Khà Làng Bol 7 - Sră Goh 2018

Ală phan ơn duh khoai tòm ngai pơjum ơn Hìu Duh khoai

¹ Tòm tŭ Môise neh sir bơtào Hìu Ing Duh Khoai, khai bong mơñà gơ in mơ ơn is gơ sàng goh bal mơ jơh ală phan ngui gơrê bal mơ gơ. Khai kung bong mơñà mơ ơn is sàng goh cơnòng duh khoai mơ jơh ală phan ngui gơrê bal mơ gơ.

² Gen ală cau at bồ Israel, ală cau at bồ ală hìu nhă la ală cau at bồ ală jơi bơtiàn gơs broă tòm at bồ ală cau neh geh kòp khà, ală cau hơ̆ ơn ală phan ơn duh khoai.

³ Bol khai cèng ală phan ơn bol khai dê tus di đap Yàng Jehôwa, hơ̆ la prau nơm rơndeh mơ jơt bàr nơm kơnrồ dam, dô nơm kơnrồ dam kòp nă cau at bồ in mơ dô nơm rơndeh bàr nă cau in. Bol khai ơn ală phan do di đap Hìu Ing Duh Khoai.

⁴ Yàng Jehôwa đơs mơ Môise lah:

⁵ “Dòp tĕ ală phan do bơh di bol khai nàng ngui tòm broă Sàl Tòm Mat dê. Jào tĕ bol gơ ală cau Lebi in jat bơta pal càng tòm broă kòp nă dê.”

⁶ Behơ̆ Môise ai ală rơndeh mơ kơnrồ dam mơ jào bol gơ ală cau Lebi in.

⁷ Khai ai bàr nơm rơndeh mơ poan nơm kơnrồ dam ală cau Gersôn in, jat be bơta pal càng tòm broă bol khai dê,

⁸ mơ khai ai poan nơm rơndeh mơ phàm nơm kơnrồ dam ală cau Merari in, jat be bơta pal càng tòm broă bol khai dê. Bol khai jơh tơl nă ơm hơđơm gơnoar lam bồ Ithamar kòn klau Arôn dê, cau gơnoar ơn phan duh khoai.

⁹ Mơya Môise ò gŏ ai rơndeh lơi ală cau Kôhat in, tài bơh bol khai pal tùng hơđang pơnì bol khai dê ală phan sàng goh mơ bol khai gơs broă tòm rcang gàr.

¹⁰ Tòm tŭ cơnòng duh khoai neh geh bong mơñà, ală cau lam bồ cèng ală phan ơn duh khoai bol khai dê bơh bơta ơn gơ Yàng in, mơ ơn gơ di đap cơnòng duh khoai.

¹¹ Bơh Yàng Jehôwa đơs mơ Môise lah: “Kòp ngai dô nă cau lam bồ rơp cèng phan ơn duh khoai khai dê bơh bơta ơn cơnòng duh khoai Yàng in.”

¹² Cau cèng phan ơn duh khoai khai dê tòm ngai sơnròp la Nasôn kòn klau Amminadap, jơi bơtiàn Juda.

¹³ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

¹⁴ dô nơm prềng màh kơnjơ̆ jơt sieklơ ơn bềng kơlhô;

¹⁵ dô nơm kơnrồ dam gam dềt, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

¹⁶ dô nơm be dam lơh gơs dô nơm phan ơn tơwài glài;

¹⁷ mơ bàr nơm kơnrồ dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn ring lơngai. Hơ̆ la phan ơn duh khoai Nasôn kòn klau Amminadap dê.

¹⁸ Tòm ngai dơ̆ bàr, Nethanel kòn klau Juar, cau lam bồ Isakar, cèng tus phan ơn khai dê.

¹⁹ Phan ơn khai cèng tus la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

²⁰ dô nơm prềng màh kơnjơ̆ jơt sieklơ ơn bềng kơlhô;

²¹ dô nơm kơnrồ dam gam dềt, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

²² dô nơm be dam lơh gơs dô nơm phan ơn tơwài glài;

²³ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn ring lơngai. Hơ̆ la phan ơn duh khoai Nethanel kòn klau Juar dê.

²⁴ Tòm ngai dơ̆ pe, Eliap kòn klau Helôn, cau lam bồ làng bol Jebulun, cèng tus phan ơn duh khoai khai dê.

²⁵ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

²⁶ dô nơm prềng màh kơnjơ̆ jơt sieklơ ơn bềng kơlhô;

²⁷ dô nơm kơnrồ dam gam dềt, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

²⁸ dô nơm be dam lơh gơs dô nơm phan ơn tơwài glài;

²⁹ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn ring lơngai. Hơ̆ la phan ơn duh khoai Eliap kòn klau Helôn dê.

³⁰ Tòm ngai dơ̆ poan, Elijur kòn klau Sedeur, cau at bồ làng bol Ruben dê, cèng tus phan ơn duh khoai khai dê.

³¹ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

³² dô nơm prềng màh kơnjơ̆ jơt sieklơ ơn bềng kơlhô;

³³ dô nơm kơnrồ dam dềt, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

³⁴ dô nơm be dam lơh gơs dô nơm phan ơn tơwài glài;

³⁵ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn bơta ring lơngai. Hơ̆ la phan ơn duh khoai Elijur kòn klau Sedeur dê.

³⁶ Tòm ngai dơ̆ pram Selumiel kòn klau Jurisadai, cau lam bồ làng bol Simeôn, cèng tus phan ơn duh khoai khai dê.

³⁷ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

³⁸ dô nơm prềng màh kơnjơ̆ jơt sieklơ ơn bềng kơlhô;

³⁹ dô nơm kơnrồ dam gam dềt, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

⁴⁰ dô nơm be dam lơh gơs dô nơm phan ơn tơwài glài;

⁴¹ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn pơdơng ring lơngai. Hơ̆ la phan ơn duh khoai Selumiel kòn klau Jurisadai dê.

⁴² Tòm ngai dơ̆ prau Eliasap kòn klau Deuel, cau at bồ làng bol Gat, cèng tus phan ơn duh khoai khai dê.

⁴³ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

⁴⁴ dô nơm prềng màh kơnjơ̆ jơt sieklơ ơn bềng kơlhô;

⁴⁵ dô nơm kơnrồ dam, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

⁴⁶ dô nơm be dam lơh gơs dô nơm phan ơn tơwài glài;

⁴⁷ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn bơta ring lơngai. Hơ̆ la phan ơn duh khoai Eliasap kòn klau Jurisadai dê.

⁴⁸ Tòm ngai dơ̆ poh Elisama kòn klau Ammihut, cau at bồ làng bol Epraim, cèng tus phan ơn duh khoai khai dê.

⁴⁹ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

⁵⁰ dô nơm prềng màh kơnjơ̆ jơt sieklơ ơn bềng kơlhô;

⁵¹ dô nơm kơnrồ dam gam dềt, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

⁵² dô nơm be dam lơh gơs dô nơm phan ơn tơwài glài;

⁵³ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn pơdơng bơta ring lơngai. Hơ̆ la phan ơn duh khoai Elisama kòn klau Ammihut dê.

⁵⁴ Tòm ngai dơ̆ phàm Gamaliel kòn klau Phedajur, cau at bồ làng bol Manase dê, cèng tus phan ơn duh khoai khai dê.

⁵⁵ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

⁵⁶ dô nơm prềng màh kơnjơ̆ jơt sieklơ ơn bềng kơlhô;

⁵⁷ dô nơm kơnrồ dam gam dềt, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

⁵⁸ dô nơm be dam lơh gơs dô nơm phan ơn tơwài glài;

⁵⁹ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn dam tơl dô nam, nàng ơn lơh gơs dô nơm phan ơn pơdơng bơta ring lơngai. Hơ̆ la phan ơn duh khoai Gamaliel kòn klau Phedajur dê.

⁶⁰ Tòm ngai dơ̆ sin Abidan kòn klau Gideôni, cau at bồ làng bol Benjamin, cèng tus phan ơn duh khoai khai dê.

⁶¹ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

⁶² dô nơm prềng màh kơnjơ̆ jơt sieklơ ơn bềng kơlhô;

⁶³ dô nơm kơnrồ dam gam dềt, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

⁶⁴ dô nơm be dam lơh gơs dô nơm phan ơn tơwài glài;

⁶⁵ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn pơdơng bơta ring lơngai. Hơ̆ la ală phan ơn duh khoai Abidan kòn klau Gideôni dê.

⁶⁶ Tòm ngai dơ̆ jơt Ahiejer kòn klau Ammisadai, cau at bồ làng bol Dan, cèng tus phan ơn duh khoai khai dê.

⁶⁷ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

⁶⁸ dô nơm prềng màh kơnjơ̆ jơt sieklơ ơn bềng kơlhô;

⁶⁹ dô nơm kơnrồ dam, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

⁷⁰ dô nơm be dam lơh gơs dô nơm phan ơn tơwài glài;

⁷¹ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn pơdơng bơta ring lơngai. Hơ̆ la phan ơn duh khoai Ahiejer kòn klau Ammisadai dê.

⁷² Tòm ngai dơ̆ jơt dùl Phagiel kòn klau Ôkran, cau at bồ làng bol Aser, cèng tus phan ơn duh khoai khai dê.

⁷³ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

⁷⁴ dô nơm prềng màh kơnjơ̆ jơt sieklơ ơn bềng kơlhô;

⁷⁵ dô nơm kơnrồ dam gam dềt, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

⁷⁶ dô nơm be dam lơh gơs dô nơm phan ơn tơwài glài;

⁷⁷ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn pơdơng bơta ring lơngai. Hơ̆ la phan ơn duh khoai Phagiel kòn klau Ôkran dê.

⁷⁸ Tòm ngai dơ̆ jơt bàr Ahira kòn klau Enan, cau at bồ làng bol Neptali, cèng tus phan ơn duh khoai khai dê.

⁷⁹ Phan ơn duh khoai khai dê la dô nơm prềng priă kơnjơ̆ dô rhiang pe jơt sieklơ, mơ dô nơm jơrlŭ priă ơn dà rsìh kơnjơ̆ poh jơt sieklơ, jơh bàr nơm kơr jat sieklơ tiah sàng goh dê, kòp nơm ơn bềng kơmbuh phe rhền bơcă bal mơ mơñà lơh gơs dô nơm phan ơn duh khoai mơ kòi mbo;

⁸⁰ dô nơm prềng màh kơnjơ̆ jơt sieklơ ơn bềng kơlhô;

⁸¹ dô nơm kơnrồ dam gam dềt, dô nơm belàt dam mơ dô nơm belàt dam tơl dô nam, lơh gơs dô nơm phan ơn chu pơrguc;

⁸² dô nơm be dam lơh gơs dô nơm phan ơn tơwài glài;

⁸³ mơ bàr nơm kơnrồ dam, pram nơm belàt dam, pram nơm be dam mơ pram nơm belàt kòn tơl dô nam, nàng ơn lơh gơs dô nơm phan ơn pơdơng bơta ring lơngai. Hơ̆ la phan ơn duh khoai Ahira kòn klau Enan dê.

⁸⁴ Hơ̆ la ală phan ơn duh khoai bơh bơta ơn is sàng goh cơnòng duh khoai tòm tŭ gơ geh bong mơñà mơ ală cau at bồ Israel dê neh ơn: jơt bàr nơm prềng priă, jơt bàr nơm jơrlŭ priă ơn dà rsìh mơ jơt bàr nơm prềng màh.

⁸⁵ Kòp nơm prềng priă kơnjơ̆ dô rhiang pe jơt sieklơ, mơ kòp nơm jơrlŭ ơn dà rsìh kơnjơ̆ poh jơt sieklơ. Jơh ală prềng priă kơnjơ̆ bàr rbô poan rhiang sieklơ, jat sieklơ tiah sàng goh dê.

⁸⁶ Jơt bàr nơm prềng màh ơn bềng kơlhô, kòp nơm kơnjơ̆ jơt sieklơ, jat sieklơ tiah sàng goh dê. Jơh ală prềng màh kơnjơ̆ dô rhiang bàr jơt sieklơ.

⁸⁷ Ntum khà jơh ală phan poan jơng lơh gơs phan ơn chu pơrguc la jơt bàr nơm kơnrồ dam gam dềt, jơt bàr nơm belàt dam tơl dô nam, bal mơ phan ơn mơ kòi mbo bol khai dê. Jơt bàr nơm be dam neh ngui lơh gơs phan ơn tơwài glài.

⁸⁸ Jơh ală phan poan jơng lơh gơs phan ơn bơta ơn pơdơng ring lơngai dê la bàr jơt poan nơm kơnrồ dam, prau jơt nơm belàt dam, prau jơt nơm be dam mơ prau jơt nơm belàt kòn tơl dô nam. Hơ̆ la ală phan ơn bơh bơta ơn is sàng goh cơnòng duh khoai dê tơnơ̆ mơ tŭ gơ neh geh bong mơñà.

⁸⁹ Tòm tŭ Môise mut tòm Sàl Tòm Mat nàng tòmbơhbơr mơ Yàng Jehôwa, khai kơno sap đơs mơ khai bơh digùl bàr nơm ceruƀim hơđang bơnap bơta nđàc dơp hơđang Đài Bơta Cơng Tàng dê. Mơ khai tòmbơhbơr mơ Kơnràñ.