Sacari 12 - Sră Goh 2018

Jơnau đơs hwơr bơta pha lin rlau Jerusalem dê

¹ Do la jơnau Yàng Jehôwa đơs bơh Israel. Yàng Jehôwa la Bơtau neh lì ală tap trồ, bơt mơnàng plai ù, mơ crơng gơs hwềng tòm kòn mơnus, neh đơs be do:

² “Añ rơp lơh Jerusalem in gơlik gơs dô nơm mơngàn gơlơh ală làng bol gùt dar in sơwing bồ. Añ rơp tòmdră mơ Juda, kung behơ̆ sơl, Jerusalem rơp kòl cau sò tơm gơrwàng gùt dar.

³ Tòm ngai hơ̆, tòm tŭ jơh ală làng bol tòm ù pơjum bal tòmdră mơ Jerusalem, Añ rơp lơh Jerusalem in gơlik gơs kung be dô pơnai lŭ klềr cau ò rgơi pơrlă gơwèt mơ jơh ală làng bol. Jơh ală cau lơi kòñ pơrlă gơ gen să tòm bol khai rơp kong jê sồt.”

⁴ Yàng Jehôwa đơs: “Tòm ngai hơ̆, Añ rơp pù lơh kòp nơm ơseh mơ bơta nsràng rngòt, mơ ală cau hào ơseh gơlik sơnrang sơnrồng. Mơya Añ rơp ai mat sền gàr hìu Juda, tòm tŭ Añ pù ală ơseh làng bol dê lơh bol gơ in gơlik jơngo mat.

⁵ Gen ală cau kwang at bồ Juda rơp đơs tòm nùs he dê lah: ‘Làng bol Jerusalem gơs pràn kơldang tài bơh Yàng Jehôwa Gơnap Gơnoar Dờng Làm Jơh la Yàng Tom Trồ bol khai dê.’

⁶ Tòm ngai hơ̆, Añ rơp lơh ală cau kwang at bồ Juda in gơlik gơs kung be dô nơm bơnhă ồs ơm digùl dô gơnru lòng, kung be dô nơm sơmpòl ồs ơm digùl ală cap kòi. Bol khai rơp chu pơrguc đah ma mơ đah kiau, jơh ală làng bol ơm gùt dar; mơ tŭ hơ̆ Jerusalem rơp geh cau ơm tai tòm tiah gơ dê, tòm Jerusalem.”

⁷ Yàng Jehôwa rơp ai bơta pha lin ală sàl ơm cau Juda dê sơnròp ngan, tồ bơta gơklŏ hìu Dabit dê mơ làng bol Jerusalem dê ò geh lin rlau mơ Juda.

⁸ Tòm ngai hơ̆, Yàng Jehôwa rơp cang kìng ală cau ơm tòm Jerusalem, tian gơs ală cau lơbơn rlau jơh tòm gùl bol khai rơp gơlik gơs kung be Dabit, mơ hìu Dabit rơp gơlik gơs kung be Yàng Tom Trồ, kung be cau gơnrơh Yàng Jehôwa dê ơm di đap bol khai.

⁹ “Tòm ngai hơ̆, Añ rơp lik lòt tơnroh jơh ală làng bol brồ lơh Jerusalem.”

Ñìm rac bơh Bơtau mơ bol khai neh srơp bluh

¹⁰ “Mơ Añ rơp tuh tơlik Hwềng bơta nđàc mơ bơta rac dan hơđang hìu Dabit mơ hơđang làng bol Jerusalem. Bol khai rơp sền gŏ Bơtau mơ bol khai neh srơp, mơ bol khai rơp ñìm rac bơh Kơnràñ kung be cau ñìm rac bơh dô nă kòn dùl, mơ ñìm rac sràt bơtang bơh Kơnràñ, kung be cau moat jrùng jê sồt bơh dô nă kòn klau tơnhoa he dê.

¹¹ Tòm ngai hơ̆, rơp gơs bơta ñìm ngkè dờng tòm Jerusalem, kung be bơta ñìm ngkè Hadat Rimmôn dê tòm ƀlàng ring Megidô.

¹² Lơgar rơp ñìm rac, kòp mpồl hìu nhă is gơ dê, bal mơ ală bau ùr ơm is bol khai dê: mpồl hìu nhă Dabit dê bal mơ ală bau ùr bol khai dê, mpồl hìu nhă Nathan dê bal mơ ală bau ùr bol khai dê,

¹³ mpồl hìu nhă Lebi dê bal mơ ală bau ùr bol khai dê, mpồl hìu nhă Simei dê bal mơ ală bau ùr bol khai dê,

¹⁴ mơ jơh ală mpồl hìu nhă gam wơl bal mơ ală bau ùr bol khai dê.”