Nahum 1 - Sră Goh 2018

Bơta gơjrañ Yàng Jehôwa dê gơwèt hơ Ninibe

¹ Dô jơnau đơs hwơr bơh Ninibe. Sră cih bơh bơta gơtơnggŏ Nahum cau Elkôs dê.

² Yàng Jehôwa la Yàng Tom Trồ ƀoah pơrñat mơ sal tê; Yàng Jehôwa sal tê mơ bềng bơta gơjrañ dờng. Yàng Jehôwa sal tê di ală cau sò tơm di Kơnràñ mơ gơjrañ dờng tòmdră mơ ală cau sò tơm di Kơnràñ.

³ Yàng Jehôwa òbat gơjrañ mơ gơs gơnap gơnoar dờng; Yàng Jehôwa ò lòi cau tìs glài ò kong lơh glài. Gùng lòt Kơnràñ dê la tòm càl rwac mơ càl rbut dờng, mơ ală puk mhwal la thul hơđơm jơng Kơnràñ dê.

⁴ Kơnràñ lah pơrhơng dàlềng mơ lơh gơ in ro rañ; Kơnràñ lơh jơh ală hiòng soat dà. Basan mơ Karmel ñòp ro, mơ bơkào Liban dê ro jrùh.

⁵ Ală mơnơm gơlơnggơr di đap Kơnràñ mơ ală dòr lề lac. Plai ù gơlơnggơr di đap mat Kơnràñ, lơgar dunnia bal mơ jơh ală làng bol ơm tòm hơ̆.

⁶ Ñcau rgơi ntào jai di đap bơta gơhào gơjrañ Kơnràñ dê taih? Ñcau rgơi kong jai bơta gơhào khuh gơjrañ Kơnràñ dê taih? Bơta gơjrañ dờng Kơnràñ dê gơhòr lik be ồs; ală pơnai lŭ bơcah lề di đap Kơnràñ.

⁷ Yàng Jehôwa la niam, la theng kơ̆ cê tòm ngai bòl glar. Kơnràñ sền gàr ală cau in kìng crŭ di Kơnràñ.

⁸ Tian gơs tòm dà kŏ hòr pơrdô, Kơnràñ rơp tơnlồi jơh ală cau sò tơm Kơnràñ dê, mơ Kơnràñ rơp ting jat ală cau sò tơm Kơnràñ dê tus tòm bơta klam jơngo.

⁹ Ñchi bơh tài bol mê bơtào kai gơrmơ̆i tòmdră mơ Yàng Jehôwa taih? Kơnràñ rơp tơnlồi jơh; ò gơs cau sò tơm lơi rơp guh dơ̆ bàr.

¹⁰ Bol khai be cau gơkòl digùl lò mơ be cau bơñul ñô tơrnòm; bol khai kong chu pơrguc kung be rhe ro.

¹¹ Bơh di mê dô nă cau neh lik lòt la cau bơtào kai gơrmơ̆i iơh tòmdră mơ Yàng Jehôwa, dô nă cau bơtào kai iơh bơsak.

Jơnau niam cau Juda in

¹² Yàng Jehôwa đơs be do: “Bulah bol khai gơs oă pràn mơ gal ngan cau, bol khai rơp kong tơnroh mơ sang ngài. Bulah Añ neh lơh jê sồt mê in, Añ rơp ò lơh bòl glar jê sồt mê in tai.

¹³ Tŭ do Añ rơp dơrpă yô bol khai dê bơh di ngko mê, mơ gơltac che sreng neh kơt mê.”

¹⁴ Yàng Jehôwa neh ai dô jơnau sồr tus hơ mê; “Sơnđan mê dê rơp ò gam sùm sùm. Añ rơp tơnroh ală rùp pac sềr mơ ală rùp tŏ bơh di hìu ală yàng mê dê. Añ rơp lơh bơtô ƀồc mê in bơh mê la ò di pal.”

¹⁵ Sền ne! Hơđang ală mơnơm gơs mpàng jơng cau cèng jơnau niam mơ yal bơta lơngap lơngai! Ơ Juda, pơjum sa chò hòp tĕ ală ngai wèr mê dê, mơ lơh jat wil tơl ală jơnau ho pơgon mê dê, bơh cau iơh bơsak rơp ò brồ lơh mê tai; bol khai neh kong tơnroh jơh hir rau.