Sacari 2 - Sră Goh 2018

Bơta gơtơnggŏ dơ̆ pe: Dô nă cau mơ che rnoas bơt hìu

¹ Añ tơnggòr sền hơđang; ne, di đap añ gơs dô nă cau at che rnoas bơt hìu tòm tê.

² Gen añ lùp lah: “Ntềng đah ồng lòt taih?” Khai ho lah: “Añ lòt was Jerusalem nàng git gơ ơnàng mơ jòng ròt kàr lơi.”

³ Gen cau gơnrơh neh đơs mơ añ lik lòt, mơ dô nă cau gơnrơh ndai lòt tus nàng tìp khai,

⁴ mơ đơs mơ khai lah: “Ntoat tĕ, đơs mơ cau klau pơnu hơ̆ lah: Jerusalem rơp gơlik dô nơm ƀòn dờng ò gơs dơrñang, tài bơh gơs oă ngan cau mơ phan poan jơng ơm tòm hơ̆.

⁵ Yàng Jehôwa đơs: bơh Añ rơp la dơrñang ồs gùt dar gơ, mơ Añ rơp la bơta gơklŏ tòm gơ.”

Jơnau hòi ală cau kong kup cèng rê wơl

⁶ Yàng Jehôwa đơs lah: “Guh tĕ! Guh tĕ! Dô tĕ bơh di lơgar đah đang; bơh Añ neh rsìh bol mê hơ tiah ngài be poan đah càl hơđang trồ.” Yàng Jehôwa đơs behơ̆.

⁷ “Guh tĕ, dô pleh tĕ hơ Siôn! Ơ bol mê la ală cau ơm mơ kòn ùr Babilôn dê!

⁸ Bơh Yàng Jehôwa Gơnap Gơnoar Dờng Làm Jơh đơs lah (tơnơ̆ mơ tŭ bơta gơklŏ Kơnràñ dê neh sồr tus hơ añ) pơnah ală lơgar neh phà tơnroh bol mê lah: bơh cau lơi ƀư di bol mê hơ̆ la ƀư di kòn mat Kơnràñ dê,

⁹ tŭ do, sền tĕ Añ rơp pò tê tòmdră mơ bol khai tian gơs bol khai rơp kong phà tơnroh bơh ală cau dĭ bol khai dê. Gen bol mê rơp git lah Yàng Jehôwa Gơnap Gơnoar Dờng Làm Jơh neh sồr añ lòt tus.”

¹⁰ “Ơ kòn ùr Siôn, driau dờng chò hòp tĕ! Bơh Añ tus mơ Añ ơm digùl bol ai.” Yàng Jehôwa đơs behơ̆.

¹¹ Tòm ngai hơ̆, oă làng bol rơp pơjum wơl mơ Yàng Jehôwa mơ rơp gơlik gơs làng bol Añ jê. Añ rơp ơm digùl bol mê. Mơ bol mê rơp git lah Yàng Jehôwa Gơnap Gơnoar Dờng Làm Jơh neh sồr añ tus hơ bol mê.

¹² Yàng Jehôwa rơp dòp geh Juda lơh gơs sre brê Kơnràñ dê tòm lơgar sàng goh, mơ dô dơ̆ tai Kơnràñ rơp sac rwah Jerusalem.

¹³ Ơm tĕ mŏ mŏ, ơ jơh làng bol, di đap Yàng Jehôwa; bơh Kơnràñ neh guh bơh di tiah ơm sàng goh Kơnràñ dê.