Khà Làng Bol 12 - Sră Goh 2018

Miriam mơ Arôn tòmdră mơ Môise

¹ Miriam mơ Arôn đơs tòmdră mơ Môise tài bơh bau ùr cau Kus khai dê, bơh khai neh bau mơ dô nă cau Kus.

² Bol khai lùp lah: “Yàng Jehôwa mìng đơs gan di dô nă Môise lơm sơl ơ? Ò di Kơnràñ kung kơnòm di bol he nàng đơs ò ơ?” Mơ Yàng Jehôwa neh kơno jơnau hơ̆.

³ (Mơ tai, Môise la dô nă cau pơndêt să ngan, pơndêt să rlau mơ jơh ală cau ndai ơm hơđang plai ù.)

⁴ Tŭ hơ̆ mo, Yàng Jehôwa đơs mơ Môise, Arôn mơ Miriam lah: “Lòt tus tĕ hơ Sàl Tòm Mat, jơh pe nă bol mê.” Behơ̆ pe nă bol khai lik lòt.

⁵ Gen Yàng Jehôwa mù tòm dô nơm jrong mhwal; Kơnràñ ntào di mpồng mut tòm Sàl Tòm Mat hòi Arôn mơ Miriam. Tòm tŭ bàr nă bol khai lòt tus,

⁶ Kơnràñ đơs lah: “Iat tĕ jơnau Añ: Tòm tŭ dô nă cau gơnoar hwơr Yàng Jehôwa dê ơm digùl bol mê, Añ yal tơlik să tòm Añ khai in tòm ală bơta gơtơnggŏ, Añ đơs mơ khai tòm ală bơta mpau.

⁷ Mơya ò di behơ̆ mơ cau duh broă Añ jê la Môise, khai la dòn song tòm jơh hìu Añ.

⁸ Añ tòmbơhbơr tòm toh mat mơ khai, đơs loh làng ò đơs jơnau jrô ndơp; khai sền gŏ rùp să Yàng Jehôwa. Behơ̆ ñchi bơh tài bol mê ò rngòt đơs jơnau tòmdră mơ Môise la cau duh broă Añ taih?”

⁹ Bơta gơjrañ Yàng Jehôwa dê gơhào khuh tòmdră mơ bol khai mơ Kơnràñ sang lòi bol khai.

¹⁰ Tòm tŭ mhwal gơguh bơh di Sàl Tòm Mat, Miriam ntào tềng hơ̆, gơs dun bò be piar. Arôn wơlke sền Miriam mơ gŏ khai neh gơs dun.

¹¹ Arôn đơs mơ Môise lah: “Ơ cau tòm añ jê, dan bañ tòmdră mơ bol hi bơh tồi glài mơ bol hi neh tìs dô bă tùl gơla behơ̆.

¹² Dan bañ lòi Miriam gơlik gơs kung be dô nă kòn pa deh neh siar roh nggùl să jan.”

¹³ Behơ̆ Môise hòi dan mơ Yàng Jehôwa lah: “Ơ Yàng Tom Trồ, dan sơmbòi khai in!”

¹⁴ Yàng Jehôwa ho wơl mơ Môise lah: “Dilah bèp khai neh choh dà diau di muh mat khai gen ò di la khai pal kong bơta ƀàssìl ƀàsso tòm poh ngai ò ơ? Ơn is tĕ khai đah bơdìh sàl ơm tòm poh ngai, mơ làng bol ò lik lòt jơl tus di tŭ khai neh geh cèng tơmut wơl tòm sàl.”

¹⁵ Behơ̆ Miriam kong ơn is đah bơdìh sàl ơm tòm poh ngai, mơ làng bol ò gŏ lik lòt jơl tus tŭ khai neh geh cèng tơmut wơl.

¹⁶ Tơnơ̆ mơ hơ̆, làng bol sang lòi Haserôt mơ lòt tus bơtào sàl ơm tòm ƀlàng ngềt ngơt Pharan.