Rôma 7 - Sră Goh 2018

Bơta boh lam bơrkoat bau ùr mơ bau klau

¹ Ơ oh mi, (bơh añ đơs mơ ală cau git bơta boh lam), oh mi ò git lah bơta boh lam mìng gơs gơnoar at bồ cau tòm tŭ khai gam kis ò ơ?

² Gen tàng cau ùr geh bau, mơ bau klau gam kis kàr lơi, gen bơta boh lam kơt khai mơ bau klau khai dê kàr hơ̆ sơl; mơya dilah bau klau chơt, gen bau ùr geh lik klàs bơh bơta boh lam neh kơt khai mơ bau klau khai dê.

³ Behơ̆ gen tòm tŭ bau klau gam kis, dilah cau ùr bau mơ cau klau ndai, gen sơnđan khai la cau ùr bơrnàn; mơya dilah bau klau neh chơt rau, gen cau ùr geh lik klàs bơh bơta boh lam hơ̆ rau, bulah bau mơ klau ndai gen ò di la cau ùr bơrnàn.

⁴ Kung behơ̆ sơl, ơ oh mi añ jê, kơnòm di să jan Bơtau Krist dê mơ oh mi neh chơt gơwèt hơ bơta boh lam, nàng geh kơt bal mơ cau ndai, hơ̆ la cau neh kis wơl bơh bơta chơt, tồ bol he gơlik plai Yàng Tom Trồ in.

⁵ Tòm tŭ bol he gam jat poac să, gen ală bơta hàm kòñ iơh tồi glài dê bơh bơta boh lam tơnggit, lơh broă tòm să jan bol he, mơ gơlik plai bơta chơt in.

⁶ Mơya tòm tŭ do bol he neh geh lik klàs bơh bơta boh lam, mơ neh chơt gơwèt hơ bơta neh krơ̆ jàm bol he, nàng duh broă jat bơta pa Yàng Hwềng dê, ò di jat jơnau cih yau ò.

Bơta boh lam mơ tồi glài

⁷ Behơ̆ mbe bol he kòñ đơs tiah? Bơta boh lam la tồi glài ơ? Ò di behơ̆! Mơya tài bơh bơta boh lam tàng añ git tồi glài, bơh dilah bơta boh lam ò đơs lah: “Mê bañ hàm hà,” gen añ ò git bơta hàm hà la ñchi.

⁸ Mơya tồi glài neh ai kai bơh bơta sồr lam, nàng tơnggơs tơl ală bơta hàm hà tòm añ; bơh ò gơs bơta boh lam gen tồi glài neh chơt rau.

⁹ Lài òr añ ò gơs bơta boh lam, mơ añ kis; mơya dơ̆ bơta sồr lam tus, gen tồi glài kis wơl, ai añ gen chơt;

¹⁰ behơ̆ bơta sồr lam pal lam añ tus hơ bơta kis, mơya gơ lam añ tus hơ bơta chơt.

¹¹ Bơh tồi glài neh ai kai, ngui bơta sồr lam pơrlồm añ mơ bơh hơ̆ tơnchơt añ.

¹² Gen behơ̆ bơta boh lam la sàng goh, mơ bơta sồr lam kung la sàng goh, song ring mơ niam sơl.

¹³ Behơ̆ bơta niam gơlik gơs bơta chơt añ in ơ? Ò di behơ̆! Mơya tồi glài bơh bơta niam mơ neh lơh bơta chơt añ in, ràng tơlik is gơ dê la tồi glài; nàng tồi glài bơh bơta sồr lam mơ gơlik gơs iơh bơsak oă ngan.

Bơta tòmlơh tòm dơlam kòn mơnus

¹⁴ Mơ tai, bol he git bơta boh lam la đah hwềng, mơya añ la đah poac să neh kòl tac tồi glài in.

¹⁵ Bơh añ ò git wă bơta añ lơh; añ ò lơh bơta añ kòñ, mơya añ lơh bơta añ gơjrañ.

¹⁶ Mơ dilah añ lơh bơta añ ò bài, gen bơh hơ̆ añ dòp git bơta boh lam la niam.

¹⁷ Behơ̆ tŭ do ò di să tòm añ lơh bơta hơ̆ tai, mơya hơ̆ la tồi glài ơm tòm añ.

¹⁸ Bơh añ git bơta niam ò ơm tòm añ, hơ̆ la tòm poac să añ, bơh añ gơs nùs kòñ lơh bơta niam, mơya ò rgơi lơh bơta niam.

¹⁹ Bơh añ ò lơh bơta niam añ kòñ lơh, mơya añ lơh wơl bơta iơh añ ò bài.

²⁰ Dilah añ lơh bơta añ ò bài lơh, hơ̆ la ò di añ lơh bơta hơ̆ tai, mơya tồi glài ơm tòm añ lơh bơta hơ̆.

²¹ Behơ̆ añ gŏ gơs bơta boh lam do tòm añ: dơ̆ añ kòñ lơh bơta niam, gen bơta iơh gơđềt jat añ.

²² Bơh jat cau đah dơlam, añ geh hừh nùs tòm bơta boh lam Yàng Tom Trồ dê;

²³ mơya añ git ngan tòm să jan añ gơs dô bơta boh lam ndai tòmlơh mơ bơta boh lam tòm nùs kơlôi añ, kup añ jàm lơh gơs dĭ gơna bơta boh lam tồi glài dê, hơ̆ la bơta boh lam tòm să jan añ jê.

²⁴ Bòl glar ngan añ in! Ñcau rơp dong tă añ lik klàs bơh să jan chơt do tiah?

²⁵ Ưnngài Yàng Tom Trồ, kơnòm di Yàng Jesu Krist la Yàng bol he dê! Behơ̆ să tòm añ ai nùs kơlôi dòn duh bơta boh lam Yàng Tom Trồ dê, mơya ai poac să dòn duh bơta boh lam tồi glài dê.