Sơnròp Gơlik Gơs 21 - Sră Goh 2018

Bơta deh Isak

¹ Yàng Jehôwa lòt còp Sara jat be jơnau Kơnràñ neh đơs, mơ lơh khai in jat be jơnau Kơnràñ neh ho.

² Sara bun, deh dô nă kòn klau Abraham in tòm tŭ khai neh kra, tòm toh di tŭ Yàng Tom Trồ neh pơgon mơ khai.

³ Abraham tơmoh sơnđan kòn klau Sara neh deh khai in la Isak.

⁴ Mơ Abraham siat gơltau Isak kòn klau khai in tòm tŭ khai neh phàm ngai jat be jơnau Yàng Tom Trồ neh sồr.

⁵ Tòm tŭ deh Isak, gen Abraham neh dô rhiang nam.

⁶ Sara đơs lah: “Yàng Tom Trồ lơh añ in gơràn ñŏ, jơh ală cau kơno rơp ñŏ bal mơ añ.”

⁷ Mơ đơs tai lah: “Ñcau neh khin đơs mơ Abraham lah: Sara rơp ai kòn in pô ơ? Bơh añ neh deh dô nă kòn klau khai in tòm tŭ khai neh kra rau.”

Bơta bơtrơh Agar mơ Ismael

⁸ Kòn dềt neh dờng gen lòi pô. Tòm ngai Isak lòi pô, Abraham yò dô bơta ñô sa dờng.

⁹ Sara gŏ kòn Agar, cau dĭ Ejiptơ, neh deh Abraham in, dơñŏ tơnhial.

¹⁰ Gen khai đơs mơ Abraham lah: “Bơtrơh tĕ dĭ ùr mơ kòn khai dê. Bơh kòn klau dĭ ùr do ò geh gơnoar pơrdòn bal mơ kòn klau añ la Isak.”

¹¹ Jơnau do lơh nùs Abraham in moat ngan tài bơh kòn klau khai dê.

¹² Mơya Yàng Tom Trồ đơs mơ Abraham lah: “Mê bañ moat jrùng bơh kòn klau mơ dĭ ùr mê dê. Sara đơs be lơi, gen iat tĕ jơnau khai đơs, bơh tòm Isak rơp gơlik gơs jơi bơtiàn mê dê.

¹³ Añ kung rơp lơh kòn klau dĭ ùr mê in gơlik gơs dô nơm làng bol, bơh khai kung bơh mê mơ lik.”

¹⁴ Abraham guh bơh drim, ai piang lă mơ dà tòm nhồng gơltau, ai Agar in mơ ơn dê pơnì khai, mơ jào kòn klau khai in, gen jun khai lòt. Khai lik lòt lềng làng tòm ƀlàng bràs Beerseba.

¹⁵ Tòm tŭ dà tòm nhồng gơltau neh jơh, khai ơn oh dềt hơđơm mƀur chi dềt ne,

¹⁶ mơ khai lòt ngài ngài, mơ nggui pơgap dê dô bồng pañ mơ srào mơ đơs lah: “Mbe añ rgơi ơm sền kòn dềt chơt!” Khai nggui tòm toh tềng hơ̆ mơ ñìm rac.

¹⁷ Yàng Tom Trồ kơno oh hơ̆ ñìm gen cau gơnrơh Yàng Tom Trồ dê bơh đang trồ hòi Agar mơ đơs lah: “Ơ Agar, ñchi gơlơh ai be gen taih? Bañ rngòt! Bơh Yàng Tom Trồ neh kơno jơnau kòn dềt bơh di tiah khai ơm.

¹⁸ Ntào tĕ, yò kòn mơ ai tê kơnđu kơ̆ khai, bơh Añ rơp lơh khai in gơs dô nơm làng bol dờng.”

¹⁹ Mơ Yàng Tom Trồ pò mat khai, khai gŏ dô nơm tơrlung dà, gen khai lòt bơ̆ bềng nhồng gơltau mơ ai kòn dềt in hùc.

²⁰ Yàng Tom Trồ ơm bal mơ cau kơnòm hơ̆, khai rhòi dờng, ơm tòm ƀlàng ngềt ngơt, mơ gơlik gơs cau jak pañ.

²¹ Khai ơm tòm ƀlàng bràs Paran, mè khai lap bau khai in dô nă cau ơruh Ejiptơ.

Abraham ho bal mơ Abimelek tòm Beerseba

²² Tòm tŭ hơ̆ bơtau Abimelek mơ Pikôl, cau gơnoar dờng at bồ ling khai dê, đơs mơ Abraham lah: “Yàng Tom Trồ ơm bal mơ mê tòm kòp broă mê lơh.

²³ Behơ̆ tŭ do, ai tĕ sơnđan Yàng Tom Trồ mơ ho bal lah mê rơp ò gàt añ, kòn añ mơ sau añ. Mơya mê rơp lơh niam mơ añ bal mơ lơgar mê ơm ing be añ neh lơh mê in.”

²⁴ Abraham đơs lah: “Añ ho nền.”

²⁵ Abraham yoam mơ bơtau Abimelek bơh dô nơm tơrlung dà mơ cau dĭ khai neh tòmpìt gơ.

²⁶ Gen bơtau Abimelek đơs lah: “Añ ò git cau lơh bơta hơ̆, mơ mê kung òhềt yal añ in git sơl, ngai do sồng añ git.”

²⁷ Mơ Abraham kup belàt mơ kơnrồ ai bơtau Abimelek in, gen bàr nă bol khai lơh bơta ho bal.

²⁸ Abraham ai bơh tòm mpồl poh nơm belàt dra mơ ơn is,

²⁹ gen bơtau Abimelek lùp lah: “Ñchi mê lơh ơn is poh nơm belàt dra behơ̆ taih?”

³⁰ Khai ho lah: “Dan bơtau dòp poh nơm belàt dra do bơh tê añ, nàng lơh cơng tàng lah añ neh tò tơrlung do.”

³¹ Tài bơh hơ̆ cau sơnđan tiah hơ̆ la Beerseba, bơh tềng hơ̆ bàr nă bol khai neh tòmho bal.

³² Behơ̆ bàr nă bol khai tòmho bal tòm tiah Beerseba. Gen bơtau Abimelek mơ cau gơnoar dờng at bồ ling Pikôl ñă rê wơl hơ lơgar Philistin.

³³ Abraham tam dô đòm ơmil tòm tiah Beerseba, mơ tềng hơ̆ khai hòi dan di sơnđan Yàng Jehôwa la Yàng Tom Trồ gam sùm sùm.

³⁴ Abraham ơm ing jŏ ngai tòm lơgar Philistin.