Lebi 25 - Sră Goh 2018

Nam Saƀat

¹ Yàng Jehôwa đơs mơ Môise hơđang mơnơm Sinai lah:

² “Yal tĕ cau Israel in mơ đơs mơ bol khai lah: ‘Tòm tŭ bol mê mut tòm lơgar mơ Añ rơp ai bol mê in gen ù tiah hơ̆ pal prap gàr nam Saƀat Yàng Jehôwa in.

³ Tòm prau nam, tùc tam tĕ tòm ƀlàng sre bol mê dê, mơ tòm prau nam siat niam tĕ ală suơn ño bol mê dê, mơ pơjum tơrgòm ală plai đo gơ dê.

⁴ Mơya tòm nam dơ̆ poh, ù tiah pal geh dô nam Saƀat ơm rlô, dô nam Saƀat Yàng Jehôwa in. Bañ tùc tam tòm ală ƀlàng sre bol mê dê hala siat niam ală suơn ño bol mê dê.

⁵ Bañ toès phan hòn is gơ dê hala pic plai ño di ală tòm ño bol mê ò rcang niam. Ù tiah pal gơs dô nam ơm rlô.

⁶ Phan lơi ù tiah tơnggơs tòm nam Saƀat rơp la phan sa bol mê in, hơ̆ la să tòm bol mê dê, cau klau duh broă mơ cau ùr duh broă bol mê dê, cau ơpah lơh broă mơ cau ơm ing digùl bol mê,

⁷ bal mơ mpồl phan poan jơng bol mê dê mơ ală phan brê tòm lơgar bol mê dê. Phan lơi ù tiah tơnggơs gen rgơi ngui nàng lơh phan sa.’

Nam hòn chò

⁸ ‘Kòp tĕ tus di poh nam Saƀat, hơ̆ la poh dơ̆ poh nam, tồ ntum khà nam tòm poh nam Saƀat rơp la poan jơt sin nam.

⁹ Gen uh tĕ kơlwòk làm jơh tòm ngai jơt kơnhai poh; tòm ngai tơwài glài uh tĕ kơlwòk làm jơh lơgar.

¹⁰ Ơn is sàng goh nam dơ̆ pram jơt mơ yal tơnggit bơta khat gơboh jơh làng bol in tòm làm lơgar. Nam hơ̆ rơp la Nam Hòn Chò bol mê in; kòp nă tòm bol mê rơp rê wơl hơ sre brê hìu nhă he dê mơ kòp nă rê wơl hơ mpồl hìu nhă he dê.

¹¹ Nam dơ̆ pram jơt rơp la Nam Hòn Chò bol mê in; bañ sih gar mơ kung bañ toès phan lơi gơhòn is gơ dê hala pic plai ño tòm ală suơn ò rcang niam.

¹² Bơh hơ̆ la dô bơta hòn chò mơ rơp pal gơs sàng goh bol mê in; sa tĕ mìng phan lơi ai bơh di ală ƀlàng sre.

¹³ Tòm Nam Hòn Chò do kòp nă rơp rê wơl hơ sre brê tòm khai dê.

¹⁴ Dilah bol mê tac ù tiah mơ dô nă cau lơgar tòm in hala blơi bơh di khai gen bañ lơh blac pơrlồm di oh mi he.

¹⁵ Bol mê pal blơi bơh di cau lơgar tòm he dê jat be ntum khà nam gam wơl nàng toès ală kòi mbo.

¹⁶ Tòm tŭ gam oă nam gen bol mê pal kòp bơtơl khà priă, mơ tòm tŭ gam dô êt nam gen bol mê pal pơndut khà priă, tài bơh phan khai tac bol mê in la ntum khà kơnhai toès kòi mbo.

¹⁷ Bañ sa kơrlơm bơh di oh mi he mơya rngòt tĕ di Yàng Tom Trồ. Añ la Jehôwa Yàng Tom Trồ bol mê dê.

¹⁸ Bol mê lơh jat tĕ ală bơta sồr lam Añ jê mơ dòn song prap gàr ală bơta boh lam Añ jê gen bol mê rơp kis ring lơngai tòm lơgar.

¹⁹ Gen ù tiah rơp tơnggơs ală plai đo gơ dê, mơ bol mê rơp sa hòm mơ kis ring lơngai.

²⁰ Bol mê rơp lùp lah: “Ñchi phan bol hi sa tòm nam dơ̆ poh dilah bol hi ò tùc tam hala toès kòi mbo taih?”

²¹ Añ rơp ai bol mê in bơta lơngai lơngò tòm nam dơ̆ prau tian gơs ù tiah rơp tơnggơs tơl sa tòm pe nam.

²² Tòm tŭ bol mê tùc tam tòm nam dơ̆ phàm, bol mê rơp sa phan yau neh toès mơ kư̆ gam sa ală phan hơ̆ jơl tus di kơnhai toès nam dơ̆ sin rơp tus.

²³ Ù tiah ò di pal tac tơn; tài bơh ù tiah gơrê bal mơ Añ mơ bol mê mìng la ală cau làng bơdìh mơ la ală cau ơm ing.

²⁴ Tòm làm jơh lơgar mơ bol mê rơp dòp gơs sre brê, bol mê pal rcang lài bơta tơwài wơl ù tiah.

²⁵ Dilah dô nă tòm ală cau lơgar tòm bol mê dê gơlik rƀah lơòi mơ tac dô pơnah sre brê khai dê, gen cau gơp bơtiàn rềp rlau jơh pal tus mơ tơwài wơl pơnah cau lơgar tòm khai dê neh tac.

²⁶ Bulah behơ̆, dilah dô nă cau ò gơs cau lơi nàng tơwài wơl sre brê hơ̆ khai in mơya să tòm khai gơs cồng nha niam mơ geh tơl jền priă nàng tơwài gơ wơl,

²⁷ gen khai pal lơh nền khà priă bơh di ală nam mơ khai neh tac gơ mơ tơm wơl khà priă gam wơl cau in khai neh tac gơ; lồc behơ̆ khai rgơi rê wơl hơ sre brê tòm khai dê.

²⁸ Mơya dilah khai ò gơs tơl jền priă nàng tơm wơl cau in, pơnah khai neh tac rơp gam la sre brê cau neh blơi jơl tus di Nam Hòn Chò. Pơnah ù tiah hơ̆ rơp rê wơl tòm Nam Hòn Chò, mơ tŭ hơ̆ gen khai rgơi rê wơl hơ sre brê khai dê.

²⁹ Dilah dô nă cau tac dô nơm hìu tòm dô nơm ƀòn dờng gơs dơrñang gùt dar, khai gơs gơnoar tơwài wơl tòm tŭ tơl dô nam tơnơ̆ mơ tŭ neh tac gơ. Tòm pah tơngai hơ̆ khai rgơi tơwài gơ wơl.

³⁰ Dilah hìu hơ̆ ò geh tơwài wơl lài mơ tŭ tơl dô nam neh rlau, hìu tòm dô nơm ƀòn dờng gơs dơrñang gùt dar gơrê bal gam sùm mơ cau neh blơi gơ bal mơ ală kòn sau khai dê. Gơ ò geh rê wơl tòm Nam Hòn Chò.

³¹ Mơya ală hìu tòm ală ƀòn dềt ò gơs dơrñang gùt dar bol gơ, gen pal kòp kung be ù tiah tòm ƀòn lơgar. Bol gơ rgơi geh tơwài wơl, mơ bol gơ rơp geh rê wơl tòm Nam Hòn Chò.

³² Ală cau Lebi sùm sùm gơs gơnoar tơwài wơl ală hìu bol khai gơs tòm ală ƀòn dờng ơn is cau Lebi in.

³³ Behơ̆ sre brê cau Lebi dê rgơi geh tơwài wơl, hơ̆ la dô nơm hìu neh tac tòm dô nơm ƀòn dờng lơi bol khai gơs hìu hơ̆, mơ pal geh rê wơl tòm Nam Hòn Chò.

³⁴ Mơya ƀlàng ñhơt gơrê bal mơ ală ƀòn dờng bol khai dê ò di geh tac; hơ̆ la sre brê gam sùm bol khai dê.

³⁵ Dilah dô nă tòm oh mi bol mê dê gơlik rƀah lơòi mơ ò rgơi ròng siam is să khai digùl bol mê, gen dong kòl tĕ khai kung be bol mê dong kòl dô nă cau làng bơdìh hala dô nă cau ơm ing tồ khai rgơi kư̆ kis digùl bol mê.

³⁶ Bañ sa jền cồng lơi bơh di khai, mơya duh rngòt tĕ di Yàng Tom Trồ tồ cau ơm tòm dô lơgar bal mơ bol mê rgơi kư̆ ơm kis digùl bol mê.

³⁷ Bol mê bañ ai khai in càn jền nàng sa cồng hala tac khai in phan sa nàng geh cồng.

³⁸ Añ la Jehôwa Yàng Tom Trồ bol mê dê, la Bơtau neh cèng bol mê lik klàs bơh di Ejiptơ nàng ai bol mê in lơgar Kanaan mơ lơh gơs Yàng Tom Trồ bol mê dê.’

Hồ toh ală dĭ gơna in

³⁹ ‘Dilah dô nă oh mi bol mê gơlik rƀah lơòi ơm rềp di bol mê mơ tac să khai bol mê in, bañ sồr khai lơh broă kung be dô nă cau dĭ.

⁴⁰ Pal gơwèt mơ khai kung be dô nă cau lơh broă ơpah hala dô nă cau ơm ing digùl bol mê; khai pal lơh broă bol mê in jơl tŭ di Nam Hòn Chò.

⁴¹ Gen khai mơ ală kòn khai dê pal geh hồ toh, mơ khai rơp rê wơl hơ mpồl hìu nhă tòm khai dê mơ hơ sre brê ală ồng pàng khai dê.

⁴² Tài bơh cau Israel la ală cau duh broă Añ jê, la cau mơ Añ neh cèng tơlik bơh di Ejiptơ, bol khai ò di kong tac kung be ală cau dĭ.

⁴³ Bol mê bañ at bồ dô bă iơh rmơh hơđang bol khai, mơya duh rngòt tĕ di Yàng Tom Trồ bol mê dê.

⁴⁴ Ală cau dĭ klau mơ dĭ ùr bol mê dê pal tus bơh di ală làng bol ơm gùt dar bol mê; bơh di ală làng bol hơ̆ bol mê rgơi rwat ală cau dĭ.

⁴⁵ Bol mê kung rgơi rwat cau ƀà bơh di ală cau ơm ing digùl bol mê mơ ală cau tòm ală mpồl hìu nhă bol khai dê neh deh tòm lơgar bol mê dê, mơ bol khai rơp gơlik gơs phan tòm bol mê dê.

⁴⁶ Bol mê rgơi lòi bol khai wơl ală kòn sau bol mê in lơh gơs phan jơtài mơ lơh bol khai in gơs dĭ jơl jơh rài kis bol khai dê, mơya bol mê ò di pal at bồ dô bă iơh rmơh hơđang ală cau oh mi Israel bol mê dê.

⁴⁷ Dilah dô nă cau làng bơdìh hala dô nă cau ơm ing digùl bol mê gơlik gơs pas sơm mơ dô nă cau làng tòm bol mê dê gơlik rƀah lơòi mơ tac să tòm khai cau làng bơdìh in ơm digùl bol mê hala tac mơ dô nă cau tòm mpồl hìu nhă cau làng bơdìh dê,

⁴⁸ gen khai gam gơs gơnoar geh tơwài wơl tơnơ̆ mơ tŭ neh tac să tòm khai dê. Dô nă tòm jơi bơtiàn khai dê rgơi tơwài khai wơl.

⁴⁹ Dô nă kồñ wa hala dô nă oh mi kòn oh kòn bi hala cau lơi tòm gơp bơtiàn poac mhàm mpồl hìu nhă khai dê rgơi tơwài khai wơl. Hala dilah khai pas sơm gen khai rgơi tơwài wơl să tòm khai.

⁵⁰ Khai mơ cau neh rwat khai rơp kòp khà nam bơh di tŭ khai neh tac să tòm khai dê jơl tus di Nam Hòn chò. Khà priă pal tơm nàng khai in geh hồ toh pal kòp jat khà jền tơngai dô nă cau lơh broă ơpah tòm khà nam hơ̆.

⁵¹ Dilah gam oă nam gen khai pal tơm wơl dô pơnah oă tòm khà priă neh tac khai.

⁵² Dilah gam mìng dô êt nam lài mơ Nam Hòn chò gen khai pal ting khà priă mơ tơm jat khà pal tơm nàng geh tơwài wơl.

⁵³ Khai pal geh gơwèt kung be dô nă cau lơh broă ơpah kòp nam; bol mê pal sền sơwì bơta hơ̆ nàng cau tòm khai dê ò at bồ khai dô bă iơh rmơh.

⁵⁴ Bulah khai ò geh tơwài wơl bơh dô nơm gùng lơi tòm ală gùng hơ̆, khai mơ ală kòn khai dê pal geh hồ toh tòm Nam Hòn chò,

⁵⁵ bơh ală cau Israel gơrê bal mơ Añ kung be ală cau duh broă. Bol khai la ală cau duh broă Añ jê, la ală cau mơ Añ neh cèng tơlik bơh di Ejiptơ, Añ la Jehôwa Yàng Tom Trồ bol mê dê.’”