Khà Làng Bol 4 - Sră Goh 2018

Ală cau Kôhat

¹ Yàng Jehôwa đơs mơ Môise mơ Arôn lah:

² “Kòp tĕ ntum khà mpồl cau Kôhat tòm jơi bơtiàn Lebi jat ală mpồl bơnòr mơ ală hìu nhă bol khai dê,

³ bơh pe jơt nam tus di pram jơt nam, hơ̆ la ală cau rgơi duh broă tòm Sàl Tòm Mat.

⁴ Do la broă lơh ală cau Kôhat dê tòm Sàl Tòm Mat: rcang gàr ală phan sàng goh rlau jơh.

⁵ Tòm tŭ sàl mpồl ling pal tă cèng lòt, Arôn mơ ală kòn klau khai dê pal mut tòm Sàl mơ tă bài kơrnìng mơ jơm Đài Bơta Ho Bal.

⁶ Lồc behơ̆ khai pal jơm đài hơ̆ mơ ală blah gơltau ka sur, lă dô blah bài dà tơlir hơđang hơ̆ mơ srò ală gai tùng di tiah gơ dê.

⁷ Hơđang cơnòng ơn piang lă pơdơng bol khai pal lă dô blah bài tơlir mơ ơn hơđang hơ̆ ală prềng, ală prềng ơn kơlhô mơ ală jơrlŭ, mơ ală gri ơn phan pơdơng ñô; piang lă pràng gơs sùm hơđang hơ̆.

⁸ Gen bol khai pal lă hơđang ală phan hơ̆ mơ dô blah bài dà gur, jơm gơ mơ gơltau ka sur mơ srò ală gai tùng di tiah gơ dê.

⁹ Bol khai pal ai dô blah bài dà tơlir mơ jơm jơng ồs đèng bal mơ ală đèng gơ dê, ală kơtrơi koh brài ồs đèng mơ ală prềng ơn gơ, mơ jơh ală gri ơn mơñà nàng chu ồs đèng.

¹⁰ Gen bol khai pal jơm gơ bal mơ jơh ală phan ngui bal mơ gơtòm dô blah gơltau ka sur mơ ơn gơ hơđang dô nơm thùng nàng tùng.

¹¹ Hơđang cơnòng duh khoai lơh mơ màh bol khai pal lă dô blah bài dà tơlir mơ jơm gòm gơ mơ gơltau be, mơ srò ală gai tùng di tiah gơ dê.

¹² Bol khai pal ai jơh ală phan ngui nàng duh broă tòm tiah sàng goh, klơm gơ mơ dô blah bài dà tơlir, mơ jơm gơ mơ dô blah gơltau be, mơ ơn gơtòm thùng nàng tùng.

¹³ Bol khai pal tă sang bùh bơh di cơnòng duh khoai mơ kòng mơ lă dô blah bài dà gur hơđang gơ.

¹⁴ Gen bol khai pal ơn hơđang gơ jơh ală phan ngui duh broă di cơnòng duh khoai, jơrlŭ chu kơlhô, cơnhŏ sề, ală cơnhŏ dờng, jơrlŭ mơngàn bal mơ ală phan ngui di cơnòng duh khoai. Pal jơm hơđang gơ mơ gơltau ka sur mơ srò ală gai tùng di tiah gơ dê.

¹⁵ Tơnơ̆ mơ tŭ Arôn mơ ală kòn klau khai dê neh sir jơm tiah sàng goh mơ ală phan ngui sàng goh sir rau, tŭ hơ̆ sàl ơm neh rcang sir nàng tă cèng, ală cau Kôhat pal tus nàng tùng ală phan do. Mơya bol khai ò di ƀư ală phan sàng goh rngòt bol khai pal kong chơt mòn. Ală cau Kôhat pal tùng ală phan tòm Sàl Tòm Mat.

¹⁶ Eleajar kòn klau Arôn la cau gơnoar ơn phan duh khoai gơs broă tòm rcang gàr mơñà chu ồs đèng, kơlhô ƀô bơlhu, phan ơn mơ kòi mbo òs ơn mơ mơñà ngui nàng bong. Khai gơs broă tòm rcang gàr jơh dô nơm hìu duh khoai mơ jơh ală phan tòm hơ̆, bal mơ ală phan ngui sàng goh gơrê bal tòm hơ̆.”

¹⁷ Gen Yàng Jehôwa đơs mơ Môise mơ Arôn lah:

¹⁸ “Bañ lòi jơi bơtiàn Kôhat gơkòl tơnroh bơh digùl jơi bơtiàn Lebi.

¹⁹ Do la ală bơta bol mê pal lơh tồ bol khai rgơi kis mơ ò chơt tòm tŭ bol khai tus rềp di ală phan sàng goh rlau jơh. Arôn mơ ală kòn klau khai dê pal mut tòm hìu duh khoai mơ jào kòp nă cau in broă khai pal lơh mơ phan lơi khai pal tùng.

²⁰ Mơya cau Kôhat ò geh mut tòm dơlam nàng sền gŏ ală phan sàng goh, bulah la mìng sền gŏ tòm dô ơthoa lơm, lơh behơ̆ gen bol khai rơp chơt.”

Ală cau Gersôn

²¹ Yàng Jehôwa đơs mơ Môise lah:

²² “Cih tĕ ntum khà jơh ală cau Gersôn jat hìu nhă mơ mpồl hìu nhă bol khai dê.

²³ Kòp tĕ jơh ală cau klau bơh pe jơt tus di pram jơt nam la cau tus nàng duh broă tòm Sàl Tòm Mat.

²⁴ Do la broă lơh ală mpồl hìu nhă Gersôn dê tòm tŭ bol khai lơh broă mơ tùng cèng ală ơnòng kơnjơ̆:

²⁵ bol khai pal tùng ală bài kơrnìng Sàl Ing duh khoai, Sàl Tòm Mat dê, ală blah gơltau ka sur jơm gơ mơ đah bơdìh gơ, bài kơrnìng mpồng mut Sàl Tòm Mat dê,

²⁶ ală bài kơrnìng ƀlàng jơng gùng gùt dar hìu duh khoai mơ cơnòng duh khoai, bài kơrnìng mpồng mut, ală che kơt mơ jơh ală phan ngui tòm broă gơ dê. Ală cau Gersôn pal lơh jơh ală bơta pal càng lơh sir mơ ală phan hơ̆.

²⁷ Jơh bơta duh broă bol khai dê, bulah la tùng cèng hala lơh broă lơi ndai, gen pal lơh sir hơđơm gơnoar lam bồ Arôn mơ ală kòn klau khai dê. Mê pal jào bol khai in broă tòm rcang gàr jơh ală phan bol khai rơp tùng.

²⁸ Hơ̆ la bơta duh broă ală mpồl hìu nhă Gersôn dê tòm Sàl Tòm Mat. Broă lơh bol khai dê pal ơm hơđơm gơnoar lam bồ Ithamar kòn klau Arôn dê, la cau gơnoar ơn phan duh khoai.

²⁹ Kòp khà tĕ ală cau Merari jat ală mpồl mơ hìu nhă bol khai dê.

³⁰ Kòp tĕ jơh ală cau klau bơh pe jơt tus pram jơt nam la ală cau rơp tus duh broă tòm Sàl Tòm Mat.

³¹ Do la broă bol khai pal lơh tòm tŭ bol khai duh broă tòm Sàl Tòm Mat: tùng ală ròc Sàl Ing duh khoai, ală kơrnang, jrong, mơ ală trồm jrong gơ dê,

³² bal mơ ală jrong gùt dar ƀlàng jơng gùng mơ ală trồm jrong, ală gai kơlnĕ kơt sàl, ală che kơt, jơh ală phan ngui mơ ală phan gơrê bal tòm broă ngui gơ dê. Jào tĕ kòp nă cau in phan lơi khai pal tùng.

³³ Hơ̆ la broă lơh ală mpồl hìu nhă cau Merari dê tòm tŭ bol khai lơh broă tòm Sàl Tòm Mat hơđơm gơnoar lam bồ Ithamar kòn klau Arôn dê, la cau gơnoar ơn phan duh khoai.”

Kòp khà cau Lebi jat ală mpồl hìu nhă

³⁴ Môise, Arôn mơ ală cau at bồ mpồl jơnum làng bol kòp khà cau Kôhat jat ală mpồl mơ ală hìu nhă bol khai dê.

³⁵ Jơh ală cau klau bơh pe jơt tus pram jơt nam neh tus duh broă tòm Sàl Tòm Mat,

³⁶ kòp jat ală mpồl hìu nhă la bàr rbô poh rhiang pram jơt nă.

³⁷ Hơ̆ la khà jơh ală cau tòm mpồl Kôhat neh duh broă tòm Sàl Tòm Mat. Môise mơ Arôn neh kòp khà bol khai jat jơnau Yàng Jehôwa neh sồr Môise.

³⁸ Ală cau Gersôn neh geh kòp khà jat mpồl mơ ală hìu nhă bol khai dê.

³⁹ Jơh ală cau klau bơh pe jơt tus pram jơt nam neh tus duh broă tòm broă Sàl Tòm Mat,

⁴⁰ kòp jat ală mpồl mơ ală hìu nhă bol khai dê la bàr rbô prau rhiang pe jơt nă.

⁴¹ Hơ̆ la jơh ală cau tòm mpồl Gersôn neh duh broă tòm Sàl Tòm Mat. Môise mơ Arôn neh kòp khà bol khai jat jơnau sồr Yàng Jehôwa dê.

⁴² Ală cau Merari neh geh kòp khà jat mpồl mơ ală hìu nhă bol khai dê.

⁴³ Jơh ală cau klau bơh pe jơt tus pram jơt nam neh duh broă tòm Sàl Tòm Mat,

⁴⁴ kòp jat ală mpồl hìu nhă bol khai dê la pe rbô bàr rhiang nă.

⁴⁵ Hơ̆ la jơh ală cau tòm mpồl Merari dê. Môise mơ Arôn neh kòp khà bol khai jat jơnau Yàng Jehôwa neh sồr Môise.

⁴⁶ Behơ̆ Môise, Arôn mơ ală cau at bồ Israel dê neh kòp khà jơh ală cau Lebi jat mpồl mơ ală hìu nhă bol khai dê.

⁴⁷ Jơh ală cau klau bơh pe jơt tus pram jơt nam neh duh broă mơ tùng cèng Sàl Tòm Mat,

⁴⁸ ntum khà neh kòp la phàm rbô pram rhiang phàm jơt nă.

⁴⁹ Jat be jơnau Yàng Jehôwa neh sồr Môise gen kòp nă neh geh jào dô nơm broă mơ neh geh sồr pal tui cèng phan lơi. Behơ̆, bol khai neh geh kòp khà jat be jơnau Yàng Jehôwa neh sồr Môise.