Sơnròp Gơlik Gơs 23 - Sră Goh 2018

Sara chơt mơ geh tơp tòm ƀlàng Makpela

¹ Sara kis dô rhiang bàr jơt poh nam. Kàr hơ̆ la rài kis Sara dê.

² Sara chơt tòm Kiriat Arba, hơ̆ la Hebrôn, tòm lơgar Kanaan. Abraham tus moat ƀồc mơ ñìm rac Sara in.

³ Mơ Abraham ntào di gah cau chơt khai dê mơ đơs mơ ală kòn sau Het lah:

⁴ “Añ la cau bơdìh ơm ing tòm ù bol mê, dan ai añ in dô bă tiah tơp ƀồc tòm lơgar bol mê nàng añ tơp cau chơt añ jê.”

⁵ Ală kòn sau Het ho lah:

⁶ “Ơ ồng, dan iat bol hi, digùl bol hi ồng la dô nă kòn bơtau màng ryŭ, tơp cau chơt ồng dê tòm tiah bơtô lơi niam rlau bol hi dê. Tòm mpồl bol hi ò gơs cau lơi pơlai tiah bơtô khai dê nàng tơp cau chơt ồng dê.”

⁷ Gen Abraham ntào, tơmbic să di đap làng bol lơgar dê, hơ̆ la ală kòn sau Het,

⁸ mơ đơs lah: “Dilah bol mê gơs nùs ai añ in tơp cau chơt añ jê, gen iat jơnau añ jê mơ dan añ in mơ Eprôn, kòn Sôhar dê,

⁹ nàng khai lòi wơl añ in trồm lŭ Makpela, di gah sre khai dê, lòi añ in tòm toh khà jền nàng añ in gơs digùl bol mê dô bă tiah tơp ƀồc.”

¹⁰ Tŭ hơ̆, Eprôn, cau Hetit, ơm nggui digùl kòn sau Het, ho mơ Abraham di đap kòn sau Het dê mơ di đap ală cau neh mut bal tòm mpồng ƀòn lah:

¹¹ “Ò, ơ ồng, dan iat jơnau añ: Do, di đap làng bol añ, añ ai ồng in sre mơ kung ai trồm lŭ tòm hơ̆ sơl, tơp tĕ cau chơt ồng dê.”

¹² Abraham tơmbic să di đap làng bol lơgar dê,

¹³ mơ đơs mơ Eprôn di đap làng bol lơgar dê lah: “Dan iat, añ ai khà jền sre, dòp tĕ, gen añ rơp tơp cau chơt añ jê.”

¹⁴ Eprôn đơs mơ Abraham lah:

¹⁵ “Ơ ồng, iat jơnau añ, dô pet ù gơs khà la poan rhiang sieklơ priă, khà hơ̆ ồng mơ añ ò gơs nđò sơl? Tơp tĕ cau chơt ồng dê.”

¹⁶ Abraham iat jơnau Eprôn dê mơ di đap kòn sau Het khai kơr poan rhiang sieklơ priă jào khai in, la jền priă òs ală cau kă bro ngui.

¹⁷ Behơ̆, ƀlàng sre Eprôn tòm Makpela, tòm toh mơ Mamre: hơ̆ la sre, trồm lŭ, jơh ală chi tòm ƀlàng sre, mơ rò gah sre,

¹⁸ gơlik gơs kơ̆ nền phan tòm Abraham dê di đap kòn sau Het mơ jơh ală cau neh tus bal tòm mpồng ƀòn.

¹⁹ Tơnơ̆ mơ hơ̆, Abraham tơp Sara, bau ùr khai, tòm trồm lŭ Makpela, tòm toh mơ Mamre, tòm Hebrôn, lơgar Kanaan dê.

²⁰ Ală kòn sau Het lơh nền jào sre mơ trồm lŭ gơs phan tòm Abraham dê, nàng khai in ngui lơh gơs tiah tơp ƀồc.