Rôma 8 - Sră Goh 2018

Bơta kis tòm Yàng Hwềng Goh

¹ Gen tàng tŭ do ò gơs bơta lơh nền glài di ală cau ơm tòm Yàng Krist Jesu

² Bơh bơta boh lam Yàng Hwềng bơta kis dê tòm Yàng Krist Jesu neh hồ toh añ lik klàs bơh bơta boh lam tồi glài dê mơ bơta chơt.

³ Bơh bơta lơi bơta boh lam lơh ò jai, la tài bơh poac să lơh bơta boh lam in gơlik gơs pùh lơbơn, gen Yàng Tom Trồ neh lơh rau; Kơnràñ neh bơh tồi glài tàng sồr Kòn tòm Kơnràñ dê ai poac să tòm toh be poac să tồi glài, mơ neh lơh nền glài tồi glài in tòm poac să,

⁴ tồ bơta song ring bơta boh lam dê lơh gơs wil tơl tòm bol he, la cau ò lòt jat poac să, mơya lòt jat Yàng Hwềng.

⁵ Bơh cau kis jat poac să, gen kơlôi wèt ală bơta đah poac să, ai cau kis jat Yàng Hwềng gen kơlôi wèt ală bơta đah Yàng Hwềng.

⁶ Bơta kơlôi wèt đah poac să la bơta chơt, ai bơta kơlôi wèt đah Yàng Hwềng la bơta kis mơ bơta lơngap lơngai;

⁷ bơh bơta kơlôi wèt poac să dê gơtòmsò mơ Yàng Tom Trồ bơh gơ ò bài dòn duh bơta boh lam Yàng Tom Trồ dê, mơ kung ò rgơi dòn duh sơl.

⁸ Ală cau jat poac să gen ò rgơi niam nùs Yàng Tom Trồ.

⁹ Mơya dilah ngan gơs Hwềng Yàng Tom Trồ dê ơm tòm oh mi, gen oh mi ò kis jat poac să, mơya kis jat Yàng Hwềng; mơ dilah cau lơi ò gơs Hwềng Bơtau Krist dê, gen cau hơ̆ ò di bal mơ Kơnràñ.

¹⁰ Behơ̆ dilah Bơtau Krist ơm tòm oh mi, gen să jan chơt tài bơh tồi glài, ai hwềng nùs kis bơh bơta song ring.

¹¹ Dilah Yàng Hwềng Goh bơh Bơtau neh lơh Yàng Jesu in kis wơl bơh bơta chơt ơm tòm oh mi, gen Bơtau neh lơh Yàng Krist Jesu in kis wơl bơh bơta chơt kung rơp kơnòm di Yàng Hwềng Goh Kơnràñ dê ơm tòm oh mi nàng lơh să jan òs chơt oh mi dê geh kis sơl.

¹² Ơ oh mi, bol he ò di kòl dồs mơ poac să ò, nàng kis jat poac să.

¹³ Bơh dilah oh mi kis jat poac să gen pal chơt; mơya dilah oh mi kơnòm di Yàng Hwềng tơnchơt ală broă să jan dê gen oh mi rơp geh kis.

¹⁴ Bơh jơh ală cau lơi gơs Hwềng Yàng Tom Trồ dê tề lam hơ̆ la kòn Yàng Tom Trồ dê.

¹⁵ Ngan behơ̆ oh mi ò dòp hwềng nùs dĭ gơna dê nàng ơm tòm bơta rngòt rngơt tai, mơya neh dòp hwềng bơta geh kòp la kòn mơ kơnòm di bơta hơ̆ bol he hòi lah: “Aba, Bèp!”

¹⁶ Să tòm Yàng Hwềng mơ hwềng nùs bol he dê lơh cơng lah bol he la kòn sau Yàng Tom Trồ dê.

¹⁷ Dilah bol he la kòn sau, gen kung la cau pơrdòn: Cau pơrdòn Yàng Tom Trồ dê mơ la cau pơrdòn bal mơ Bơtau Krist sơl, mìng la bol he kong jê sồt bal mơ Kơnràñ, tồ kung geh bơta gơklŏ bal mơ Kơnràñ sơl.

Bơta gơklŏ ngai rơp tus

¹⁸ Añ kòp lah ală bơta jê sồt tòm tŭ do ò di pal pơndròm mơ bơta gơklŏ rơp geh ràng tơlik bol he in.

¹⁹ Bơh ală phan tòm trồ tiah jơh nùs kơp kòñ mơ gơn kơp bơta ràng tơlik ală kòn sau Yàng Tom Trồ dê.

²⁰ Ală phan tòm trồ tiah neh kòl dòn duh bơta roh lơm, ò di bơh nùs is gơ dê, mơya bơh nùs kòñ Bơtau neh sồr gơ dòn duh.

²¹ Ală phan tòm trồ tiah gơn kơnòm lah gơ rơp geh hồ toh lik klàs bơh di bơta lơh gơs dĭ gơna bơta roh lơm dê, tồ dòp bơta khat gơboh tòm bơta gơklŏ kòn sau Yàng Tom Trồ dê.

²² Bơh bol he git lah ală phan tòm trồ tiah neh rac ròc mơ kong bòl glar jê sồt be bơta jê deh jơl tus di tŭ do;

²³ ò di mìng ală phan tòm trồ tiah lơm, bol he la cau gơs Yàng Hwềng be bơta nđàc sơnròp ngan Yàng Tom Trồ dê, kung rac ròc tòm nùs, tòm tŭ kơp gơn Yàng Tom Trồ kòp bol he la kòn ròng Kơnràñ dê mơ bơta hồ toh să jan bol he dê.

²⁴ Bơh bol he neh geh dong klàs tòm bơta gơn kơnòm; mơya tòm tŭ cau neh gŏ bơta he gơn kơnòm rau, behơ̆ ò di la bơta gơn kơnòm tai: Bơh ñcau gam gơn kơnòm bơta he neh gŏ rau taih?

²⁵ Mơya dilah bol he gơn kơnòm bơta he òhềt gŏ, gen sồng bol he ai nùs ơt ơl mơ kơp gơn bơta hơ̆.

²⁶ Kung behơ̆ sơl, Yàng Hwềng dong kòl tòm bơta lơbơn lơño bol he dê; bơh bol he ò git mbe kòñ hòi dan nàng di pal, mơya să tòm Yàng Hwềng ai bơta rac ròc he ò rgơi yal loh nàng hòi dan ala bol he in.

²⁷ Mơ Yàng Tom Trồ la Bơtau sơwì nền nùs bol he dê, git wă nùs kơlôi Yàng Hwềng dê, jat nùs kòñ Yàng Tom Trồ mơ hòi dan ala ală cau sàng goh in.

²⁸ Bol he git lah tòm jơh ală bơta, Yàng Tom Trồ lơh tồ gơs kwơ cau lơi in kòñ gơboh di Kơnràñ, hơ̆ la cau neh geh hòi sac jat bơta lơh nền Kơnràñ dê.

²⁹ Bơh ală cau Kơnràñ neh git lài, gen Kơnràñ kung neh lơh nền lài nàng bol khai in gơlik gơs be rùp să Kòn Kơnràñ dê, tồ Kòn hơ̆ lơh gơs kòn tơnhoa ơm digùl oă oh mi;

³⁰ mơ ală cau Kơnràñ neh lơh nền lài, gen Kơnràñ kung neh hòi sac; ală cau Kơnràñ neh hòi sac, gen Kơnràñ kung neh kòp la song ring; ală cau Kơnràñ neh kòp la song ring, gen Kơnràñ kung neh ai bol khai in bơta gơklŏ.

Bơta kòñ gơboh Yàng Tom Trồ dê tòm Yàng Krist Jesu

³¹ Gen mbe bol he kòñ đơs bơh ală bơta hơ̆ taih? Dilah Yàng Tom Trồ ơm đah mơ bol he, gen gơs ñcau sò tơm dê bol he taih?

³² Kơnràñ neh ò pơlai Kòn tòm Kơnràñ dê, mơya tài bơh jơh ală bol he tàng neh jào phi Kòn hơ̆, gen Kơnràñ ò di kung rơp cèng jơh ală bơta bal mơ kòn hơ̆ mơ ai tơn bol he in ò ơ?

³³ Ñcau rơp yă ală cau Yàng Tom Trồ sac rwah taih? Yàng Tom Trồ la Bơtau kòp bol khai la song ring.

³⁴ Ñcau rơp lơh nền glài bol khai taih? Yàng Krist Jesu la Bơtau neh chơt mơ ngan neh kis wơl bơh bơta chơt; Kơnràñ nggui đah ma Yàng Tom Trồ mơ hòi dan ala bol he in.

³⁵ Ñcau rơp cah is bol he bơh bơta kòñ gơboh Bơtau Krist dê taih? Hơ̆ la bơta rung rài, pơnjê pơngkồr, kup kơryan, jơgloh rung, ơm kuh lòi rồ, sơbơng rơng, hala crut đào sơl ơ?

³⁶ Be neh cih lah: “Tài bơh Yàng tàng bol he kong cau tơnchơt ngai mho; Bol khai sền bol he be belàt cau neh lơh nền nàng lơh poac.”

³⁷ Gơpơrlơ̆ wơl, tòm jơh ală bơta hơ̆, bol he kơnòm di Bơtau kòñ gơboh di bol he nàng geh bơta pha lin rlau.

³⁸ Bơh añ dòn nền ngan lah bulah bơta chơt, hala bơta kis, ală cau gơnrơh, ală gơnoar at bồ, ală bơta tŭ do hala ală bơta rơp tus, hala ală gơnap gơnoar,

³⁹ đah jơnhoa hala đah jrô, hala dô nơm phan lơi ndai neh geh crơng gơs, ò rgơi cah is bol he bơh bơta kòñ gơboh Yàng Tom Trồ dê ơm tòm Yàng Krist Jesu la Yàng bol he dê.