Sacari 5 - Sră Goh 2018

Bơta gơtơnggŏ dơ̆ prau: Sră pồt gơ par

¹ Gen añ sền tơnggòr tai, ne di đap añ gơs dô pang sră pồt gơ par!

² Mơ khai lùp añ lah: “Ñchi mê gŏ taih?” Añ ho wơl lah: “Añ gŏ dô pang sră pồt gơ par, jòng bàr jơt tal, ơnàng jơt tal.”

³ Khai đơs mơ añ lah: “Hơ̆ la bơta srat sơntơm hơđang làm lơgar: kòp nă cau ntung kơñau rơp kong tơnroh jat be jơnau cih hơđang đah do sră; mơ kòp nă cau srat să rơp kong tơnroh jat be jơnau cih đah ne sră.”

⁴ Yàng Jehôwa Gơnap Gơnoar Dờng Làm Jơh đơs lah: “Añ rơp sồr sră lòt mơ gơ rơp mut tòm hìu cau ntung kơñau, mơ tòm hìu cau ai sơnđan Añ mơ srat să blac. Gơ rơp ơm tòm hìu hơ̆ mơ tơnroh hìu hơ̆, jơh ală chi mơ lŭ gơ dê.”

Bơta gơtơnggŏ dơ̆ poh: Cau ùr tòm dô nơm bài

⁵ Gen cau gơnrơh neh đơs mơ añ lòt tus hơ añ mơ đơs lah: “Pò mat tơnggòr tĕ hơđang mơ sền phan lòt tus la ñchi.”

⁶ Añ lùp lah: “Ñchi hơ̆ taih?” Khai ho lah: “Hơ̆ la dô nơm bài.” Mơ khai đơs tai lah: “Hơ̆ la bơta tồi glài iơh bơsak làng bol tòm làm plai ù.”

⁷ Gen añ gŏ bơnap bài mơ trà geh yò tơngguh mơ gơs dô nă cau ùr nggui tòm bài.

⁸ Mơ khai đơs lah: “Hơ̆ la bơta iơh bơsak,” behơ̆ khai tơlo cau ùr mut wơl tòm bài mơ ai bơnap bài mơ trà trup wơl hơđang bơr bài.

⁹ Gen añ pò mat tơnggòr sền hơđang, di đap añ gơs bàr nă cau ùr gơs càl ơm tòm pơnđar bol khai dê. Bol khai gơs pơnđar kung be pơnđar klàng kò, mơ bol khai yò tơngguh bài hơđang digùl trồ mơ tiah.

¹⁰ Añ lùp cau gơnrơh ơm đơs mơ añ lah: “Ntềng đah bol khai cèng bài hơ̆ taih?”

¹¹ Khai ho mơ añ lah: “Tus tòm tiah Sinar, nàng bơt dô nơm hìu gơ in; mơ tòm tŭ neh rcang sir rau, bol khai rơp ơn bài tòm tiah gơ dê tềng hơ̆.”