Khà Làng Bol 1 - Sră Goh 2018

Rcang lik lòt ( 1:1 – 10:10 ) Cih khà làng bol

¹ Yàng Jehôwa đơs mơ Môise tòm Sàl Tòm Mat tòm ƀlàng ngềt ngơt Sinai tòm ngai dùl kơnhai bàr nam bàr tơnơ̆ mơ tŭ cau Israel neh lik lòt bơh di Ejiptơ lah:

² “Sền sơwì tĕ khà jơh mpồl jơnum cau Israel dê jat ală mpồl mơ hìu nhă bol khai dê, cih tĕ jơh kòp nă jat sơnđan khai dê.

³ Mê mơ Arôn pal kòp cau Israel jat ală mpồl bol khai dê, jơh ală cau klau bàr jơt nam hala dờng rlau, la ală cau klau rgơi duh broă tòm mpồl ling.

⁴ Dô nă tòm kòp jơi bơtiàn, kòp nă cau tòm at bồ hìu nhă pal dong kòl mê.

⁵ Do la sơnđan mat ală cau klau rơp dong kòl mê: bơh dê Ruben gơs Elijur kòn klau Sedeur;

⁶ bơh di Simeôn gơs Selumiel kòn klau Jurisadai;

⁷ bơh di Juda gơs Nasôn kòn klau Amminadap;

⁸ bơh di Issaka gơs Nethanel kòn klau Suar;

⁹ bơh di Jebulun gơs Eliap kòn klau Helôn;

¹⁰ bơh di ală kòn klau Jôsep: gen bơh di Epraim gơs Elisama kòn klau Ammihut, bơh di Manase gơs Gamaliel kòn klau Phedajur;

¹¹ bơh di Benjamin gơs Abidan kòn klau Gideôni;

¹² bơh di Dan gơs Ahiejer kòn klau Ammisadai;

¹³ bơh di Aser gơs Phagiel kòn klau Ôkran;

¹⁴ bơh di Gat gơs Eliasap kòn klau Deuel;

¹⁵ bơh di Neptali gơs Ahira kòn klau Enan.”

¹⁶ Hơ̆ la ală cau klau neh geh pồ bơtào bơh mpồl jơnum gơs cau at bồ ală jơi bơtiàn ồng pàng bol khai dê. Bol khai la ală cau at bồ ală mpồl hìu nhă Israel dê.

¹⁷ Môise mơ Arôn cèng ală cau gơs sơnđan mat cih hơđang do,

¹⁸ mơ bol khai hòi pơjum jơh dô mpồl jơnum tòm ngai dùl kơnhai bàr. Làng bol yal sơnđan ồng pàng bol khai dê jat mpồl hìu nhă mơ hìu nhă bol khai dê, mơ ală cau klau bàr jơt nam hala dờng rlau neh geh cih sơnđan kòp nă,

¹⁹ jat be jơnau Yàng Jehôwa neh sồr Môise. Behơ̆ khai kòp khà bol khai tòm ƀlàng ngềt ngơt Sinai:

²⁰ Bơh di kòn sau Ruben la kòn klau tơnhoa Israel dê: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan mat kòp nă, jat be sră cih sơnđan mat mpồl hìu nhă mơ hìu nhă bol khai dê.

²¹ Ntum khà bơh di jơi bơtiàn Ruben la poan jơt prau rbô pram rhiang nă.

²² Bơh di kòn sau Simeôn: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan kòp nă, jat be sră cih sơnđan mat mpồl hìu nhă mơ hìu nhă bol khai dê.

²³ Ntum khà bơh di jơi bơtiàn Simeôn la pram jơt sin rbô pe rhiang nă.

²⁴ Bơh di kòn sau Gat: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan mat kòp nă, jat be sră cih sơnđan mpồl hìu nhă mơ hìu nhă bol khai dê.

²⁵ Ntum khà bơh di jơi bơtiàn Gat la poan jơt pram rbô prau rhiang pram jơt nă.

²⁶ Bơh di kòn sau Juda: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan kòp nă, jat be sră cih sơnđan mpồl hìu nhă mơ hìu nhă bol khai dê.

²⁷ Ntum khà bơh di jơi bơtiàn Juda la poh jơt poan rbô prau rhiang nă.

²⁸ Bơh di kòn sau Issaka: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan kòp nă, jat be sră cih sơnđan mpồl hìu nhă mơ hìu nhă bol khai dê.

²⁹ Ntum khà bơh di jơi bơtiàn Issaka la pram jơt poan rbô poan rhiang.

³⁰ Bơh di kòn sau Jebulun: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan mat kòp nă, jat be sră cih sơnđan mpồl hìu nhă mơ hìu nhă bol khai dê.

³¹ Ntum khà bơh di jơi bơtiàn Jebulun la pram jơt poh rbô poan rhiang nă.

³² Bơh di ală kòn klau Jôsep: Bơh di kòn sau Epraim: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan kòp nă, jat be sră cih sơnđan mpồl hìu nhă mơ hìu nhă bol khai dê.

³³ Ntum khà bơh di jơi bơtiàn Epraim la poan jơt rbô pram rhiang nă.

³⁴ Bơh di kòn sau Manase: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan kòp nă, jat be sră cih sơnđan mpồl hìu nhă mơ hìu nhă bol khai dê.

³⁵ Ntum khà bơh di jơi bơtiàn Manase la pe jơt bàr rbô bàr rhiang.

³⁶ Bơh di kòn sau Benjamin: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan kòp nă, jat be sră cih sơnđan mpồl hìu nhă mơ hìu nhă bol khai dê.

³⁷ Ntum khà bơh di jơi bơtiàn Benjamin la pe jơt pram rbô poan rhiang nă.

³⁸ Bơh di kòn sau Dan: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan kòp nă, jat be sră cih sơnđan mat mpồl hìu nhă mơ hìu nhă bol khai dê.

³⁹ Ntum khà bơh di jơi bơtiàn Dan la prau jơt bàr rbô poh rhiang nă.

⁴⁰ Bơh di kòn sau Aser: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan kòp nă, jat be sră cih sơnđan mpồl hìu nhă mơ hìu nhă bol khai dê.

⁴¹ Ntum khà bơh di jơi bơtiàn Aser la poan jơt dùl rbô pram rhiang nă.

⁴² Bơh di kòn sau Neptali: Jơh ală cau klau bàr jơt nam hala dờng rlau la cau rgơi duh broă tòm mpồl ling neh geh cih sơnđan mat kòp nă, jat be sră cih sơnđan mpồl hìu nhă mơ hìu nhă bol khai dê.

⁴³ Ntum khà bơh di jơi bơtiàn Neptali la pram jơt pe rbô poan rhiang nă.

⁴⁴ Hơ̆ la ală cau klau neh geh kòp khà bơh Môise mơ Arôn mơ jơt bàr nă cau at bồ Israel dê, kòp nă ala mat hìu nhă khai dê.

⁴⁵ Jơh ală cau Israel bàr jơt nam hala dờng rlau la ală cau rgơi duh broă tòm mpồl ling neh geh kòp khà jat ală hìu nhă bol khai dê.

⁴⁶ Ntum khà làng bol jơh tơl nă la prau rhiang pe rbô pram rhiang pram jơt nă.

⁴⁷ Bulah behơ̆, khà cau tòm ală hìu nhă jơi bơtiàn Lebi ò kòp bal mơ ală cau ndai.

⁴⁸ Yàng Jehôwa đơs mơ Môise lah:

⁴⁹ “Mê ò di kòp khà cau jơi bơtiàn Lebi hala tơmut bol khai tòm khà ală cau Israel ndai.

⁵⁰ Gơpơrlơ̆ wơl, pồ bơtào tĕ ală cau Lebi tòm broă sền gàr Sàl Ing Duh Khoai Bơta Ho Bal dê, sền gàr jơh ală phan ngui bal mơ gơ mơ jơh ală phan gơrê bal mơ gơ. Bol khai pal tùng cơnòng Hìu Duh Khoai mơ jơh ală phan ngui bal mơ gơ; bol khai pal rcang gàr gơ mơ bơtào sàl ơm bol khai dê gùt dar gơ.

⁵¹ Tŭ lơi Hìu Duh Khoai pal cèng lòt gen ală cau Lebi pal tă tơmù gơ, mơ tŭ lơi Hìu Ing Duh Khoai pal bơtào wơl gen ală cau Lebi pal lơh bơta hơ̆. Cau lơi ndai lòt tus rềp gen pal kong tơnchơt.

⁵² Ală cau Israel pal bơtào sàl ơm bol khai dê jat ală mpồl hìu nhă bol khai dê, kòp nă jat mpồl hìu nhă khai dê mơ hơđơm bồng bi tòm khai dê.

⁵³ Bulah behơ̆, ală cau Lebi pal bơtào sàl ơm bol khai dê gùt dar Đài Bơta Ho bal dê tồ bơta gơjrañ dờng rơp ò dùh hơđang mpồl jơnum Israel dê. Ală cau Lebi gơs broă tòmpal rcang gàr Hìu Ing Cơng Tàng dê.”

⁵⁴ Ală cau Israel lơh jơh ală bơta hơ̆ jat be jơnau Yàng Jehôwa neh sồr Môise.