Sacari 4 - Sră Goh 2018

Bơta gơtơnggŏ dơ̆ pram: Jơng đèng màh mơ bàr nơm chi ôlibe

¹ Cau gơnrơh neh đơs mơ añ rê wơl, mơ neh pơrlai añ, kung be dô nă cau bic lơhă geh pơrlai guh wơl.

² Khai lùp añ lah: “Ñchi mê gŏ taih?” Añ ho lah: “Añ gŏ dô nơm jơng đèng mơ màh lơm, gơs dô nơm gri hơđang bồ gơ dê mơ gơs poh nơm lơmpiat ồs hơđang gơ, gơs poh nơm ding di ală lơmpiat ồs.

³ Kung gơs bàr nơm chi ôlibe ơm di gah gơ, dô nơm ơm đah ma gri, mơ dô nơm ơm đah kiau.”

⁴ Añ lùp cau gơnrơh ơm đơs mơ añ lah: “Ơ kơnràñ añ jê, ală bơta do la ñchi taih?”

⁵ Cau gơnrơh đơs mơ añ ho lah: “Mê ò git ală bơta do la ñchi ơ?” Añ ho lah: “Ơ kơnràñ añ jê, añ ò git.”

⁶ Behơ̆ khai đơs mơ añ lah: “Do la jơnau Yàng Jehôwa đơs mơ Jerubabel: ‘Hơ̆ ò di la bơh gơnoar pràn, kung ò di la bơh gơnap gơnoar, mơya la bơh Hwềng Añ,’ Yàng Jehôwa Gơnap Gơnoar Dờng Làm Jơh đơs behơ̆.

⁷ Ơ mơnơm dờng ne, mê la ñcau taih? Ơm di đap Jerubabel mê gơlik gơs ƀlàng ring, mơ khai rơp cèng tơlik lŭ bồ digùl ală jơnau driau dờng lah: ‘Kòñ nđàc! Kòñ nđàc gơ in!’”

⁸ Gen gơs jơnau Yàng Jehôwa đơs mơ añ tai lah:

⁹ “Tê Jerubabel neh bơt mơnàng hìu duh khoai do, gen tê khai kung rơp lơh sir. Gen bol mê rơp git lah Yàng Jehôwa Gơnap Gơnoar Dờng Làm Jơh neh sồr añ tus mơ bol mê.

¹⁰ Ñcau sền òsơp di ngai ală bơta dềt rhền taih? Cau rơp chò hòp sền gŏ che rnoas bơt hìu tòm tê Jerubabel. Poh nơm ồs đèng la gar mat Yàng Jehôwa sền sơwì làm jơh plai ù.”

¹¹ Gen añ lùp cau gơnrơh lah: “Bàr nơm tòm chi ôlibe ơm đah ma mơ đah kiau jơng đèng la ñchi taih?”

¹² Añ lùp cau gơnrơh tai mơ lah: “Bàr nơm ntê chi ôlibe ơm di gah bàr nơm ding màh hòr lik mơñà be màh la ñchi taih?”

¹³ Khai ho lah: “Mê ò git ală bơta hơ̆ la ñchi ơ?” Añ đơs lah: “Ơ kơnràñ añ jê, añ ò git.”

¹⁴ Behơ̆ khai đơs lah: “Hơ̆ la bàr nă cau geh bong mơñà, nàng duh broă Yàng Jehôwa jơh plai ù dê.”