Kôlôse 1 - Sră Goh 2018

Jơnau còp să

¹ Pol la cau gơnoar bơto dờng bơh Yàng Krist Jesu jat nùs kòñ Yàng Tom Trồ dê, mơ Timôthe la oh mi bol he dê,

² pơyoa ală cau sàng goh in mơ ală oh mi dòn song tòm Bơtau Krist ơm tòm Kôlôse: Dan oh mi in geh bơta nđàc mơ bơta lơngap lơngai bơh Yàng Tom Trồ la Bèp bol he dê.

Yàng Jesu Krist la bồ jơh ală phan mơ tòm ryas bơta dong klàs dê ( 1:3 – 2:23 ) Pol hòi dan ưnngài Yàng

³ Tòm tŭ bol hi hòi dan oh mi in, gen òs ưnngài Yàng Tom Trồ, Bèp Yàng Jesu Krist la Yàng bol he dê,

⁴ bơh bol hi neh kơno bơh bơta dòn oh mi dê tòm Yàng Krist Jesu mơ bơh bơta kòñ gơboh oh mi dê gơwèt mơ jơh ală cau sàng goh;

⁵ tài bơh bơta gơn kơnòm prap lòi oh mi in hơđang trồ, la bơta lài òr oh mi neh kơno bơh jơnau song Jơnau Niam dê.

⁶ Jơnau Niam hơ̆ neh tus hơ oh mi, kung be neh tus tòm làm jơh dunnia, gơlik plai mơ gơbơtơl kung be tòm oh mi, bơh ngai oh mi neh kơno mơ git wă bơta nđàc Yàng Tom Trồ dê jat be jơnau song,

⁷ tòm toh be oh mi neh bơtê mơ Epapras, la cau bơyô lơh broă bal đềt mềr bol hi dê. Khai la cau ala mat bol hi, la dô nă cau gơnoar duh broă dòn song Bơtau Krist dê.

⁸ Khai kung yal wơl bol hi in bơta kòñ gơboh oh mi dê tòm Yàng Hwềng.

⁹ Tài bơh hơ̆, bơh ngai bol hi kơno jơnau hơ̆, gen kung bơh oh mi mơ hòi dan ò dơh, dan oh mi in geh bềng lìu bơta git wă nùs kòñ Yàng Tom Trồ dê tòm jơh ală bơta jak chài mơ bơta git loh đah hwềng,

¹⁰ tồ oh mi in lơh lòt dô bă di pal mơ Yàng, niam nùs Kơnràñ tòm jơh ală bơta, gơlik plai tòm jơh ală broă niam, sơlo bơtơl tai tòm bơta dòp git Yàng Tom Trồ.

¹¹ Kơnòm di gơnap gơnoar gơklŏ Kơnràñ dê, tồ geh tơl bơta ơt ơl mơ kong jai bơta bòl glar dô bă hòn chò;

¹² mơ ưnngài Yàng Bèp la Bơtau neh lơh bol he in gơlik gơs di pal nàng dòp pơnah tòm sre brê ală cau sàng goh dê ơm tòm lơgar bơta àng.

¹³ Kơnràñ neh dong tă bol he lik klàs bơh gơnoar bơta klam jơngo dê, mơ cèng bol he hơ lơgar Kòn kòñ gơboh Kơnràñ dê.

¹⁴ Tòm Kòn hơ̆ bol he gơs bơta dong tơwài la bơta toh glài bol he dê.

Bơtau Krist gơs bơh sơnròp

¹⁵ Kơnràñ la rùp să Yàng Tom Trồ dê he ò rgơi gŏ, la Bơtau neh geh tơnggơs bồ dà lài mơ ală phan crơng gơs.

¹⁶ Bơh jơh ală bơta neh geh crơng gơs tòm Kơnràñ, bulah phan hơđang trồ hala tòm ù, phan rgơi gŏ hala phan he ò rgơi gŏ, hala ală gơnoar at bồ, hala ală gơnoar; jơh ală bơta tus bơh Kơnràñ mơ la tài bơh Kơnràñ mơ geh crơng gơs.

¹⁷ Kơnràñ gơs lài mơ jơh ală bơta, jơh ală bơta ơm kơ̆ tòm Kơnràñ.

¹⁸ Kơnràñ kung la bồ să jan dê, hơ̆ la bồ Hìu Jum Goh. Kơnràñ la tòm ryas, la cau sơnròp kis wơl bơh bơta chơt, tồ tòm jơh ală bơta Kơnràñ la bồ.

¹⁹ Bơh Yàng Tom Trồ neh niam nùs ai jơh ală bơta bềng tơl Kơnràñ dê ơm tòm Yàng Jesu,

²⁰ mơ kơnòm di Bơtau Krist lơh jơh ală bơta in, bulah tòm ù hala hơđang trồ, gơs gơtòmsòr wơl mơ Yàng Tom Trồ, bơh neh kơnòm dê mhàm Bơtau Krist dê, di chi pơng mơ lơh gơs bơta ring lơngai rau.

²¹ Ai oh mi, lài òr nùs kơlôi oh mi dê ơm ngài mơ sò tơm mơ Kơnràñ bơh ală broă iơh bơsak.

²² Mơya tŭ do Yàng Tom Trồ neh kơnòm di bơta chơt să jan poac să Kơnràñ dê, mơ lơh oh mi in gơs gơtòmsòr wơl, nàng tơlik mat oh mi di đap Kơnràñ dô bă sàng goh, ò sồt rmàñ, ò gơs tiah geh lah pơrhơng.

²³ Mìng la oh mi kư̆ ơm tòm bơta dòn, kơ̆ cê, ò gơlơnggac lơnggơr, ò gơtơrđeh bơh bơta gơn kơnòm tòm Jơnau Niam mơ oh mi neh kơno, gơ neh geh bơto yal digùl jơh ală làng bol hơđơm trồ; să tòm añ la Pol kung neh geh lơh gơs cau gơnoar duh broă Jơnau Niam hơ̆ dê.

Gơnoar broă Pol dê bơh Hìu Jum Goh

²⁴ Tŭ do añ hòn chò bơh bơta añ kong jê sồt bòl glar bơh oh mi, mơ bơh să jan Bơtau Krist dê la Hìu Jum Goh, añ ơn poac să añ nàng kong pơnah gam siơ̆u tòm bơta bòl glar Kơnràñ dê.

²⁵ Añ kung neh geh lơh gơs cau gơnoar duh broă Hìu Jum Goh hơ̆ dê, jat be gơnoar broă mơ Yàng Tom Trồ neh ai añ in tài bơh oh mi, nàng yal tơlik wil tơl jơnau Yàng Tom Trồ dê,

²⁶ hơ̆ la jơnau ndơp ndơr neh pồn ndơp bơh tòm ală rài mơ ală jơi bơtiàn, mơya tŭ do neh geh yal tơlik ală cau sàng goh Kơnràñ in.

²⁷ Yàng Tom Trồ kung niam nùs mơ yal bol khai in git bơta gơklŏ crih crài jơnau ndơp ndơr hơ̆ digùl làng bol bơdìh la mbe lơi, hơ̆ la Bơtau Krist ơm tòm oh mi la bơta gơn kơnòm oh mi dê, tồ geh pơnah tòm bơta gơklŏ Yàng Tom Trồ dê.

²⁸ Bol he bơto yal bơh Kơnràñ mơ ai jơh ală bơta jak chài bơto tơngkah kòp nă cau, bơto sồr kòp nă cau nàng tơlik mat bol khai dô bă wil tơl tòm Bơtau Krist.

²⁹ Kung bơh bơta hơ̆ mơ añ kong bòl glar lơh broă, tòmlơh jơh nùs kơnòm di pràn Kơnràñ dê mơ Kơnràñ lơh broă tòm añ dô bă gơs gơnap gơnoar.