Lebi 17 - Sră Goh 2018

Bơta boh lam bơh tiah hàl tơnchơt phan ơn pơdơng

¹ Yàng Jehôwa đơs mơ Môise lah:

² “Đơs tĕ mơ Arôn, ală kòn klau khai in mơ jơh làng bol Israel in mơ đơs lah: ‘Do la jơnau Yàng Jehôwa neh sồr:

³ Cau Israel lơi ơn dô nơm kơnrồ, dô nơm belàt hala dô nơm be tòm sàl ơm hala đah bơdìh sàl ơm

⁴ mơ ò cèng gơ tus di tiah mut Sàl Tòm Mat nàng ơn lơh gơs dô nơm phan ơn Yàng Jehôwa in di đap Hìu Duh Khoai Yàng Jehôwa dê, gen cau hơ̆ kòl kòp la cau gơs glài lơh gơhòr mhàm; khai neh lơh gơhòr mhàm mơ pal kong tă sang bơh di làng bol khai dê.

⁵ Lơh behơ̆ nàng ală cau Israel rơp cèng ơn Yàng Jehôwa in ală phan ơn mơ tŭ do bol khai ơn tòm ală ƀlàng sre. Bol khai pal cèng ală phan ơn hơ̆ tus hơ cau gơnoar ơn phan duh khoai, hơ̆ la tus hơ Yàng Jehôwa, di tiah mut Sàl Tòm Mat dê mơ ơn bol gơlơh gơs ală phan ơn bơta ring lơngai dê.

⁶ Cau gơnoar ơn phan duh khoai pal rsìh mhàm hơđang cơnòng duh khoai di tiah mut Sàl Tòm Mat dê, mơ chu dơngi gơs ƀô bơlhu niam nùs Yàng Jehôwa.

⁷ Bol khai ò di ơn phan ơn lơi bol khai dê ală cà ràk in tai, mơ să tòm bol khai tìs glài rềs àr bơrnàn. Hơ̆ la dô bơta sồr lam gam sùm sùm bol khai in mơ ală rài rơp tus in sơl.’

⁸ Đơs tĕ mơ bol khai lah: ‘Cau Israel lơi hala cau làng bơdìh lơi kis digùl cau Israel kòñ ơn dô nơm phan ơn chu pơrguc hala dô nơm phan ơn

⁹ mơ ò cèng phan ơn hơ̆ tus di tiah mut Sàl Tòm Mat dê nàng ơn gơ Yàng Jehôwa in gen cau hơ̆ pal kong tă sang bơh di làng bol khai dê.’

¹⁰ ‘Cau Israel lơi hala cau làng bơdìh lơi ơm digùl cau Israel sa mhàm lơi gen Añ rơp wèt mat tòmdră mơ cau hơ̆ la cau sa mhàm, mơ rơp tă sang khai bơh di làng bol khai dê.

¹¹ Bơh bơta kis dô nơm phan neh geh crơng gơs dê gơ ơm tòm mhàm mơ Añ neh ai gơ bol mê in nàng lơh gơs bơta tơwài glài să tòm bol mê in hơđang cơnòng duh khoai, hơ̆ la mhàm lơh gơs bơta tơwài glài bơta kis dô nă cau in.

¹² Gen tàng Añ đơs mơ cau Israel lah: Ò gơs cau lơi tòm bol mê rgơi sa mhàm, cau làng bơdìh ơm digùl bol mê kung ò di sa mhàm sơl.

¹³ Cau Israel lơi hala cau làng bơdìh lơi ơm digùl bol mê lòt mòc mơ geh dô nơm phan poan jơng hala dô nơm sềm rgơi sa poac gen pal lơh gơtuh jơh mhàm gơ dê mơ ai ù bồr wơl,

¹⁴ tài bơh bơta kis kòp nơm phan neh geh crơng gơs dê gơ ơm tòm mhàm gơ dê. Tài bơh hơ̆ tàng Añ neh đơs mơ cau Israel lah: “Bol mê bañ sa mhàm dô nơm phan neh geh crơng gơs lơi, tài bơh bơta kis kòp nơm phan neh geh crơng gơs dê gơ ơm tòm mhàm; cau lơi sa mhàm gen cau hơ̆ pal kong tă sang bơh di làng bol.”

¹⁵ Cau lơi, bulah la cau ƀòn tòm hala cau làng bơdìh, sa phan lơi neh bàn chơt rau hala gơkòl crè poac bơh ală phan poan jơng tòm brê gen cau hơ̆ pal pìh ală ồi ào khai dê mơ um tòm dà, mơ khai gơlik ò goh jat bơta sồr lam duh khoai jơl tus di trồ mho; lồc behơ̆ khai geh goh.

¹⁶ Mơya dilah khai ò pìh ală ồi ào khai dê mơ um dà să tòm khai dê, gen khai pal kong glài.’”