Rôma 3 - Sră Goh 2018

¹ Behơ̆ gen, bơta lin rlau cau Juda dê la ñchi, hala bơta siat gơltau gơs kwơ lơi taih?

² Gơs kwơ ngan tòm jơh ală bơta. Sơnròp ngan jơnau đơs Yàng Tom Trồ dê neh jào làng bol Juda in.

³ Mbe gơlơh dilah gơs cau tòm bol khai ò dòn song? Gen bơta ò dòn song bol khai dê lơh bơta dòn song Yàng Tom Trồ dê gơlik gơs ò kwơ ơ?

⁴ Ò di behơ̆ ò! Yàng Tom Trồ la song ngan, bulah ală cau la blac chừt, be neh cih lah: “Behơ̆, Yàng geh kòp la song ring tòm ală jơnau đơs Kơnràñ dê, Mơ geh pha lin tòm tŭ Kơnràñ kong cahrña.”

⁵ Mơya dilah bơta ò song ring bol he dê yal loh rlau tai bơta song ring Yàng Tom Trồ dê, gen mbe kòñ đơs taih? Tòm tŭ Yàng Tom Trồ đùh bơta gơjrañ dờng gen Kơnràñ la ò song ring ơ? (Añ đơs be cau òs đơs.)

⁶ Ò di behơ̆! Dilah Yàng Tom Trồ ò song ring gen mbe rgơi cahrña dunnia taih?

⁷ Mơya dilah bơta song Yàng Tom Trồ dê bơh bơta đơs blac añ jê mơ sơlo geh bơta gơklŏ dờng rlau, gen mbe añ gam kòl cahrña be cau glài taih?

⁸ Behơ̆ gen mbe bol he ò lơh bơta iơh tồ geh bơta niam taih? Be cau đơs iơh di bol hi lah bol hi bơto behơ̆. Bơta cahrña di cau hơ̆ la di pal ngan.

Ò gơs dô nă cau lơi song ring

⁹ Behơ̆ gen mbe lơh taih? Ñchi bơta bol he gơs niam rlau mơ bol khai taih? Ò gơs, bơh bol he neh lơh cơng nền lah cau Juda mơ cau Grek ơm hơđơm gơnoar tồi glài dê lơm,

¹⁰ be neh cih lah: “Ò gơs dô nă cau lơi song ring ò, Dô nă kung ò sơl.

¹¹ Ò gơs dô nă cau lơi git wă, Ò gơs dô nă cau lơi jòi jat Yàng Tom Trồ.

¹² Jơh ală bol khai neh tìs nrah, tơl nă ndròm bal gơlik gơs ò kwơ; Ò gơs dô nă cau lơi lơh bơta niam, Dô nă kung ò sơl.”

¹³ “Rnồng dò bol khai be bơtô ƀồc pò bơk. Bol khai ngui lơmpiat he dê nàng pơrlồm.” “Tòm tiah sơndồi bol khai gơs bih khih bơs tur.”

¹⁴ “Bơr bol khai bềng ală jơnau srat rma mơ sràt bơtang.”

¹⁵ “Jơng bol khai sơrbac sơrbang nàng lơh gơhòr mhàm,

¹⁶ Tòm gùng bol khai dê sih bơta tơnroh mơ rung rài.

¹⁷ Bol khai ò git gùng lơngap lơngai.”

¹⁸ “Ò gơs bơta duh rngòt Yàng Tom Trồ ơm di đap mat bol khai.”

¹⁹ Bol he git lah ală jơnau bơta boh lam đơs, la đơs mơ ală cau ơm tòm gơnoar bơta boh lam dê, tồ kòp nơm bơr pal gơtơmềm, mơ làm jơh dunnia pal ơm hơđơm bơta cahrña Yàng Tom Trồ dê.

²⁰ Bơh ò gơs dô nă cau lơi kơnòm di broă lơh jat bơta boh lam nàng geh kòp la song ring di đap Kơnràñ, bơh bơta boh lam ai cau in git he gơs glài.

Bơta song ring Yàng Tom Trồ dê. – Geh kòp song ring bơh bơta dòn ( 3:21 – 5:21 ) Bơta kòp la song ring bơh bơta dòn di Yàng Jesu Krist

²¹ Mơya tŭ do bơta song ring Yàng Tom Trồ dê neh geh yal tơlik ò di kơnòm dê bơta boh lam. Bulah bơta hơ̆ neh gơs bơta boh lam Môise mơ ală cau gơnoar hwơr lơh cơng.

²² Hơ̆ la bơta song ring Yàng Tom Trồ dê bơh bơta dòn tòm Yàng Jesu Krist mơ ai jơh ală cau lơi in dòn. Ò gơs cah is cau lơi,

²³ bơh jơh tơl nă neh tìs glài, siơ̆u roh bơta gơklŏ Yàng Tom Trồ dê;

²⁴ mơ bol khai kơnòm di bơta nđàc ai gòi Yàng Tom Trồ dê, bơh bơta tơwài glài tòm Yàng Krist Jesu, tàng geh kòp la song ring.

²⁵ Yàng Tom Trồ neh bơtào Kơnràñ lơh gơs phan ơn tơwài glài, ai cau lơi in dòn tòm mhàm Kơnràñ, bơta do neh ràng tơlik bơta song ring Yàng Tom Trồ dê, bơh Kơnràñ neh ai nùs ơt ơl mơ ò kòp ală glài neh tìs yau òr;

²⁶ Mơya tŭ do Kơnràñ kung neh ràng tơlik să tòm Kơnràñ la bơta song ring, mơ kòp la song ring cau lơi in dòn di Yàng Jesu.

²⁷ Behơ̆ gen bơta jòng să he bơh bơta lơi taih? Ò gơs. Bơh bơta boh lam lơi taih? Bơta boh lam broă lơh dê ơ? Ò di, mơya bơh bơta dòn.

²⁸ Bơh bol he dòn lah cau geh kòp la song ring bơh bơta dòn, ò di bơh broă lơh jat bơta boh lam,

²⁹ Hala Yàng Tom Trồ mìng la Yàng Tom Trồ làng bol Juda dê lơm ơ? Kung ò di la Yàng Tom Trồ làng bol bơdìh dê sơl ò ơ? Ơi, ngan behơ̆.

³⁰ Bơh Yàng Tom Trồ mìng dô nă lơm, la Bơtau rơp kòp la song ring cau kong siat gơltau in bơh bơta dòn, kung rơp kòp la song ring cau ò kong siat gơltau in bơh bơta dòn sơl.

³¹ Behơ̆, bol he tài bơh bơta dòn mơ lơh bơta boh lam gơlik gơs ò kwơ ơ? Ò di behơ̆ ò! Gơpơrlơ̆ wơl, bol he lơh kơ̆ nền bơta boh lam.