Rôma 6 - Sră Goh 2018

Rài kis tòmgơl pa ( 6:1 – 8:39 ) Chơt gơwèt hơ tồi glài kis Yàng Jesu Krist in

¹ Behơ̆, mbe bol he kòñ đơs taih? Bol he kư̆ ơm sùm tòm tồi glài tồ bơta nđàc in geh bơtơl lìu làc ơ?

² Ò di behơ̆! Bol he neh chơt gơwèt hơ tồi glài, gen mbe bol he gam kis tòm tồi glài taih?

³ Oh mi ò git lah bol he jơh tơl nă neh gơs ƀaptem tòm Yàng Krist Jesu, hơ̆ la neh geh ƀaptem tòm bơta chơt Kơnràñ dê ò ơ?

⁴ Behơ̆, bol he neh kong tơp bal mơ Kơnràñ bơh bơta ƀaptem tòm bơta chơt Kơnràñ dê, tồ Bơtau Krist in kơnòm di bơta gơklŏ Yàng Bèp dê mơ geh kis wơl bơh bơta chơt be lơi, gen bol he kung lơh lòt tòm rài kis pa behơ̆ sơl.

⁵ Behơ̆ dilah bol he gơs dô bă bal mơ Kơnràñ tòm toh be bơta chơt Kơnràñ dê, gen bol he kung rơp gơs dô bă bal mơ Kơnràñ tòm toh be bơta kis wơl Kơnràñ dê behơ̆ sơl.

⁶ Bơh git lah cau yau bol he dê neh kong pơng hơđang chi pơng bal mơ Kơnràñ, tồ să jan tồi glài dê kòl tơnroh, mơ bol he ò gam lơh gơs dĭ gơna tồi glài tai,

⁷ bơh cau lơi neh chơt gen geh lik klàs bơh tồi glài rau.

⁸ Mơ tai, dilah bol he neh chơt bal mơ Bơtau Krist, gen bol he dòn lah bol he kung rơp kis bal mơ Kơnràñ sơl,

⁹ bơh git lah Bơtau Krist neh kis wơl bơh bơta chơt, gen ò gơs tŭ lơi chơt tai, bơta chơt ò geh at bồ hơđang Kơnràñ tai ò.

¹⁰ Bơh Kơnràñ neh chơt hơ̆ la chơt tồi glài in mìng dô dơ̆ gen tơl rau; mơya Kơnràñ kis la kis Yàng Tom Trồ in.

¹¹ Behơ̆ oh mi kung kòp tĕ să he be neh chơt gơwèt hơ tồi glài, mơ kis gơwèt hơ Yàng Tom Trồ tòm Yàng Krist Jesu.

¹² Behơ̆ bañ lòi tồi glài in at bồ tòm să jan òs chơt oh mi dê, mơ lơh oh mi in jat bơta hàm kòñ is gơ dê,

¹³ kung bañ ơn să jan he tồi glài in, nàng lơh gơs phan ngui bơta iơh bơsak dê, mơya ơn tĕ să tòm oh mi Yàng Tom Trồ in, kung be ală cau neh chơt mơ kis wơl mơ ơn să jan he Yàng Tom Trồ in, nàng lơh gơs phan ngui bơta song ring dê.

¹⁴ Bơh tồi glài ò geh at bồ hơđang oh mi tai; bơh oh mi ò di ơm tòm gơnoar bơta boh lam dê, mơya ơm tòm gơnoar bơta nđàc dê.

Lồi dut bơta tồi glài mơ bơta nđàc dê

¹⁵ Behơ̆ gen mbe lơh taih? Bol he ò di ơm tòm gơnoar bơta boh lam mơya ơm tòm gơnoar bơta nđàc dê, gen bol he rơp kư̆ tìs glài sơl ơ? Ò di behơ̆!

¹⁶ Oh mi ò git lah dilah oh mi neh ơn să he lơh gơs dĭ gơna nàng dòn bơr cau lơi, gen lơh gơs dĭ gơna cau he dòn bơr dê, dĭ gơna tồi glài dê lam tus hơ bơta chơt, dĭ gơna bơta dòn bơr dê lam tus hơ bơta song ring ò ơ?

¹⁷ Mơya ưnngài Yàng Tom Trồ, bơh tơnơ̆ mơ tŭ oh mi neh ơm dĭ gơna tồi glài dê, gen neh jơh nùs dòn bơr kơr sơnoa bơta bơto dê neh jào oh mi in.

¹⁸ Behơ̆ oh mi neh geh hồ toh lik klàs bơh tồi glài, gen neh gơlik gơs dĭ gơna bơta song ring dê rau.

¹⁹ Añ đơs jat be kòn mơnus đơs, bơh đah poac să oh mi dê la lơbơn lơño. Be oh mi neh ơn să jan he lơh gơs dĭ gơna bơta ngkòr ngkàc mơ bơta tồi glài iơh bơsak be lơi, gen tŭ do ơn tĕ să jan he lơh gơs dĭ gơna bơta song ring in, nàng lơh gơs bơta gơlik gơs sàng goh kung behơ̆ sơl.

²⁰ Mơ tai, tòm tŭ oh mi gam lơh gơs dĭ gơna tồi glài dê, gen gơwèt hơ bơta song ring oh mi neh geh khat gơboh.

²¹ Behơ̆ ală broă oh mi neh lơh lài òr gen ñchi cồng nha geh taih? Mơ tŭ do lơh oh mi in ƀàssìl, lồi dut ală broă hơ̆ dê la bơta chơt.

²² Mơya tòm tŭ do oh mi neh geh hồ toh lik klàs bơh tồi glài, mơ neh gơlik gơs dĭ gơna Yàng Tom Trồ dê, gen cồng nha oh mi dê la bơta gơlik gơs sàng goh, mơ lồi dut la bơta kis gam sùm sùm.

²³ Bơh jền tơngai tồi glài dê la bơta chơt, mơya bơta ai gòi Yàng Tom Trồ dê la bơta kis gam sùm sùm tòm Yàng Krist Jesu la Yàng bol he dê.