Rutơ 1 - Sră Goh 2018

Naômi mơ Rutơ

¹ Tòm pah rài ală kwang cahrña at bồ, gơs dô bơta jơgloh rung tòm lơgar. Gơs dô nă cau klau bơh Betlehem tòm Juda, lam bau ùr mơ bàr nă kòn klau khai dê lòt tus ơm tòm lơgar Môap.

² Khai sơnđan la Elimelek, bau ùr khai sơnđan la Naômi, mơ bàr nă kòn klau khai dê sơnđan la Mahlôn mơ Kilaiôn. Bol khai la cau Ephrat ƀòn Betlehem, tòm Juda. Bol khai lòt tus hơ lơgar Môap mơ ơm tềng hơ̆.

³ Gen Elimelek bau klau Naômi dê chơt lòi wơl bau ùr bal mơ bàr nă kòn klau khai dê.

⁴ Bàr nă kòn klau hơ̆ bau mơ cau ùr Môap: dô nă sơnđan la Orpa mơ dô nă sơnđan la Rutơ. Tơnơ̆ mơ tŭ bol khai neh ơm tềng hơ̆ pơgap jơt nam,

⁵ gen jơh bàr nă Maklôn mơ Kilaiôn kung chơt, behơ̆ lòi wơl Naômi ò gơs bàr nă kòn klau mơ kung ò gơs bau klau sơl.

⁶ Gen Naômi mơ bàr nă ƀan khai dê sơntòm lik bơh lơgar Môap, bơh khai neh kơno lah Yàng Jehôwa neh wèt sền làng bol Kơnràñ dê mơ neh ai bol khai in phan sa.

⁷ Behơ̆ khai lik bơh tiah khai neh ơm, khai bal mơ bàr nă ƀan khai dê lòt gùng rê hơ lơgar Juda.

⁸ Mơya Naômi đơs mơ bàr nă ƀan khai dê lah: “Bol ai rê tĕ hơ hìu mè bol ai dê, dan Yàng Jehôwa yal tơlik bơta nđàc gơwèt mơ bol ai kung be bol ai neh gơwèt mơ cau chơt mơ gơwèt añ sơl.

⁹ Dan Yàng Jehôwa ai bol ai in geh bơta ring lơngai tòm hìu bau klau bol ai dê.” Lồc behơ̆ Naômi cum bàr nă bol khai mơ bol khai ñìm dờng.

¹⁰ Bol khai đơs mơ mò Naômi lah: “Ò, bol hi rơp rê bal mơ mè hơ làng bol mè dê.”

¹¹ Mơya Naômi đơs lah: “Ơ ală kòn ùr añ jê, rê wơl tĕ! Ñchi bơh tài kòñ jat añ? Añ rơp gơs ală kòn klau tòm hìu kòn añ jê nàng bau mơ bol ai sơl?

¹² Rê hìu tĕ, ơ ală kòn ùr añ jê; rê tĕ tòm gùng bol ai dê, bơh añ neh kra ir nàng gơs bau tai. Bulah añ kơlôi la añ gam gơs bơta gơn kơnòm, bulah añ bau mơ dô nă cau klau tòm mang do mơ deh ală kòn klau,

¹³ bol ai rơp gơn jơl tus di tŭ bol khai dờng sơl ơ? Bol ai rơp ò bau nàng gơn bol khai sơl ơ? Ò di, ơ ală kòn ùr añ jê! Nùs mè sràt bơtang oă rlau mơ ală kòn, tài bơh tê Yàng Jehôwa dê neh tơrwơl tòmdră mơ mè.”

¹⁴ Behơ̆ bol khai ñìm tai. Orpa cum tơngac po me khai mơ lòt, mơya Rutơ kư̆ ơm bal mơ po me khai dê.

¹⁵ Naômi đơs mơ Rutơ lah: “Ne, bi ai neh rê hơ làng bol mơ hơ ală yàng khai dê. Ai rê tĕ jat khai.”

¹⁶ Mơya Rutơ ho lah: “Bañ bơklơn añ sang lòi mè hala wơlke ò jat mè. Mè lòt tiah lơi añ rơp lòt tiah hơ̆, mè ơm tiah lơi añ rơp ơm tềng hơ̆. Làng bol mè dê rơp la làng bol añ jê, mơ Yàng Tom Trồ mè dê la Yàng Tom Trồ añ jê.

¹⁷ Mè chơt tiah lơi gen añ rơp chơt tiah hơ̆, mơ geh tơp tềng hơ̆ sơl. Dan Yàng Jehôwa lơh añ dô bă kơnjơ̆ ngan dilah gơs bơta lơi rlau mơ bơta chơt gơcah is añ mơ mè.”

¹⁸ Tòm tŭ Naômi đal gŏ Rutơ lơh nền nàng lòt jat khai, gen khai ò đơs jơnau lơi tai.

¹⁹ Behơ̆, bàr nă bol khai kư̆ lòt jơl tus di tŭ tus hơ Betlehem. Tòm tŭ bol khai tus tòm Betlehem gen jơh ală cau tòm ƀòn gơs nggồr nggàc tài bơh bol khai; mơ ală cau ùr đơs lah: “Hơ̆ la Naômi ơ?”

²⁰ Naômi đơs mơ bol hơ̆ lah: “Bañ hòi añ la Naômi tai, mơya hòi tĕ añ la Mara tài bơh Bơtau Gơnap Gơnoar neh lơh rài kis añ sràt bơtang ngan.

²¹ Añ lik lòt bềng lìu, mơya Yàng Jehôwa neh lam añ rê wơl tê gòi. Ñchi bơh tài hòi añ la Naômi taih? Tòm tŭ Yàng Jehôwa neh lơh dô bă kràñ cê mơ añ, Bơtau Gơnap Gơnoar Dờng neh đùh bơta rung rài hơđang añ.”

²² Behơ̆ Naômi rê wơl bal mơ Rutơ cau Môap ƀan khai dê bơh Môap. Bol khai tus tòm Betlehem di di kơnhai toès kòi màc.