Jôsue 24 - Sră Goh 2018

Lơh pa wơl bơta ho bal tòm Sicem

¹ Gen Jôsue pơjum bal jơh ală jơi bơtiàn Israel dê tòm Sicem. Khai hòi jơh ală cau kwang kra, ală cau kwang at bồ, ală cau kwang cahrña, mơ jơh ală cau kwang ling Israel dê, mơ bol khai tus pơjum bal di đap Yàng Tom Trồ.

² Jôsue đơs mơ jơh làng bol lah: “Jehôwa Yàng Tom Trồ Israel dê đơs be do lah: ‘Neh jŏ jòng ngan, ồng pàng bol mê dê la Terah bèp Abraham mơ Nahôr dê, bol khai ơm kis đah ne hiòng Ơphrat, mơ duh khoai ală yàng ndai.

³ Mơ Añ neh tă tơlik ồng pàng bol mê dê la Abraham bơh lơgar đah ne hiòng mơ lam khai làm lơgar Kanaan, mơ ai khai in gơs oă kòn sau. Añ neh ai khai in Isak,

⁴ mơ bơh Isak Añ ai Jakôp mơ Esau. Añ neh ai Esau in lơgar mơnơm Seir nàng lơh phan tòm, mơya Jakôp mơ ală kòn khai dê neh mù hơ Ejiptơ.

⁵ Gen Añ neh sồr Môise mơ Arôn, Añ neh đùh bơta pluh plàng hơđang cau Ejiptơ bơh ală broă Añ neh lơh tềng hơ̆, mơ Añ neh lam bol mê lik bơh hơ̆.

⁶ Tòm tŭ Añ neh lam ală ồng pàng bol mê dê lik bơh Ejiptơ, bol mê neh tus hơ dàlềng pơrhê, mơ ală cau Ejiptơ neh ting jat ồng pàng bol mê dê mơ rơndeh lòs tòmlơh mơ ală cau ling hào ơseh tus hơ Dàlềng Pơrhê.

⁷ Mơya bol khai hòi dan Yàng Jehôwa dong kòl, gen Kơnràñ ơn bơta klam jơngo digùl bol mê mơ cau Ejiptơ; Kơnràñ sồr dàlềng bồr bol khai. Bol mê neh gŏ mơ mat tòm bol mê dê bơh ală bơta Añ neh lơh cau Ejiptơ in. Tơnơ̆ mơ tŭ bol mê neh ơm jŏ jòng tòm ƀlàng ngềt ngơt.

⁸ Añ neh lam bol mê tus tòm lơgar làng bol Amôrit ơm đah ne hiòng Jordan. Bol hơ̆ neh tòmlơh mơ bol mê, mơya Añ neh jào bol khai tòm tê bol mê dê. Añ neh tơnroh bol khai bơh di đap bol mê, mơ bol mê neh ai lơgar bol khai dê lơh gơs sre brê bol mê in.

⁹ Gen bơtau Balak kòn klau Jippor, bơtau Môap dê, rcang tòmlơh mơ Israel; khai sồr cau lòt jà Balaam, kòn klau Beôr, nàng srat sơntơm bol mê.

¹⁰ Mơya Añ ò bài iat Balaam; gen tàng khai neh ai lơngai bol mê in oă dơ̆, mơ Añ neh dong tă bol mê klàs bơh di tê khai.

¹¹ Lồc behơ̆ bol mê neh tiă hiòng Jordan mơ tus hơ Jerikô. Làng bol Jerikô tòmlơh mơ bol mê, kung be ală làng bol Amôrit, Pherijit, Kanaan, Hetit, Girgasit, Hebit mơ Jebusit, mơ Añ neh jào bol khai tòm tê bol mê dê.

¹² Añ neh sồr òng lòt lài mơ bol mê nàng ting bơtrơh bol khai bơh di đap bol mê, bal mơ bàr nă cau bơtau Amôrit dê; hơ̆ ò di bơh đào bol mê dê hala àtak bol mê dê.

¹³ Añ neh ai bol mê in dô nơm lơgar mơ bol mê ò kong bòl glar nàng gơs, ală ƀòn dờng mơ bol mê ò bơt, bol mê neh ơm tềng hơ̆ mơ sa ală suơn ño mơ ală suơn ôlibe mơ bol mê neh ò tam.’

¹⁴ Behơ̆ gen tàng duh rngòt tĕ dê Yàng Jehôwa, mơ duh broă tĕ Kơnràñ dô bă jơh nùs dòn song, sang tĕ ngài bơh di bol mê ală yàng mơ ală ồng pàng bol mê neh duh broă đah ne hiòng mơ tòm lơgar Ejiptơ; duh broă tĕ Yàng Jehôwa.

¹⁵ Dilah bol mê ò bài duh broă Yàng Jehôwa, gen bol mê sac rwah tĕ tòm ngai do yàng lơi mơ bol mê rơp duh broă, ală yàng ală ồng pàng bol mê dê neh duh broă đah ne hiòng Ơphrat, hala ală yàng làng bol Amôrit dê tòm lơgar bol mê ơm. Mơya añ mơ hìu nhă añ jê, bol hi rơp duh broă Yàng Jehôwa.”

¹⁶ Gen làng bol ho lah: “Ò gơs tŭ lơi bol hi sang lòi Yàng Jehôwa nàng duh broă ală yàng ndai!

¹⁷ Bơh hơ̆ la să tòm Jehôwa Yàng Tom Trồ bol hi dê neh cèng bol hi mơ ală ồng pàng bol hi dê lik bơh Ejiptơ, bơh di lơgar bol hi ơm dĭ, mơ neh lơh ală bơta krơi di đap bol hi, Kơnràñ neh sền gàr bol hi tòm jơh gùng lòt bol hi dê, mơ digùl ală làng bol mơ bol hi neh lòt gan.

¹⁸ Yàng Jehôwa neh ting bơtrơh bơh di đap bol hi jơh ală làng bol, làng bol Amôrit ơm tòm lơgar. Behơ̆ bol hi kung rơp duh broă Yàng Jehôwa, tài bơh Kơnràñ la Yàng Tom Trồ bol hi dê.”

¹⁹ Jôsue đơs mơ làng bol lah: “Bol mê ò rgơi duh broă Yàng Jehôwa. Kơnràñ la Yàng Tom Trồ sàng goh; Kơnràñ la Yàng Tom Trồ gơjrañ di rùp ràk. Kơnràñ rơp ò toh bơta lơh tìs mơ bơta tồi glài bol mê dê.

²⁰ Dilah bol mê sang lòi Yàng Jehôwa mơ duh broă ală yàng lơgar bơdìh dê, Kơnràñ rơp tơrwơl mơ đùh bơta rung rài mơ tơnroh bol mê tơnơ̆ mơ tŭ Kơnràñ neh lơh niam bol mê in.”

²¹ Mơya làng bol đơs mơ Jôsue lah: “Bol hi ò lơh behơ̆ ò, bol hi rơp duh broă Yàng Jehôwa.”

²² Gen Jôsue đơs mơ làng bol lah: “Bol mê la ală cau lơh cơng să tòm he in lah bol mê neh sac rwah duh broă Yàng Jehôwa.” Bol khai đơs lah: “Ngan, bol hi la ală cau lơh cơng bơh bơta hơ̆.”

²³ Gen Jôsue đơs lah: “Behơ̆, tŭ do sang tĕ ală yàng lơgar bơdìh bơh digùl bol mê, mơ ơn nùs bol mê Yàng Jehôwa in la Yàng Tom Trồ Israel dê.”

²⁴ Làng bol đơs mơ Jôsue lah: “Bol hi rơp duh broă Jehôwa Yàng Tom Trồ bol hi dê mơ bol hi rơp dòn bơr Kơnràñ.”

²⁵ Behơ̆, tòm ngai hơ̆ Jôsue bơtào dô bơta ho bal mơ làng bol, mơ bơtào gơs ală bơta lơh nền mơ ală bơta boh lam bol khai in tòm Sicem.

²⁶ Mơ Jôsue cih ală jơnau hơ̆ tòm Sră Bơta Boh Lam Yàng Tom Trồ dê. Gen khai ai dô pơnai lŭ dờng mơ bơtào gơ hơđơm tòm cha rềp di tiah sàng goh Yàng Jehôwa dê.

²⁷ Gen Jôsue đơs mơ làng bol lah: “Sền tĕ, pơnai lŭ do rơp lơh cơng bol he in. Gơ neh kơno jơh ală jơnau Yàng Jehôwa neh đơs mơ bol he. Gơ rơp lơh cơng tòmdră di bol mê dilah bol mê ò ơm song mơ Yàng Tom Trồ bol mê dê.”

²⁸ Gen Jôsue ai làng bol in rê, kòp nă rê hơ sre brê tòm he dê.

Bơta chơt Jôsue mơ Eleajar

²⁹ Tơnơ̆ mơ ală bơta hơ̆, Jôsue kòn klau Nun, cau duh broă Yàng Jehôwa dê, chơt tòm tŭ neh dô rhiang jơt sơnam.

³⁰ Cau tơp khai tòm ù tiah sre brê khai dê tòm Thimnat Serah tòm lơgar kơh mơnơm Epraim dê, đah đang mơnơm Gaas.

³¹ Làng bol Israel duh broă Yàng Jehôwa jơl jơh rài Jôsue dê, mơ tòm jơh rài ală cau kwang kra kis jŏ rlau mơ Jôsue mơ neh git ală broă Yàng Jehôwa neh lơh Israel in.

³² Ntìng ƀồc Jôsep dê mơ làng bol Israel neh cèng bơh Ejiptơ, gen cau neh tơp gơtòm Sicem, tòm pơnah ù mơ Jakôp neh blơi mơ dô rhiang pet priă bơh ală kòn klau Hemôr bèp Sicem dê. Tiah hơ̆ gơlik gơs sre brê ală kòn sau Jôsep dê.

³³ Eleajar, kòn klau Arôn chơt mơ geh tơp tòm Gibeah la ù tiah neh tòmpà ai Phineas, kòn klau khai in, tòm lơgar kơh mơnơm Epraim dê.