Khà Làng Bol 21 - Sră Goh 2018

Làng bol Israel pha rlau mơ bơtau Arat

¹ Tòm tŭ cau bơtau Kanaan tòm Arat ơm tòm Negep kơno lah cau Israel lòt gùng tus hơ Atharim, khai brồ lơh cau Israel mơ kup cèng dô êt nă cau.

² Gen Israel srat să ho nền jơnau do mơ Yàng Jehôwa: “Dilah Kơnràñ jào làng bol do tòm tê bol hi, bol hi rơp tơnroh jơh hir ală ƀòn dờng bol khai dê.”

³ Yàng Jehôwa iat jơnau hòi dan cau Israel dê mơ jào cau Kanaan tòm tê cau Israel. Cau Israel tơnroh jơh hir cau Kanaan mơ ală ƀòn dờng bol khai dê; behơ̆ tiah hơ̆ geh sơnđan la Horma.

Bơs kòng

⁴ Bol khai lik lòt bơh di mơnơm Hôr, jat gùng lòt tus hơ Dàlềng Pơrhê, mơ lòt gùt dar Edôm. Mơya làng bol gơplơ̆ nùs tòm tŭ lòt gùng;

⁵ Bol khai đơs tòmdră mơ Yàng Tom Trồ mơ Môise, mơ đơs lah: “Ñchi bơh tài ồng cèng bol hi lik bơh di Ejiptơ nàng chơt tòm ƀlàng ngềt ngơt taih? Tềng do ò gơs piang lă! Ò gơs dà! Mơ bol hi neh làp dil phan sa iơh rmơh do!”

⁶ Gen Yàng Jehôwa sồr ală bơs bih khih tus digùl bol khai; gơ kap làng bol mơ oă cau Israel neh chơt.

⁷ Làng bol tus hơ Môise mơ đơs lah; “Bol hi neh tìs glài tòm tŭ bol hi đơs tòmdră mơ Yàng Jehôwa mơ tòmdră mơ ồng. Dan hòi dan mơ Yàng Jehôwa tă sang ală bơs bơh di bol hi.” Behơ̆ Môise hòi dan làng bol in.

⁸ Yàng Jehôwa đơs mơ Môise lah: “Lơh gơs tĕ dô nơm bơs khih mơ yồng gơ hơđang dô nơm jrong; cau lơi neh bơs kap tơnggòr sền di gơ gen geh kis.”

⁹ Behơ̆ Môise lơh gơs dô nơm bơs mơ kòng yồng hơđang dô nơm jrong. Gen tòm tŭ cau lơi neh bơs kap mơ tơnggòr sền di bơs kòng gen khai geh kis.

Lòt gùng tus hơ Môap

¹⁰ Cau Israel lik lòt mơ bơtào sàl tòm Ôbôt.

¹¹ Lồc behơ̆ bol khai lik lòt bơh di Ôbôt mơ bơtào sàl ơm tòm Iye Abarim, tòm ƀlàng ngềt ngơt wèt hơ Môap đah mattơngai lik.

¹² Bơh hơ̆ bol khai lik lòt tus mơ bơtào sàl ơm tòm Thòng Jeret.

¹³ Bol khai lik lòt bơh hơ̆ mơ bơtào sàl ơm rò gah Arnôn, tòm ƀlàng ngềt ngơt ơnàng tus hơ nhàr lơgar Amôrit. Hiòng Arnôn la nhàr làng bol Môap dê, digùl Môap mơ Amôrit.

¹⁴ Tài bơh hơ̆ tàng Sră ală Bơta Tòmlơh Yàng Jehôwa dê gơs cih lah: “Wahep tòm Supha mơ ală thòng, hiòng Arnôn,

¹⁵ mơ ală tiah kơh ală thòng lam tus hơ Ar mơ rò gah nhàr Môap.”

¹⁶ Bơh hơ̆ bol khai pơnjat lòt tus Beer, tơrlung dà mơ Yàng Jehôwa neh đơs mơ Môise lah: “Pơjum tĕ làng bol dô bă bal, mơ Añ rơp ai bol khai in dà.”

¹⁷ Gen Israel đơs chò bơta đơs chò do: “Ơ tơrlung dà, hòr lik tĕ! Đơs chò tĕ bơh gơ,

¹⁸ tơrlung dà ală cau at bồ, ală cau ryŭ ryơm neh tò mơ ală gai gơnoar mơ gai jra.” Bơh ƀlàng ngềt ngơt tus hơ Mattana.

¹⁹ Bơh Mattana tus hơ Nahaliel, bơh Nahaliel tus hơ Bamôt,

²⁰ mơ bơh Bamôt tus hơ thòng Môap, mơ bơh bồ mơnơm Pisga cau rgơi sền gŏ ƀlàng ngềt ngơt.

Tòmlơh pha mơ Sihôn mơ Ôk

²¹ Israel sồr ală cau kong sồr nàng đơs mơ Sihôn bơtau làng bol Amôr lah:

²² “Lòi tĕ bol hi lòt gan lơgar bơtau dê. Bol hi ò wèt ma kiau nàng mut tòm ƀlàng sre lơi hala suơn ño lơi, hala hùc dà bơh di tơrlung lơi. Bol hi rơp lòt jat gùng me jơl tus di tŭ bol hi neh lòt gan lơgar bơtau rau.”

²³ Mơya Sihôn ò bài ai Israel lòt gan lơgar khai dê. Khai pơjum jơh mpồl ling khai dê mơ lik lòt tus tòm ƀlàng ngềt ngơt nàng tòmlơh mơ Israel. Tòm tŭ khai neh tus di Jahas, khai tòmlơh mơ Israel.

²⁴ Bulah behơ̆, Israel tơnchơt khai mơ ai lơgar khai dê bơh di Arnôn tus hơ Jabok, mơya mìng tus di cau Ammôn lơm, tài bơh nhàr lơgar khai dê geh rcang gàr kơ̆ cê.

²⁵ Israel tòmpìt ai jơh ală ƀòn dờng cau Amôrit dê mơ mut ơm tòm hơ̆, tơrgòm bal Hesbôn mơ jơh ală ƀòn gùt dar gơ.

²⁶ Hesbôn la ƀòn dờng Sihôn bơtau Amôrit dê, la cau neh tòmlơh tòmdră mơ cau bơtau yau Môap dê, mơ neh tòmpìt ai bơh di khai jơh lơgar khai dê, ngài tus di Arnôn.

²⁷ Tài bơh hơ̆ tàng ală cau jak cih jơnau pơnđik đơs lah: “Tus tĕ hơ Hesbôn mơ lòi tĕ geh bơt bơtào wơl; lòi tĕ ƀòn dờng Sihôn dê geh bơt bơtào wơl.

²⁸ Ồs neh lik bơh di Hesbôn, dô nơm ồs hơng lik bơh di ƀòn dờng Sihôn. Gơ sa roh Ar Môap dê, ală làng bol ơm tòm ală tiah jơnhoa Arnôn dê.

²⁹ Bòl glar mê in, Ơ Môap! Bol mê neh kong tơnroh, ơ làng bol Kemôs! Khai neh lòi ală kòn klau khai dê lòt nrah nring, mơ ală kòn ùr khai dê kong kup cèng pơrdô Sihôn bơtau Amôrit dê.

³⁰ Mơya bol hi neh tòmlơh pha rlau mơ bol khai, Hesbôn neh kong tơnroh jơh hir jơl tus di Dibôn. Bol hi neh phà tơnroh jơh bol khai ngài tus di Nôpha, ồs neh sa rò tus hơ Medeba.”

³¹ Behơ̆ Israel ơm tòm lơgar cau Amôrit dê.

³² Tơnơ̆ mơ tŭ Môise neh sồr ală cau rwang sền lơgar tus hơ Jajer, cau Israel tòmpìt ai ală ƀòn ơm gùt dar mơ ting bơtrơh cau Amôrit neh ơm tềng hơ̆.

³³ Gen bol khai wơlke mơ guh jat gùng lòt hơ Basan, mơ Ôk bơtau Basan dê mơ jơh mpồl ling khai dê lik lòt tòmlơh mơ bol khai di tiah Edrei.

³⁴ Yàng Jehôwa đơs mơ Môise lah: “Bañ rngòt di khai, bơh Añ neh jào khai tòm tê mê dê, bal mơ jơh mpồl ling mơ lơgar khai dê. Lơh tĕ khai in bơta mê neh lơh di Sihôn bơtau cau Amôrit dê neh at bồ tòm Hesbôn.”

³⁵ Behơ̆ bol khai tơnchơt khai bal mơ ală kòn klau khai dê mơ jơh mpồl ling khai dê, ò lòi dô nă cau lơi gam kis. Mơ bol khai tòmpìt ai lơgar khai dê.