Nehemi 9 - Sră Goh 2018

Làng bol yal glài. Ală cau Lebi hòi dan

¹ Tòm ngai bàr jơt poan kơnhai hơ̆, làng bol Israel pơjum bal ơt sa soh ào ƀào, rsìh kơmbuh ù hơđang bồ bol khai dê.

² Gen ală cau Israel cah is să tòm bol khai bơh di ală cau làng bol bơdìh, ntào yal glài să tòm bol khai mơ ală bơta tồi glài mò pàng bol khai dê.

³ Bol khai ntào tòm tiah bol khai dê mơ sền sră bơta boh lam Yàng Jehôwa Yàng Tom Trồ bol khai dê, tòm dô pơnah poan ngai dê, mơ tòm dô pơnah poan ndai bol khai yal glài mơ duh khoai Jehôwa Yàng Tom Trồ bol khai dê.

⁴ Gen Jesua, Bani, Katmiel, Sebaniah, Bunni, Serebiah, Bani mơ Kenani ntào hơđang kơnă ntùng ală cau Lebi dê mơ hòi driau dờng jơnau mơ Jehôwa Yàng Tom Trồ bol khai dê.

⁵ Gen ală cau Lebi la Jesua, Katmiel, Bani, Hasapneiah, Serebiah, Hôdiah, Sebaniah, mơ Pethahiah đơs lah: “Ntào tĕ, jòng ro Jehôwa Yàng Tom Trồ bol mê dê, la bơtau gam sùm kòp rài. Pal jòng ro sơnđan gơklŏ Kơnràñ dê, sơnđan hơ̆ geh yò tơngguh jơnhoa rlau mơ jơh ală bơta lơngai, mơ jòng ro.”

⁶ Ơ Yàng, mìng dô nă Kơnràñ la Jehôwa. Kơnràñ neh crơng gơs tap trồ, ală tap trồ jơnhoa rlau jơh, bal mơ ală sơmañ, ù mơ ală phan hơđang gơ, dàlềng mơ jơh ală phan tòm gơ. Kơnràñ prap gàr jơh ală phan. Jơh ală mpồl ling hơđang trồ duh khoai Kơnràñ.

⁷ Kơnràñ la Jehôwa Yàng Tom Trồ neh sac rwah Abram mơ lam khai lik bơh ƀòn Ur tòm lơgar Kalde, tơmoh sơnđan khai la Abraham.

⁸ Kơnràñ neh gŏ khai gơs nùs dòn song di đap Kơnràñ, mơ neh bơtào dô bơta ho bal mơ khai nàng ai jơi bơtiàn khai in ală lơgar làng bol Kanaan, làng bol Hetit, làng bol Amôr dê, làng bol Peres, làng bol Jebusit, mơ làng bol Girgas dê. Kơnràñ neh lơh gơlik di ngan ală jơnau Kơnràñ neh ho, tài bơh Kơnràñ la song ring.

⁹ Kơnràñ neh gŏ bơta bòl glar mò pàng bol he dê tòm lơgar Ejiptơ, mơ neh kơno ală jơnau driau nggà bol khai dê di gah Dàlềng Pơrhê,

¹⁰ mơ neh lơh ală tềl is mơ ală bơta crih crài tòmdră mơ Pharaôn, ală cau duh broă khai, mơ jơh làng bol khai dê; bơh Kơnràñ git lah bol khai neh gơwèt mơ mò pàng bol hi dô bă pơnhừ să. Kơnràñ neh lơh sơnđan Kơnràñ gơs tiơng pơnro jơl tus ngai do.

¹¹ Kơnràñ neh cah dàlềng di đap mò pàng bol hi, lòi bol hi tiă dàlềng hơđang ù rañ rsơh. Mơya Kơnràñ neh sơrbì ală cau ting jat bol khai tòm cìr jrô, kung be sơrbì dô nơm lŭ tòm dà dờng.

¹² Tòm trồ ngai, Kơnràñ neh ngui dô nơm jrong mhwal nàng lam bol khai. Mơ tòm trồ mang, Kơnràñ neh ngui dô nơm jrong ồs nàng sòl gùng bol khai pal lòt.

¹³ Kơnràñ kung neh mù hơđang mơnơm Sinai tòmbơhbơr mơ bol khai bơh đang trồ, ai bol khai in ală bơta sồr lam, bơta boh lam di pal mơ song ring, bơta lơh nền mơ jơnau gơnoar sồr niam ngan.

¹⁴ Kơnràñ neh yal bol khai in git ngai rlô sàng goh Kơnràñ dê, ai bol khai in ală bơta gơnoar sồr, bơta lơh nền mơ bơta boh lam. Gan di Môise cau duh broă Kơnràñ.

¹⁵ Kơnràñ neh ai bol khai in sa piang lă bơh trồ tŭ bol khai jơgloh; tòm tŭ bol khai tơhìr lơh dà lik bơh lŭ nàng ai bol khai in hùc; mơ kung neh sồr bol khai mut dòp ù tiah mơ Kơnràñ neh ho ai bol khai in.

¹⁶ Mơya mò pàng bol hi lơh lòt dô bă pơnhừ, kơldang bồ, ò iat ală bơta sồr lam Kơnràñ dê,

¹⁷ bol khai ò bài dòn bơr mơ kung ò kah ală broă crih crài mơ Kơnràñ neh lơh digùl bol khai. Mơya tòm bơta pơrlơ̆ dră bol khai dê, neh sac rwah dô nă cau nàng lam bol khai rê wơl hơ tiah ơm dĭ bol khai dê. Mơya Kơnràñ la Yàng Tom Trồ rcang sir nàng toh glài, gơs bơta nđàc mơ bơta nđàc sơngit, òbat gơhào gơjrañ mơ bềng bơta kòñ gơboh. Kơnràñ neh ò sang lòi bol khai.

¹⁸ Bulah tòm tŭ bol khai neh tŏ dô nơm kơnrồ dam mơ đơs lah: do la yàng bol mê dê neh lam bol mê lik bơh di lơgar Ejiptơ; Mơ neh đơs tràl sơrbil di Yàng kơnjơ̆ ngan;

¹⁹ Bơh tòm bơta nđàc sơngit dờng Kơnràñ ò sang lòi bol khai tòm ƀlàng ngềt ngơt; jrong mhwal lam gùng ò sang lòi bol khai tòm trồ ngai, jrong ồs sòl tòm trồ mang lam bol khai lòt tòm gùng bol khai pal lòt.

²⁰ Kơnràñ kung ai bol khai in Hwềng lơbơn niam nàng bơto bol khai. Mơ ò lơh sềt pơniă ai bol khai in sa mana, mơ dà bol khai in nàng hùc rài tơhìr.

²¹ Tòm poan jơt nam Kơnràñ neh ròng bol khai tòm ƀlàng ngềt ngơt, bol khai ò siơ̆u phan lơi; ồi ào ò sèt, mơ jơng bol khai ò as ur.

²² Mơ tai Kơnràñ neh ai bol khai in ală lơgar mơ ală làng bol, mơ tòmpà bol khai in tus lồi nhàr lơgar hơ̆ bol khai in. Bol khai dòp geh lơgar Sihôn bơtau Hesbôn dê, mơ lơgar Ok bơtau Basan dê.

²³ Kơnràñ kung neh bơtơl kòn sau bol khai gơs oă be sơmañ hơđang trồ, mơ neh jun bol khai mut tòm lơgar mơ Kơnràñ neh ho ai mò pàng in lơh gơs phan jơtài.

²⁴ Behơ̆ gen, kòn sau bol khai neh mut mơ dòp geh lơgar, mơ Kơnràñ neh lơh alah ală cau Kanaan di đap bol khai, neh jào bol khai in ală cau hơ̆ bal mơ ală cau bơtau bol khai dê, mơ ală làng bol bol khai dê nàng bol khai lơh ală làng bol hơ̆ in jat be nùs kòñ.

²⁵ Bol khai brồ ai ală ƀòn kơ̆ cê, ală mìr sre niam ngan, dòp geh ală hìu lìu làc ală phan niam. Ală tơrlung neh geh tò, ală suơn ño, ală suơn ôlibe, mơ oă ngan chi gơs plai. Behơ̆ bol khai sa gơs hòm, gơlik lơmă, mơ hừh nùs tòm bơta lơbơn niam Kơnràñ dê.

²⁶ Bulah behơ̆, bol khai ò dòn bơr, sòdră di Kơnràñ, sang lòi bơta boh lam Kơnràñ dê, tơnchơt ală cau gơnoar hwơr Kơnràñ dê, la ală cau neh yal tơnggit bol khai in, nàng lam bol khai rê wơl hơ Kơnràñ. Bol khai neh lơh oă bơta tràl sơrbil.

²⁷ Tài bơh hơ̆, Kơnràñ neh jào bol khai tòm tê cau sò tơm bol khai dê. Gen cau sò tơm hơ̆ rồn bơklơn bol khai. Mơ tòm tŭ kòl tòm bơta jê sồt bòl glar gen bol khai neh rac dan mơ Kơnràñ. Bơh đang trồ Kơnràñ neh kơno bol khai, mơ jat bơta nđàc dờng Kơnràñ dê, gen Kơnràñ sồr ală cau dong klàs tus nàng dong tă bol khai klàs bơh di ală cau sò tơm bol khai dê.

²⁸ Mơya tòm tŭ bol khai neh geh bơta ring lơngai rau, gen bol khai neh lơh wơl ală bơta iơh bơsak di đap Kơnràñ, gen tàng Yàng neh phi bol khai tòm tê cau sò tơm nàng cau sò tơm at bồ bol khai. Mơya tòm tŭ bol khai neh rac dan mơ Kơnràñ gen Kơnràñ neh kơno bơh đang trồ, mơ tài bơh nùs kòñ nđàc Kơnràñ dê gen Kơnràñ neh dong klàs bol khai oă dơ̆.

²⁹ Kơnràñ kung neh pơrhơng nàng lam bol khai rê wơl hơ bơta boh lam Kơnràñ dê. Bulah behơ̆, bol khai neh lơh lòt dô bă pơnhừ să, ò lơh jat ală gơnoar sồr Kơnràñ dê, tìs glài mơ bơta sồr lam mơ dilah cau lơi lơh jat bơta hơ̆ gen khai geh kis. Bol khai kơldang nùs wèt ngkòi hơ Kơnràñ, kơldang bồ mơ ò bài dòn bơr.

³⁰ Kơnràñ kong bol khai tòm oă nam, mơ hwềng Kơnràñ dê ơm hơđang ală cau gơnoar hwơr nàng lah pơrhơng bol khai; mơya bol khai ò bài wèt tồr iat. Gen tàng Kơnràñ neh jào bol khai tòm tê ală làng bol gùt dar dê.

³¹ Mơya tài bơh nùs nđàc sơngit dờng ngan Kơnràñ dê gen Kơnràñ neh ò tơnroh bol khai, kung ò sang bol khai sơl; tài bơh Kơnràñ la Yàng Tom Trồ kòñ nđàc mơ nđàc sơngit.

³² Behơ̆ tŭ do, Ơ Yàng Tom Trồ bol hi dê, la Yàng Tom Trồ dờng ngan, gơnap gơnoar, mơ pal rngòt, Bơtau lơh jat bơta ho bal kòñ gơboh, dan Kơnràñ bañ sền nggòc ală bơta jê sồt bòl glar neh tus hơ bol hi, hơđang ală cau bơtau mơ ală kwang bàng, hơ ală cau gơnoar ơn phan duh khoai mơ ală cau gơnoar hwơr, hơ ală mò pàng bol hi, mơ jơh làng bol Kơnràñ dê, bơh rài ală bơtau Asiri tus tŭ do.

³³ Tòm kòp bơta neh gơlik bol hi in, Kơnràñ ngan song ring; tài bơh Kơnràñ lơh dô bă dòn song ai bol hi neh lơh bơta iơh bơsak.

³⁴ Ală cau bơtau bol hi dê, ală kwang bàng, ală cau gơnoar ơn phan duh khoai, mơ mò pàng bol hi dê ò lơh jat bơta boh lam Kơnràñ dê, kung ò iat ală gơnoar sồr mơ ală bơta bơto tơnggit mơ Kơnràñ neh ai bol khai in.

³⁵ Bulah ơm tòm lơgar tòm bol khai dê, mơ tòm bơta nđàc dờng mơ Kơnràñ neh ai bol khai in, tòm ù ơnàng mơ niam bơkah mơ Kơnràñ neh ai bol khai in, bol khai ò duh broă Kơnràñ mơ ò sang lòi broă iơh bơsak bol khai dê.

³⁶ Do, ngai do bol hi gơs dĭ; gơs dĭ tòm lơgar Kơnràñ neh ai mò pàng bol hi in nàng bol khai geh sa ală plai mơ ală cồng nha niam gơ dê.

³⁷ Bơta gơlik cồng nha tơngkah tơngkañ neh gơrê mơ ală bơtau mơ Kơnràñ neh bơtào hơđang bol hi, tài bơh tồi glài bol hi dê. Bol khai gơs gơnoar hơđang să bol hi mơ hơđang ală phan poan jơng bol hi dê jat nùs bol khai kòñ. Bol hi ơm tòm bơta bòl glar ngan.

Bơta bơt bơtào bơta ho bal mơ Yàng Tom Trồ

³⁸ Tài bơh jơh ală bơta do, bol hi bơtào dô bơta ho bal kơ̆ ngan, mơ bol hi cih gơ; ală kwang bàng, ală cau Lebi, mơ ală cau gơnoar ơn phan duh khoai bol hi dê tap ƀang kì di gơ.