tơrnòm.”

Ngai dờng Yàng Jehôwa dê

¹⁴ “Ngai dờng Yàng Jehôwa dê neh tus rềp, neh tus rềp mơ tus mhar. Ntas sap ñìm sràt bơtang tòm ngai Yàng Jehôwa dê, ală cau ling tòmlơh driau dờng tềng hơ̆.

¹⁵ Ngai hơ̆ rơp la ngai gơjrañ dờng, dô ngai rung rài mơ moat jrùng, dô ngai bòl glar mơ tơnroh, dô ngai klam jơngo mơ ò àng, dô ngai gơs mhwal jù mơ klam cik,

¹⁶ dô ngai ntas uh kơlwòk mơ jơnau driau dờng tòmlơh tòmdră mơ ală ƀòn dờng kơ̆ cê mơ ală theng jơnhoa di mum ƀòn dờng.

¹⁷ Añ rơp cèng bơta rung rài hơđang kòn mơnus, bol khai rơp lòt kung be cau jơngo mat, tài bơh bol khai neh tìs glài tòmdră mơ Yàng Jehôwa. Mhàm bol khai rơp tuh tơlik kung be thul, mơ poac bol khai kung be è.

¹⁸ Bulah priă hala màh bol khai dê kung ò rgơi dong klàs bol khai tòm ngai gơjrañ dờng Yàng Jehôwa dê. Jơh plai ù rơp kong chu pơrguc tòm ồs pơrñat; bơta gơjrañ dờng Yàng Jehôwa dê; bơh Kơnràñ rơp pơndut jơh dô bă rngòt rngơt jơh làng bol kis hơđang plai ù.”