Rôma 13 - Sră Goh 2018

Gơwèt mơ cau gơnoar at bồ

¹ Kòp nă cau pal dòn duh tĕ cau gơs gơnoar at bồ he, bơh ò gơs gơnoar lơi la ò tus bơh Yàng Tom Trồ, ală gơnoar at bồ hơ̆ la bơh Yàng Tom Trồ bơtào gơs.

² Gen tàng cau lơi tòmdră mơ ală cau gơs gơnoar, hơ̆ la tòmdră mơ gơnoar sồr Yàng Tom Trồ dê; mơ ală cau sòdră hơ̆ rơp kong àñ bơta lơh glài he in.

³ Bơh ală kwang bàng ò di lòi cau lơh broă niam in rngòt ò, mơya la lòi cau iơh bơsak in rngòt. Mê kòñ ò rngòt di ală cau gơs gơnoar sơl? Lơh tĕ ală broă niam, mơ mê rơp geh jòng ro;

⁴ bơh bol khai la cau duh broă Yàng Tom Trồ dê, nàng lơh gơs kwơ mê in. Mơya dilah mê lơh iơh gen rngòt tĕ, bơh khai at đào ò di la ò kwơ ò; khai la cau duh broă Yàng Tom Trồ dê, hơ̆ la cau sal wơl bơta gơjrañ dờng di cau lơh bơta iơh bơsak.

⁵ Behơ̆, tàng pal dòn duh, ò di mìng rngòt di bơta gơjrañ dờng lơm, mơya kung tài bơh nùs tồr sơl.

⁶ Gen kung bơh jơnau hơ̆ sơl tàng oh mi boh dia, bơh ală kwang bàng la cau duh broă Yàng Tom Trồ dê, òs lơh sir broă hơ̆.

⁷ Tơm tĕ bol khai in bơta he pal tơm; boh dia tĕ di cau he pal boh dia; tă dia tĕ di phan lơi he pal tă; rngòt tĕ di cau he pal rngòt; ki ngàm tĕ di cau he pal ki.

Nùs kòñ gơboh lơh wil tơl bơta boh lam

⁸ Bañ kòl dồs mơ cau lơi, mìng kòl dồs bơh bơta kòñ gơboh bal lơm, bơh cau lơi kòñ gơboh di cau gơp ƀòn he dê hơ̆ la neh lơh wil tơl bơta boh lam.

⁹ Mơ tai, ală bơta sồr lam la be do: “Mê bañ tìs glài rềs àr bơrnàn, bañ tơnchơt cau, bañ ntung kơñau, bañ hàm hà,” mơ ală bơta sồr lam ndai gen tơrgòm wơl tòm dô jơnau do: “Mê kòñ gơboh tĕ di cau gơp ƀòn he be he”

¹⁰ Bơta kòñ gơboh ò lơh iơh di cau gơp ƀòn he; behơ̆ bơta kòñ gơboh lơh wil tơl bơta boh lam.

Pal drơng kơp mơ ơm sàng goh

¹¹ Lơh tĕ behơ̆, bơh oh mi git tŭ tơngai do la tŭ oh mi pal guh, bañ bic tai; bơh tŭ do bơta dong klàs neh rềp mơ bol he rlau mơ tŭ bol he pa dòn òr.

¹² Mơnang mòr jơh, tơngai mòr tus; behơ̆ bol he hồ sang tĕ ală broă klam jơngo mơ soh ală phan tòmlơh bơta àng dê.

¹³ Lơh lòt tĕ dô bă song be digùl ngai. Bañ ñô sa bơñul lơmbè mơ rui ràm, dri tơlàr mơ lơh gơlềng gơlàng, tòm pơndang bal mơ ƀoah gơjrañ.

¹⁴ Mơya dòp soh tĕ Yàng Jesu Krist, bañ rcang đah poac să nàng lơh jat bơta hàm kòñ is gơ dê.