Rôma 2 - Sră Goh 2018

Bơta cahrña Yàng Tom Trồ dê

¹ Behơ̆, ơ cau ne, bulah mê la ñcau, kung ò geh tò să he; bơh mê cahrña di cau ndai bơh bơta lơi, gen kung lơh nền glài să tòm he in sơl, bơh mê cahrña di cau lơh bơta hơ̆, mơ mê kung lơh ală bơta behơ̆ sơl.

² Bol he git lah Yàng Tom Trồ la song ring tòm tŭ cahrña gơwèt mơ ală cau lơh tìs ală bơta behơ̆.

³ Ơ cau cahrña di ală cau neh tìs ală bơta behơ̆ mơ să tòm he kung lơh tìs sơl, behơ̆ mê kơlôi lah să tòm mê rơp geh pleh klàs di bơta cahrña Yàng Tom Trồ dê sơl ơ?

⁴ Hala mê sền òsơp nùs lơbơn niam, jak toh glài mơ kong ơt Kơnràñ dê ơ? Mơ mê ò git nùs lơbơn niam Yàng Tom Trồ dê lam mê lòt tus hơ bơta gơjrañ sang glài ò ơ?

⁵ Mơya nùs mê kră kơldang, ò bài gơjrañ sang glài, gen lơh is he in bơta gơhào gơjrañ tòm ngai gơjrañ dờng, tòm tŭ bơta cahrña song ring Yàng Tom Trồ dê geh ràng tơlik.

⁶ Bơh Yàng Tom Trồ rơp cahrña kòp nă cau in jat be broă bol khai lơh.

⁷ Cau lơi kơ̆ nùs lơh bơta niam, mơ jòi jat bơta gơklŏ, sền dờng màng mơ bơta ò ồm lề, gen Yàng Tom Trồ tơm wơl bol khai in bơta kis gam sùm sùm;

⁸ ai cau lơi gơs nùs tòmdră, ò bài dòn jat jơnau song, mơya jat bơta ò song ring, gen Yàng Tom Trồ rơp tuh hơđang bol khai bơta gơjrañ dờng mơ gơhào gơjrañ.

⁹ Bơta rung rài mơ bơta bòl glar jê sồt dùh hơđang kòp nă cau lơh bơta iơh bơsak, lài la cau Juda, tơnơ̆ tai la cau làng bol bơdìh;

¹⁰ mơya bơta gơklŏ, sền dờng màng, lơngap lơngai ai ală cau lơh bơta niam in, lài la cau Juda, tơnơ̆ tai la cau làng bol bơdìh.

¹¹ Bơh Yàng Tom Trồ ò sền òsơp di cau lơi.

¹² Ală cau làng bol bơdìh ò gơs bơta boh lam Môise dê mơ tìs glài, gen kung rơp roh rui tòm bơta ò gơs bơta boh lam; ai ală cau Juda gơs bơta boh lam mơ tìs glài gen rơp kòl bơta boh lam cahrña;

¹³ bơh di đap Yàng Tom Trồ ò di cau kơno bơta boh lam la cau song ring ò, mơya cau lơh jat bơta boh lam gen geh kòp la song ring.

¹⁴ Làng bol bơdìh la cau ò gơs bơta boh lam, mơya bol khai lơh is ală broă be bơta boh lam sồr, bol khai bulah ò gơs bơta boh lam, kung bơtào is bơta boh lam he in sơl.

¹⁵ Bol khai yal tơlik loh lah broă bơta boh lam dê neh cih tòm nùs bol khai, nùs tồr bol khai dê kung lơh cơng bơta do la ngan, ai bơta kơlôi bol khai dê ƀà cok glài he, ƀà tò să he.

¹⁶ Behơ̆ jat be jơnau niam añ bơto yal; tòm ngai hơ̆, Yàng Tom Trồ kơnòm di Yàng Jesu Krist rơp cahrña ală bơta kơlôi sơnơng ndơp ndơr kòn mơnus dê.

Cau Juda mơ bơta boh lam

¹⁷ Ai mê, mê sơnđan is he la cau Juda, sơnđìng hơđang bơta boh lam, jòng să bơh Yàng Tom Trồ;

¹⁸ mê git nùs kòñ Yàng Tom Trồ dê, bơh mê neh geh bơta boh lam bơto sồr nàng git bơta niam,

¹⁹ mơ dilah mê ngan la cau lam gùng cau jơngo in, la bơta àng cau ơm tòm tiah klam jơngo,

²⁰ la cau bơto cau bơrngơl, la cau bơto cau kơnòm in, mê git nền cê lah tòm bơta boh lam mê geh yal tơlik bơta git jak mơ jơnau song;

²¹ behơ̆, mê bơto cau ndai mơ mê ò bơto să tòm mê ơ? Mê bơto yal lah bañ kơñau, mơya mê kơñau ơ?

²² Mê đơs lah bañ tìs glài rềs àr bơrnàn, mơya mê tìs glài rềs àr bơrnàn ơ? Mê gơjrañ di rùp ràk, mơya mê kơñau ală phan tòm hìu duh khoai rùp ràk ơ?

²³ Mê jòng să bơh bơta boh lam, mơya mê lơh tìs mơ bơta boh lam, mơ lơh roh bơta gơklŏ Yàng Tom Trồ dê ơ?

²⁴ Be jơnau Sră Goh cih lah: Tài bơh bol mê la cau Juda mơ sơnđan Yàng Tom Trồ, gơkòl đơs tràl sơrbil digùl ală làng bol bơdìh.

²⁵ Ngan behơ̆, dilah mê lơh jat bơta boh lam, gen bơta siat gơltau gơlik gơs kwơ; ai dilah mê lơh tìs mơ bơta boh lam, gen bơta siat gơltau mê dê kung be ò.

²⁶ Behơ̆, dilah làng bol bơdìh ò kong siat gơltau prap gàr ală bơta sồr bơta boh lam dê, gen Yàng Tom Trồ ò di kòp bol khai be neh kong siat gơltau ò ơ?

²⁷ Cau ò kong siat gơltau mơ lơh jat bơta boh lam, gen rơp cahrña di mê la cau bulah neh gơs sră bơta boh lam siat gơltau, mơya lơh tìs mơ bơta boh lam.

²⁸ Bơh cau lơi la cau Juda đah bơdìh, gen ò di la cau Juda ngan, ai bơta siat gơltau di poac să đah bơdìh, kung ò di la bơta siat gơltau ngan.

²⁹ Mìng cau Juda đah dơlam sồng la cau Juda ngan, bơta siat gơltau tòm nùs sồng la bơta siat gơltau ngan, ơm tòm hwềng nùs bơh Yàng Hwềng. Cau hơ̆ geh jòng ro ngan, ò di bơh kòn mơnus mơya bơh Yàng Tom Trồ.