Sơnròp Gơlik Gơs 7 - Sră Goh 2018

Dà kŏ

¹ Yàng Jehôwa đơs mơ Nôe lah: “Mê mơ jơh hìu nhă mê mut tĕ tòm ơhò, bơh tòm rài do Añ gŏ mê la song ring di đap Añ.

² Tòm ală phan poan jơng goh cèng bal kòp jơi poh yô, dam mơ me, mơ tòm jơi phan poan jơng ò goh kòp jơi dô yô, dam mơ me.

³ Kung cèng bal ală sềm hơđang trồ kòp jơi poh yô, dam mơ me, nàng lòi sơntìl làm hơđang ù.

⁴ Mơ gam poh ngai tai, Añ rơp ai dùh mìu tòm ù tòm poan jơt ngai mơ poan jơt mang, Añ rơp tơnroh bơh di ù jơh ală phan kis Añ neh crơng gơs.”

⁵ Gen Nôe lơh jat kòp bơta Yàng Jehôwa neh sồr khai.

⁶ Tòm tŭ gơs dà kŏ hơđang ù, Nôe neh tơl prau rhiang nam.

⁷ Bơh dà kŏ gen Nôe mơ bau khai, ală kòn klau mơ ală ƀan khai mut bal tòm ơhò.

⁸ Ală phan poan jơng goh mơ ală phan poan jơng ò goh, ală sềm, ală phan wìn nsròng hơđang ù,

⁹ kòp yô, dam mơ me, lòt tus mơ Nôe mơ mut tòm ơhò be jơnau Yàng Tom Trồ neh sồr khai.

¹⁰ Tơnơ̆ mơ poh ngai gơlik dà kŏ hơđang ù.

¹¹ Tòm nam prau rhiang rài Nôe dê, kơnhai bàr tòm ngai jơt poh kơnhai hơ̆ tòm toh dê ngai hơ̆ tơrlah ală tồ dà cat cìr mơnồng dờng mơ ală tơrnil dà hơđang trồ pò tơlik.

¹² Mơ dùh mìu hơđang ù poan jơt ngai mơ poan jơt mang.

¹³ Tòm dô ngai hơ̆, Nôe, Sem, Cam mơ Japhet la ală kòn klau khai dê, mơ bau Nôe dê mơ pe nă bau ală kòn klau khai dê mut bal tòm ơhò.

¹⁴ Bol khai mơ ală phan poan jơng tòm brê pơnjat be jơi gơ, phan poan jơng tòm hìu pơnjat be jơi gơ, sềm mơ jơh ală phan lơi gơs đar jat be jơi gơ,

¹⁵ kòp yô jơh ală jơi poac să gơs nhơm kis jat Nôe mut tòm ơhò,

¹⁶ dam mơ me jơh ală poac să dê mut tòm ơhò, be jơnau Yàng Tom Trồ neh sồr gen Yàng Jehôwa til mpồng ơhò.

¹⁷ Dà kŏ guh làm hơđang ù tòm poan jơt ngai, dà guh mơ gơđồng ơhò bơh dê ù.

¹⁸ Mơ dà la dờng mơ ngơr bơtơl oă tai hơđang ù, ơhò gơđồng hơđang nha dà.

¹⁹ Dà ngơr bơtơl oă hơđang ù mơ ală mơnơm jòng tòm tiah hơđơm trồ ndơp jơh.

²⁰ Dà guh jơt pram tal rlau, mơ ală mơnơm jòng neh ndơp jơh.

²¹ Mơ jơh ală poac să kis hơđang ù gen chơt jơh, sềm, phan poan jơng tòm hìu, jơh phan wìn nsròng mơ jơh kòn mơnus.

²² Jơh ală phan gơs nhơm kis tòm trồm muh mơ jơh ală phan ơm tòm ù rañ rsơh gen chơt jơh.

²³ Kơnràñ tơnroh jơh ală phan kis ơm hơđang ù, bơh kòn mơnus tus dê phan poan jơng tòm hìu, phan wìn nsròng, mơ sềm hơđang trồ bol gơ chơt roh bơh dê ù, gam mìng Nôe mơ ală jơi ơm bal mơ khai tòm ơhò.

²⁴ Mơ dà ngơr hơđang ù tơl dô rhiang pram jơt ngai.