Khà Làng Bol 8 - Sră Goh 2018

Rơndap ơn ală ồs đèng

¹ Yàng Jehôwa đơs mơ Môise lah:

² “Yal tĕ Arôn in mơ đơs mơ khai lah: Tòm tŭ mê rơndap ơn ală ồs đèng, gơ pal pơnđàng sòl di đap jơng đèng dê.”

³ Arôn lơh jat behơ̆; khai rơndap ơn ală jơng đèng tồ gơwèt mat hơđap jơng đèng, tòm toh jat be Yàng Jehôwa neh sồr Môise.

⁴ Jơng đèng geh lơh gơs be do: Gơ neh lơh gơs mơ màh neh klơn lơho, bơh tòm tus di cồng gơ dê, jơng đèng neh lơh gơs tòm toh jat be sơnoa rnoas Yàng Jehôwa neh sơnio Môise in.

Bơta ơn is ală cau Lebi

⁵ Yàng Jehôwa đơs mơ Môise lah:

⁶ “Ơn is tĕ ală cau Lebi bơh digùl ală cau Israel ndai mơ lơh bol khai in gơs goh jat bơta sồr lam duh khoai dê.

⁷ Do la bơta bol mê lơh bol khai in gơs goh, lơh tĕ be do: Rsìh tĕ dà lơh goh hơđang bol khai; lồc behơ̆ sồr bol khai koah jơh să jan bol khai dê mơ pìh ală ồi ào bol khai dê, mơ rcang lơh goh să tòm bol khai in.

⁸ Sồr bol khai kup tĕ dô nơm kơnrồ dam gam dềt bal mơ phan ơn mơ kòi mbo la kơmbuh phe rhền bơcă bal mơ mơñà; lồc behơ̆ mê pal kup dô nơm kơnrồ dam gam dềt tai lơh gơs phan ơn tơwài glài.

⁹ Cèng tĕ ală cau Lebi tus di đap Sàl Tòm Mat mơ pơjum jơh mpồl jơnum Israel dê.

¹⁰ Mê pal cèng ală cau Lebi tus di đap Yàng Jehôwa mơ ală cau Israel pal ơn tê bol khai dê hơđang bol hơ̆.

¹¹ Arôn rơp bơtào ală cau Lebi di đap Yàng Jehôwa kung be dô nơm phan ơn tơyài ma kiau bơh di cau Israel, tồ bol khai in rgơi geh rcang sir lơh broă Yàng Jehôwa dê.

¹² Tơnơ̆ mơ tŭ ală cau Lebi neh ơn tê bol khai dê hơđang bồ ală kơnrồ dam, gen ngui tĕ dô nơm lơh gơs phan ơn tơwài glài mơ dô nơm ndai lơh gơs phan ơn chu pơrguc nàng tơwài glài ală cau Lebi in.

¹³ Sồr ală cau Lebi ntào di đap Arôn mơ ală kòn klau khai dê, lồc behơ̆ bơtào bol khai lơh gơs kung be dô nơm phan ơn tơyài ma kiau ơn Yàng Jehôwa in.

¹⁴ Lơh behơ̆ gen mê neh ơn is ală cau Lebi bơh di ală cau Israel ndai, mơ ală cau Lebi rơp gơrê bal mơ Añ.

¹⁵ Tơnơ̆ mơ tŭ mê neh lơh ală cau Lebi in gơs goh mơ bơtào bol khai lơh gơs kung be dô nơm phan ơn tơyài ma kiau, bol khai rơp tus lơh broă bol khai dê tòm Sàl Tòm Mat.

¹⁶ Bol khai la ală cau Israel neh ơn wil tơl Añ in. Añ neh dòp rò bol khai be cau gơrê is mơ Añ ala ală kòn tơnhoa, la kòn klau tơnhoa bơh di kòp nă cau ùr Israel dê.

¹⁷ Kòp nă kòn klau tơnhoa tòm Israel, bulah la kòn mơnus hala phan poan jơng, la gơrê bal mơ Añ. Tòm tŭ Añ tơnroh jơh ală kòn klau tơnhoa tòm Ejiptơ, Añ neh ơn is ală kòn klau tơnhoa Israel dê să tòm Añ in.

¹⁸ Mơ Añ neh ai ală cau Lebi ala jơh ală kòn klau tơnhoa tòm Israel.

¹⁹ Bơh di jơh ală cau Israel, Añ neh ai ală cau Lebi lơh gơs ală phan ai gòi Arôn mơ ală kòn klau khai in nàng lơh broă tòm Sàl Tòm Mat ala ală cau Israel mơ lơh gơs bơta tơwài glài bol khai in nàng ò gơs bơta kòp jê pluh plàng rơp tơnroh ală cau Israel tòm tŭ bol khai tus rềp di tiah sàng goh.”

²⁰ Môise, Arôn mơ jơh dô mpồl jơnum Israel lơh di ală cau Lebi tòm toh jat be Yàng Jehôwa neh sồr Môise.

²¹ Ală cau Lebi lơh să tòm bol khai in gơs goh mơ pìh ală ồi ào bol khai dê. Lồc behơ̆ Arôn bơtào bol khai lơh gơs be dô nơm phan ơn tơyài ma kiau di đap Yàng Jehôwa mơ lơh gơs bơta tơwài glài bol khai in mơ lơh bol khai in gơs goh.

²² Tơnơ̆ mơ hơ̆, ală cau Lebi lòt tus lơh broă bol khai dê tòm Sàl Tòm Mat hơđơm gơnoar lam bồ Arôn mơ ală kòn klau khai dê. Bol khai neh lơh di ală cau Lebi tòm toh jat be jơnau Yàng Jehôwa neh sồr Môise.

²³ Yàng Jehôwa đơs mơ Môise lah:

²⁴ “Lơh tĕ ală bơta do di ală cau Lebi: Ală cau klau gơs bàr jơt pram nam hala dờng sơnam rlau rơp tus nàng gơs pơnah tòm broă lơh tòm Sàl Tòm Mat,

²⁵ mơya tus di pram jơt nam gen bol khai pal ơm rlô bơh di bơta duh broă kòp ngai mơ ò lơh broă tai.

²⁶ Bol khai rgơi dong kòl ală oh mi bol khai dê tòm ală broă tòm bol hơ̆ dê tòm Sàl Tòm Mat, mơya să tòm bol khai ò di lơh broă hơ̆. Gen behơ̆ la gùng mơ mê rơp jào ală broă tòm ală cau Lebi in.”