Jôsue 1 - Sră Goh 2018

Tòmpìt ai lơgar Kanaan ( 1:1 – 12:24 ) Yàng Tom Trồ jào gơnoar broă Jôsue in

¹ Tơnơ̆ mơ tŭ Môise cau duh broă Yàng Jehôwa dê neh chơt, Yàng Jehôwa đơs mơ Jôsue kòn klau Nun, cau dong broă Môise dê lah:

² “Môise, cau duh broă Añ jê neh chơt; tŭ do mê mơ jơh làng bol do guh tĕ, tiă hiòng Jordan mơ mut tòm lơgar mơ Añ rơp ai làng bol Israel in.

³ Tiah lơi jơng mê jă gen Añ rơp ai bol mê in, be Añ neh ho mơ Môise.

⁴ Bơh ƀlàng ngềt ngơt mơ tiah Liban do jơl tus di hiòng dờng, la hiòng Ơphrat, mơ jơh ù tiah làng bol Hetit dê, tus di Dàlềng Dờng đah mattơngai mut la ù tiah bol mê dê.

⁵ Ò gơs cau lơi rgơi tòmdră jai mơ mê tòm jơh ală ngai tòm rài kis mê dê, Añ neh ơm mơ Môise be lơi gen Añ kung rơp ơm mơ mê behơ̆ sơl. Añ rơp ò tŭ lơi sang mê, kung ò tŭ lơi lòi mê.

⁶ Lơh tĕ pràn kơldang mơ khin cha, bơh mê rơp ơn làng bol do tòm lơgar Añ ai bol khai in lơh gơs sre brê jat be Añ neh srat să ho nền mơ ală ồng pàng bol khai dê.

⁷ Mìng lơh tĕ pràn kơldang mơ khin cha, kơrhia lơh jat jơh ală bơta boh lam mơ Môise la cau duh broă Añ jê neh sồr mê; bañ wèt hơ đah ma hala đah kiau tồ tiah lơi mê lòt kung rơp gơlik cồng nha.

⁸ Sră bơta boh lam do bañ ngài bơh di bơr mê, kơlôi sơnơng tĕ gơ ngai mơ mang, nàng kơrhia lơh jat jơh ală bơta neh cih tòm hơ̆; behơ̆ sồng mê rơp geh bơtoah tòm gùng dà mê dê mơ gơlik cồng nha.

⁹ Añ do neh ai jơnau gơnoar sồr mê in: Lơh tĕ pràn kơldang mơ khin cha. Bañ rơm să rngòt; bañ rngòt rngơt, bơh Jehôwa Yàng Tom Trồ mê dê rơp ơm bal mơ mê tiah lơi mê lòt.”

Rcang tòmpìt lơgar

¹⁰ Gen Jôsue ai jơnau gơnoar sồr ală cau kwang làng bol in lah:

¹¹ “Lòt tĕ làm ală sàl làng bol dê mơ sồr bol khai: ‘Rcang sir tĕ phan ngui sa bol mê dê. Tòm pe ngai tai ală bol mê rơp tiă hiòng Jordan do, nàng lòt dòp lơgar mơ Jehôwa Yàng Tom Trồ bol mê dê ai bol mê in lơh gơs phan tòm.’”

¹² Mơya gơwèt mơ ală cau jơi bơtiàn Ruben, jơi bơtiàn Gat mơ nggùl jơi bơtiàn cau Manase, gen Jôsue đơs mơ bol khai lah:

¹³ “Kah tĕ jơnau Môise cau duh broă Yàng Jehôwa dê neh nting sồr bol mê lah: ‘Jehôwa Yàng Tom Trồ bol mê dê neh rcang ai bol mê in dô bă tiah nàng rlô mơ rơp ai lơgar do bol mê in.’

¹⁴ Ală bau ùr, ală kòn, bal mơ ală phan poan jơng bol mê dê rơp ơm wơl tòm lơgar mơ Môise neh ai bol mê in đah ne hiòng Jordan. Mơya jơh ală cau ling digùl bol mê pal tiă lài mơ ală oh mi bol mê dê nàng dong kòl bol khai,

¹⁵ jơl tus di tŭ Yàng Jehôwa ai ală oh mi bol mê in bơta rlô lơngai kung be neh ai bol mê in, mơ bol khai kung dòp geh sre brê mơ Jehôwa Yàng Tom Trồ ai bol khai in. Gen bol mê rơp rê wơl hơ ù tiah bol mê dê mơ dòp sre brê gơ dê, ù tiah mơ Môise cau duh broă Yàng Jehôwa dê neh ai bol mê in đah mattơngai lik hiòng Jordan.”

¹⁶ Bol khai ho Jôsue lah: “Bol hi rơp lơh jơh ală bơta lơi ồng sồr bol hi lơh, mơ lòt tiah lơi ồng sồr bol hi lòt.

¹⁷ Be bol hi neh dòn bơr Môise tòm jơh ală bơta, gen bol hi kung rơp dòn bơr ồng behơ̆ sơl. Mìng dan Jehôwa Yàng Tom Trồ ồng dê ơm bal mơ ồng kung be Kơnràñ neh ơm bal mơ Môise.

¹⁸ Cau lơi tòmdră mơ gơnoar sồr ồng dê, mơ ò lơh jat jơnau sồr ồng dê, gen cau hơ̆ rơp kong tơnchơt. Mìng lơh tĕ pràn kơldang mơ khin cha!”