Rôma 10 - Sră Goh 20181 Ơ oh mi, bơta kơp kòñ tòm nùs añ mơ bơta añ hòi dan mơ Yàng Tom Trồ, hơ̆ la tồ làng bol Israel in geh dong klàs. 2 Bơh añ lơh cơng bơh bol khai lah bol khai gơs nùs ngac ngar bơh Yàng Tom Trồ, mơya ò di jat mơnàng bơta git jak ngan. 3 Bơh bol khai ò dòp git bơta song ring Yàng Tom Trồ ai, mơ jòi bơtào bơta song ring is he dê, gen tàng ò bài dòn duh bơta song ring Yàng Tom Trồ dê; 4 bơh Bơtau Krist la bơta lồi dut bơta boh lam dê, nàng kòp nă cau dòn geh kòp la song ring. Bơta dong klàs tơl nă cau in 5 Môise cih lah dilah cau lơi lơh jat bơta song ring bơta boh lam dê, gen bơh hơ̆ mơ kis. 6 Mơya bơta song ring bơh bơta dòn gen đơs be do: “Bañ đơs tòm nùs mê lah: ‘Ñcau rơp guh hơ trồ taih?’ hơ̆ la nàng cèng tơmù Bơtau Krist; 7 hala ‘Ñcau rơp mù tòm brong jrô hùt hung taih?’ hơ̆ la nàng cèng tơngguh Bơtau Krist bơh tòm bơta chơt.” 8 Mơya mbe jơnau hơ̆ đơs taih? “Jơnau do ơm rềp mơ bol mê, Ơm di bơr mơ tòm nùs bol mê.” Hơ̆ la jơnau bơta dòn mơ bol he bơto yal. 9 Behơ̆ dilah bơr mê yal tơlik Yàng Jesu la Yàng, mơ nùs mê dòn lah Yàng Tom Trồ neh lơh Kơnràñ in kis wơl bơh bơta chơt, gen mê rơp geh dong klàs: 10 Bơh cau lơi ai nùs dòn gen geh bơta song ring, cau lơi ai bơr yal tơlik gen geh bơta dong klàs. 11 Sră Goh đơs lah: “Cau lơi dòn di Kơnràñ gen rơp ò roh bơta gơn kơnòm.” 12 Bơh digùl cau Juda mơ cau Grek ò gơs bơta lơi cah is, bơh Yàng la Yàng jơh tơl nă cau in, Kơnràñ ai pà tơngkah tơngkañ kòp nă cau hòi dan di Kơnràñ. 13 Bơh “cau lơi hòi dan di sơnđan Yàng gen rơp geh dong klàs.” 14 Mơya bol khai òhềt dòn Kơnràñ gen mbe rgơi hòi dan taih? Òhềt kơno đơs bơh Kơnràñ, gen mbe rgơi dòn taih? Dilah ò gơs cau bơto yal gen mbe rgơi kơno taih? 15 Mơ dilah ò gơs cau geh sồr lòt, gen mbe rgơi bơto yal taih? Be neh cih lah: “Ală mpàng jơng cau bơto yal Jơnau Niam la hàng mơnĕ ò git lơh!” 16 Mơya ò di kòp nă cau neh kơno Jơnau Niam mơ dòn jat lơm ò; bơh Esai neh đơs lah: “Ơ Yàng, ñcau dòn jơnau bol hi bơto taih?” 17 Behơ̆ bơta dòn tus bơh bơta kơno, mơ bơta kơno tus bơh jơnau Bơtau Krist geh bơto yal. 18 Mơya añ lùp lah: Bol khai òhềt kơno ơ? Ngan neh kơno rau, “Jơnau ntas bol khai dê neh pơnro làm ù, Mơ jơnau bol khai dê neh gơyal tơlik làm jơh dunnia.” 19 Añ lùp tai lah: Làng bol Israel òhềt git wă ơ? Lài òr Môise neh đơs lah: “Añ rơp ngui cau ò di la làng bol nàng chồl nùs ală bol mê ƀoah; Añ rơp ngui dô nơm làng bol bơrngơl gơla nàng bơrcek lơh ală bol mê in gơjrañ.” 20 Mơ tai, Esai đơs dô bă khin cha lah: “Ală cau ò jòi jat Añ gen neh bàn Añ, Añ neh tơlik să di cau ò lùp jòi Añ.” 21 Mơya bơh làng bol Israel gen khai đơs lah: “Añ neh pò tê ngai mho gơwèt hơ làng bol ò dòn bơr mơ jak pơndang.” |
© 2018 United Bible Societies. All rights reserved.
Bible Society Vietnam