Rôma 1 - Sră Goh 2018

Bơta dong tơwài kơnòm bơh bơta dòn ( 1:1-17 ) Jơnau Còp să

¹ Pol, dĭ gơna Yàng Krist Jesu dê, geh Yàng Tom Trồ hòi sac lơh gơs cau gơnoar bơto dờng, ơn is nàng bơto Jơnau Niam Yàng Tom Trồ dê,

² la Jơnau Niam mơ Yàng Tom Trồ neh ho pơgon bơh lài kơnòm ală cau gơnoar hwơr Kơnràñ dê, be neh cih tòm Sră Goh.

³ Hơ̆ la Jơnau Niam bơh Kòn Kơnràñ, Yàng Jesu Krist la Yàng bol he dê, jat poac să geh deh bơh jơi bơtiàn Dabit dê,

⁴ jat hwềng bơta sàng goh dê, Kơnràñ geh ràng tơlik tòm gơnap gơnoar dờng ngan, geh kòp la Kòn Yàng Tom Trồ dê tòm bơta kis wơl bơh bơta chơt.

⁵ Kơnòm di Kơnràñ bol hi neh dòp geh bơta nđàc mơ gơnoar bơto dờng, tồ bơh Yàng Jesu Krist mơ lam jơh ală làng bol lòt tus hơ bơta dòn bơr mơ bơta dòn.

⁶ Kung bal mơ oh mi la ală cau ơm tòm Rôma, ală cau geh Yàng Tom Trồ hòi sac nàng gơrê hơ Yàng Jesu Krist.

⁷ Behơ̆, añ pơyoa jơh tơl nă cau kòñ gơboh Yàng Tom Trồ dê tòm ƀòn Rôma, neh geh hòi sac nàng gơlik gơs cau ơn is Kơnràñ dê. Dan Yàng Tom Trồ la Bèp bol he dê mơ bơh Yàng Jesu Krist ai bơta nđàc mơ bơta lơngap lơngai oh mi in.

Jơnau hòi dan mơ ưnngài

⁸ Sơnròp ngan, añ kơnòm di Yàng Jesu Krist mơ ưnngài Yàng Tom Trồ añ jê bơh jơh ală oh mi, bơh bơta dòn oh mi dê neh pơnro làm jơh dunnia.

⁹ Yàng Tom Trồ la Bơtau mơ añ jơh nùs nàng duh broă tòm bơta bơto yal Jơnau Niam bơh Kòn Kơnràñ dê, lơh cơng añ in lah añ kah sùm oh mi tòm kòp dơ̆ añ hòi dan.

¹⁰ Añ òs dan mơ Yàng Tom Trồ jat nùs kòñ Kơnràñ dê, pò gùng añ in gơs tŭ tơngai nàng lòt tus hơ oh mi.

¹¹ Bơh añ kơp kòñ ngan lòt còp oh mi nàng tòmpà oh mi in bơta ai gòi đah hwềng, tồ oh mi in geh kơ̆ nền,

¹² hơ̆ la nàng bol he rgơi dong kòl bal mơ gơp bơh bơta dòn bol he dê, hơ̆ la oh mi dê mơ añ jê sơl.

¹³ Ơ oh mi, añ kòñ oh mi git lah oă dơ̆ añ kòñ lòt còp oh mi, nàng dòp cồng nha tòm oh mi kung be tòm làng bol bơdìh ndai sơl, mơya jơl tus di tŭ do añ gam kòl kơryan.

¹⁴ Añ kòl dồs mơ ală cau Grek mơ ală cau ò git jơnau, kòl dồs mơ ală cau jak chài mơ ală cau tùl gơla.

¹⁵ Behơ̆ gen, añ jơh nùs jơh pràn rcang sir nàng bơto yal Jơnau Niam oh mi in, la cau ơm tòm ƀòn Rôma sơl.

Gơnap gơnoar Jơnau Niam dê

¹⁶ Ngan behơ̆, añ ò ƀàssìl bơh Jơnau Niam ò, bơh la gơnap gơnoar Yàng Tom Trồ dê nàng dong klàs kòp nă cau dòn, lài la cau Juda, tơnơ̆ la cau Grek.

¹⁷ Tòm Jơnau Niam do, bơta song ring Yàng Tom Trồ dê geh ràng tơlik bơh bơta dòn tus hơ bơta dòn, be neh cih lah: “Cau song ring rơp kis bơh bơta dòn.”

Tồi glài kòn mơnus dê mơ bơta cahrña Yàng Tom Trồ dê ( 1:18 – 3:20 ) Tồi glài kòn mơnus dê

¹⁸ Bơta gơjrañ dờng Yàng Tom Trồ dê bơh đang trồ geh yal tơlik sò tơm di jơh ală bơta ò duh rngòt mơ ală bơta iơh bơsak kòn mơnus dê, hơ̆ la ală cau òs ngui bơta iơh bơsak nàng kup bơklơn jơnau song.

¹⁹ Bơh ală bơta cau rgơi git bơh Yàng Tom Trồ gen neh loh làng bol khai in, tài bơh Yàng Tom Trồ neh yal tơlik bơta hơ̆ bol khai in rau.

²⁰ Ală bơta bơh Yàng Tom Trồ mơ mat òs ò rgơi gŏ, hơ̆ la gơnap gơnoar gam sùm sùm mơ nùs Yàng Kơnràñ dê, bơh dê tŭ crơng gơs trồ tiah kòn mơnus neh đal git loh làng ngan, tòm tŭ sền sơwì ală phan neh geh crơng gơs Kơnràñ dê, gen tàng bol khai ò rgơi tò să he.

²¹ Bơh bulah bol khai git Yàng Tom Trồ, mơ kung ò bài jòng ro mơ ưnngài Kơnràñ sơl, mơya kư̆ tìs nrah tòm ală bơta kơlôi sơnơng mơ nùs tùl gơla bol khai dê gơlik klam jơngo.

²² Bol khai sơnđan is să he la jak chài, mơya gơlik gơs tùl gơla.

²³ Bol khai neh tòmgơl bơta gơklŏ Yàng Tom Trồ dê ò ồm lề mơ ai rùp să jơi kòn mơnus dê òs ồm lề, hala ală sềm, ală phan poan jơng, mơ ală phan wìn nsròng dê.

²⁴ Gen tàng Yàng Tom Trồ neh phi bol khai gơtơmut jat nùs hàm kòñ is bol khai dê, tian gơs gơdùh tòm bơta ngkòr ngkàc nàng lơh ƀàssìl să jan bol khai dê mơ cau ndai,

²⁵ bơh bol khai neh tòmgơl jơnau song Yàng Tom Trồ dê mơ dòp bơta blac chừt, duh khoai mơ duh broă ală phan neh geh crơng gơs ala Bơtau Crơng Gơs, la Bơtau pal jòng ro gam sùm sùm! Amen.

²⁶ Tài bơh hơ̆ tàng Yàng Tom Trồ neh phi bol khai tòm bơta hàm kòñ lơh tir ƀàssìl ƀàsso; bơh ală cau ùr bol khai dê neh tòmgơl bơta òs mòng gơwèt mơ cau klau gơlik gơs tòmdră mơ bơta òs mòng hơ̆,

²⁷ Ală cau klau kung behơ̆ sơl, sang bơta gơwèt òs mơ cau ùr, chồl pơrguc nùs hàm kòñ lơh tir cau do mơ cau ne, cau klau ndring cau klau gơtơmut tòm bơta ƀàssìl ƀàsso, mơ să tòm bol khai pal kong lơh glài di pal mơ bơta tìs glài he dê.

²⁸ Tài bơh bol khai ò bài đal git Yàng Tom Trồ, gen tàng Yàng Tom Trồ neh lòi bol khai jat bơta kơlôi roh lơm, mơ lơh ală bơta ò di pal lơh.

²⁹ Bol khai bềng lìu jơh ală bơta ò song ring, iơh bơsak, hàm hà, bih khih, bềng nùs ƀoah gơjrañ, tơnchơt cau, tòmpìt tòmhà, lac lèo, iơh rmơh,

³⁰ đơs joh, jak đơs iơh, gơjrañ kơuềng di Yàng Tom Trồ, sơrdă sơrdơu, pơnhừ să, jòng să, jak jòi jơnau iơh bơsak, ò bài dòn bơr mè bèp,

³¹ bơrngơl gơla, ò lơh jat jơnau ho bal, ò gơs nùs kòñ gơboh bal be òs, ò gơs nùs kòñ nđàc.

³² Bulah bol khai neh git làm bơta boh lam Yàng Tom Trồ dê neh lơh nền lah ală cau tìs ală glài behơ̆ la pal chơt, mơya bol khai ò di mìng lơh tìs să tòm bol khai lơm, mơ kung dô nùs kòñ cau ndai lơh ală bơta hơ̆ sơl.