Nehemi 1 - Sră Goh 2018

Jơnau hòi dan Nehemi dê làng bol Israel in

¹ Do la jơnau đơs Nehemi kòn klau Hakalia dê. Tòm kơnhai Kislep, tòm nam dơ̆ bàr jơt, tòm tŭ añ ơm tòm ƀòn dờng Susa,

² dô nă tòm oh mi añ la Hanani, tus bal mơ bàr pe nă cau ndai bơh lơgar Juda, gen añ lùp bol khai bơh ală cau Juda gam wơl klàs bơh bơta kup jàm mơ bơh Jerusalem.

³ Bol khai yal mơ añ lah: “Ală cau hơ̆ gam wơl tòm ƀòn dờng neh klàs bơh bơta kup cèng, gen bol khai kòl bơta bòl glar kalke dờng ngan mơ bơta ƀàssìl; mơ dơrñang Jerusalem dê neh tơrlah jơh mơ ală mpồng gơ neh kong tơnroh bơh ồs.”

⁴ Tòm tŭ añ kơno ală jơnau hơ̆ gen añ nggui ñìm mơ moat jrùng bàr pe ngai, ơt sa, mơ hòi dan mơ Yàng Tom Trồ hơđang trồ dê.

⁵ Añ hòi dan be do: “Ơ Jehôwa Yàng Tom Trồ hơđang trồ dê, Yàng Tom Trồ dờng mơ pal duh rngòt, Bơtau prap gàr bơta ho bal mơ gơs nùs kòñ gơboh kơ̆ dơn gơwèt mơ ală cau kòñ gơboh di Kơnràñ mơ prap gàr bơta sồr lam Kơnràñ dê,

⁶ Añ dan Yàng wèt tồr iat, pò mat Kơnràñ dê, iat jơnau hòi dan cau duh broă Kơnràñ dê, mơ tŭ do añ hòi dan di đap Kơnràñ sùm ngai mơ mang ală dĭ gơna Kơnràñ in la làng bol Israel. Yal ală tồi glài ală làng bol Israel dê, la ală tồi glài bol hi neh tòmdră mơ Kơnràñ. Tồi glài să tòm añ mơ hìu nhă añ neh tìs glài.

⁷ Bol hi neh lơh bơta tìs mơ Yàng oă ngan, ò lơh jat bơta sồr lam, bơta sơnio lam mơ bơta boh lam Kơnràñ dê, mơ Kơnràñ neh sồr Môise, dĭ gơna Kơnràñ dê.

⁸ Dan kah jơnau Kơnràñ neh sồr Môise, dĭ gơna Kơnràñ dê lah: ‘Dilah bol mê ò dòn song, gen Añ rơp rsìh bol mê digùl ală làng bol.

⁹ Mơya dilah bol mê rê wơl hơ Añ mơ prap gàr ală bơta sồr lam Añ jê, mơ lơh jat; bulah bol mê kòl sơrbì hơ jơng trồ ngài rlau jơh, gen Añ rơp tơrgòm bol khai bơh tềng hơ̆, mơ lam bol khai rê tus hơ tiah Añ neh sac rwah nàng bơtào kơ̆ sơnđan Añ jê.’

¹⁰ Bol khai la cau duh broă Kơnràñ dê mơ làng bol Kơnràñ dê; Kơnràñ neh dong tơwài bơh gơnap gơnoar dờng Kơnràñ dê mơ bơh tê pràn kơldang Kơnràñ dê.

¹¹ Ơ Yàng Jehôwa, dan iat jơnau hòi dan dĭ gơna Kơnràñ dê mơ jơnau hòi dan ală cau hòn chò duh rngòt di sơnđan Kơnràñ. Dan ai bơta bơtoah bơtoài cau duh broă Kơnràñ in tòm ngai do, mơ ai cau bơtau in gơs nùs nđàc sơngit di đap añ do.” Mơ tai, tŭ hơ̆ añ la cau yò ñô bơtau in.