Khà Làng Bol 11 - Sră Goh 2018

Ồs bơh di Yàng Jehôwa

¹ Mơ tai, làng bol yoam bơh ală bơta bòl glar bol khai dê di đap Yàng Jehôwa, mơ tŭ Kơnràñ neh kơno bol khai gen gơhào bơta gơjrañ. Gen ồs bơh di Yàng Jehôwa sa digùl bol khai mơ gơ sa roh dô pơnah sàl ơm.

² Tòm tŭ làng bol hòi driau mơ Môise, khai hòi dan mơ Yàng Jehôwa gen, ồs chơt.

³ Behơ̆ tiah hơ̆ geh sơnđan la Tabera, tài bơh ồs bơh di Yàng Jehôwa neh sa roh bol khai.

Sềm rgut bơh di Yàng Jehôwa

⁴ Làng bol bơdìh ơm mơ bol khai rơp sơntòm kòñ gơs phan sa ndai, mơ dô dơ̆ tai cau Israel sơntòm yoam mơ đơs lah: “Mbe kòñ lơh nàng bol he gơs poac nàng sa taih?

⁵ Bol hi kah wơl ka mơ bol hi neh sa khat gơboh tòm Ejiptơ, kung gơs ală rpung, rpoal, mơ tơl ală jơi điam.

⁶ Mơya tŭ do bol hi ò gơdan sa tai; bol hi ò gŏ phan lơi ndai rlau mơ mana do lơm.”

⁷ Mana gơlơh kung be gar biap ƀô mơ sền gơlơh kung be dà bơsơt chi neh khơt wơl.

⁸ Làng bol lòt gùt dar mơ pơjum tơrgòm gơ, lồc behơ̆ piah. Tơnlề gơtòm dô nơm mpal hala mơ rnai piah kòi. Bol khai gơm gơtòm dô nơm glah hala lơh gơlik gơs be piang lă mơ sa gơ gơlơh kung be phan sa lơh mơ mơñà ôlibe.

⁹ Tòm tŭ dà tŭ gơ mù hơđang sàl ơm tòm trồ mang gen mana kung mù sơl.

¹⁰ Môise kơno làng bol ñìm rac tòm kòp nơm hìu, kòp nă ơm di bơr mpồng sàl bol khai dê. Yàng Jehôwa gơhào gơjrañ ngan, mơ Môise gen ò niam nùs.

¹¹ Khai lùp Yàng Jehôwa lah: “Ñchi bơh tài Kơnràñ cèng tus bơta bòl glar kalke do hơđang cau duh broă Kơnràñ dê taih? Ñchi bơta añ neh lơh ò niam nùs Yàng mơ Kơnràñ neh ơn ơnòng kơnjơ̆ jơh làng bol do dê hơđang añ taih?

¹² Añ neh bun jơh làng bol do sơl ơ? Añ neh tơnggơs bol khai sơl ơ? Ñchi bơh tài Kơnràñ sồr añ kơnđu bol khai tòm tơwòr tê añ jê, kung be dô nă cau ùr kơnđu dô nă kòn dềt, tus hơ lơgar mơ Kơnràñ neh srat să ho ai ồng pàng bol khai in taih?

¹³ Ntềng đah añ rgơi gơs poac jơh làng bol do in sa taih? Bol khai kư̆ rac ròc mơ añ sùm lah: ‘Dan ai bol hi in sa poac!’

¹⁴ Să tòm añ ò rgơi rcang gàr jơh dô nơm làng bol do; ơnòng kơnjơ̆ añ ò jai kong.

¹⁵ Dilah do la bơta Kơnràñ lơh gơwèt mơ añ mơ dilah añ geh bơta nđàc di đap Yàng, gen dan tơnchơt tĕ añ nàng añ ò gŏ bơta bòl glar kalke añ jê.”

¹⁶ Yàng Jehôwa đơs mơ Môise lah: “Lam tĕ hơ Añ poh jơt nă cau kwang kra Israel dê la ală cau mê neh git la cau lam bồ mơ kwang at bồ digùl làng bol. Sồr bol khai tus hơ Sàl Tòm Mat nàng bol khai ntào tềng hơ̆ bal mơ mê.

¹⁷ Añ rơp mù tus mơ tòmbơhbơr mơ mê tềng hơ̆, mơ Añ rơp ai Hwềng neh ơm hơđang mê mơ ơn Hwềng hơ̆ hơđang bol khai. Bol khai rơp dong kòl mê àñ ơnòng kơnjơ̆ làng bol dê tồ mê rơp ò àñ ơnòng is mìng dô nă mê lơm.

¹⁸ Yal tĕ làng bol in lah: ‘Ơn is tĕ să tòm bol mê dê sàng goh nàng rcang sir ngai hìng in, mơ bol mê rơp sa poac. Yàng Jehôwa neh kơno bol mê rac ròc mơ đơs lah: “Mbe kòñ lơh nàng bol he gơs poac nàng sa taih?” Bol he neh geh tơngkah tơngkañ tòm Ejiptơ. Tŭ do Yàng Jehôwa rơp ai poac bol mê in, mơ bol mê rơp sa poac.

¹⁹ Bol mê rơp ò di sa poac mìng tòm dô ngai lơm, hala bàr ngai, hala pram ngai, jơt ngai hala bàr jơt ngai,

²⁰ mơya tơl jơh tòm dô kơnhai, jơl tus di tŭ poac gơ rơp lik bơh di trồm muh bol mê dê, mơ bol mê làp dil gơ, tài bơh bol mê neh sang lòi Yàng Jehôwa la Bơtau ơm digùl bol mê, mơ bol mê neh rac ròc di đap Kơnràñ mơ đơs lah: “Ñchi bơh tài bol hi neh sang lòi Ejiptơ taih?”’”

²¹ Mơya Môise đơs lah: “Do añ ơm digùl prau rhiang rbô nă cau klau pràn kơldang, mơ Kơnràñ đơs lah: ‘Añ rơp ai bol khai in poac nàng sa tòm jơh dô kơnhai!’

²² Dilah lơh poac jơh ală kơnrồ mơ belàt gen rơp geh tơl bol khai in sa sơl ơ? Dilah kup jơh ală ka tòm dàlềng bol khai in sa gen rơp geh tơl bol khai in sơl ơ?”

²³ Yàng Jehôwa ho wơl Môise in lah: “Tơwòr tê Yàng Jehôwa dê la liah ngan sơl ơ? Mê rơp sền gŏ jơnau Añ đơs rơp gơlik gơs di ngan mê in hala ò.”

²⁴ Behơ̆ Môise lik di tiah mơ đơs mơ làng bol ală jơnau Yàng Jehôwa neh đơs. Khai cèng bal poh jơt nă cau kwang kra làng bol dê, mơ sồr bol khai ơm ntào gùt dar Hìu Ing Duh Khoai.

²⁵ Lồc behơ̆ Yàng Jehôwa mù tus tòm dô puk mhwal mơ tòmbơhbơr mơ khai, mơ Kơnràñ ai Hwềng neh ơm hơđang khai mơ ơn Hwềng hơđang poh jơt nă cau kwang kra. Tòm tŭ Hwềng neh ơm hơđang bol khai gen bol khai đơs hwơr, mơya bol khai ò pơnjat đơs hwơr tai.

²⁶ Bulah behơ̆, gơs bàr nă cau klau sơnđan la Eldat mơ Medat neh ơm wơl tòm sàl. Bol khai neh kòp bal mơ ală cau kwang kra mơya ò gŏ lòt tus hơ Sàl Tòm Mat. Bulah behơ̆, Hwềng neh ơm hơđang bol khai, mơ bol khai đơs hwơr tòm sàl.

²⁷ Dô nă cau pơnu ntoat tus yal mơ Môise lah: “Eldat mơ Medat neh đơs hwơr tòm sàl.”

²⁸ Jôsue kòn klau Nun la cau bơh di tŭ gam pơnu neh ơm dong kòl Môise, ai jơnau đơs lah: “Ơ Môise, cau tòm añ jê, dan bơkơ̆u bol khai!”

²⁹ Mơya Môise ho wơl lah: “Bol mê gơjrañ kơuềng ala añ sơl ơ? Añ kơp kòñ jơh làng bol Yàng Jehôwa dê la ală cau gơnoar hwơr mơ Yàng Jehôwa rơp ơn Hwềng Kơnràñ dê hơđang bol khai!”

³⁰ Lồc behơ̆ Môise mơ ală cau kwang kra Israel dê rê wơl tòm sàl.

³¹ Mơ tai, dô nơm càl lik bơh di Yàng Jehôwa mơ khồm tơrgòm sềm rgut bơh di dàlềng gơdùh gùt dar sàl ơm, pơgap dô ngai lòt gùng tòm ală đah gùt dar sàl ơm, mơ pơgap pe tal lơut bơh di ù.

³² Jơh tòm dô ngai mơ mang hơ̆ mơ jơh tòm dô ngai hìng tai sơl, làng bol lik di tiah mơ dòñ tơrgòm sềm rgut. Ò gơs cau lơi neh dòñ tơrgòm dô êt rlau mơ jơt hômer. Gen bol khai blah mơ is gùt dar sàl.

³³ Mơya tòm tŭ poac gam sa tòm bơr, mơ lài mơ tŭ rgơi sa loan gen bơta gơjrañ Yàng Jehôwa dê neh gơhào khuh tòmdră mơ làng bol, mơ Kơnràñ tơnroh bol khai bơh dô bơta kòp jê pluh plàng kơnjơ̆ ngan.

³⁴ Gen tàng tiah hơ̆ geh sơnđan la Kiprôt Hathaba tài bơh tềng hơ̆ bol khai tơp ƀồc làng bol jròk sa.

³⁵ Bơh di Kiprôt Hathaba làng bol lòt gùng tus hơ Haserôt mơ ơm wơl tềng hơ̆.