Jơnau Pơnđik 9 - Sră Goh 2018

Bơta hòi jà bơta jak chài dê mơ bơta tùl gơla dê

¹ Bơta jak chài neh bơt bơtào hìu khai; Khai neh trah gơs poh nơm jrong khai dê;

² Lơh poac phan poan jơng mơ bơcă mơ tơrnòm ño khai dê, khai kung rcang yò sa di cơnòng sa khai dê.

³ Khai neh sồr ală cau ơruh dong broă khai dê lik lòt; Bơh hơđang ală tiah jơnhoa ƀòn dê khai hòi driau lah:

⁴ “Ñcau lơi tùl gơla, pleh tĕ tềng do!” Gơwèt mơ cau siơ̆u bơta wă wơng, khai đơs lah:

⁵ “Tus tĕ sa ƀañ añ jê, Mơ ñô tơrnòm añ neh bơcă.

⁶ Pal sang tĕ bơta bơrngơl gơla, gen rơp geh bơta kis; Lòt jat tĕ gùng àng loh.”

Ală jơnau pơnđik òs ngui oă

⁷ Cau lơi bơto tơngkah cau òs dơñŏ tơnhial gen rơp gơtìp bơrsèl tơnhial, Cau lơi lah pơrhơng cau iơh bơsak gen rơp kong jê sồt.

⁸ Bañ lah pơrhơng cau dơñŏ tơnhial, rngòt khai gơjrañ kòn; Lah pơrhơng tĕ cau jak chài, gen khai rơp kòñ gơboh kòn.

⁹ Bơto tơngkah tĕ cau jak chài, gen bol khai rơp geh jak chài rlau; Bơto sồr tĕ cau song ring, gen bol khai rơp geh bơtơl bơta git wă.

¹⁰ Bơta duh rngòt di Yàng Jehôwa, hơ̆ la sơntòm bơta jak chài; Bơta đal git Bơtau Goh, hơ̆ la bơta àng jak.

¹¹ Bơh kơnòm di añ, ală ngai kòn rơp geh bơtơl oă, Mơ ală sơnam rơp geh bơtơl oă bơta kis kòn in.

¹² Dilah kòn jak chài, gen gơs kwơ să tòm kòn in; Dilah kòn dơñŏ tơnhial, gen mìng să tòm kòn pal àñ is.

Jơnau hòi jà mơ ho pơgon tùl gơla

¹³ Cau ùr tùl gơla jak driau nggà, khai la bơrngơl gơla ò git dô êt lơi.

¹⁴ Khai nggui di mpồng hìu khai, Hơđang dô nơm cơnòng di tiah jơnhoa ƀòn dê,

¹⁵ Nàng hòi jà ală cau lòt gùng, hơ̆ la ală cau lòt song gùng bol khai lah:

¹⁶ “Cau lơi bơrngơl gơla mut tĕ tềng do!” Mơ khai đơs mơ cau siơ̆u bơta git wă lah:

¹⁷ “Dà kơñau la lơngồt ngan, Ƀañ sa òm la bơkah ò git lơh.”

¹⁸ Ală cau ò git lah cau chơt ơm tềng hơ̆, Mơ ală cau nac ùr hơ̆ dê gen ơm tòm tiah jrô lơgar làng ƀồc dê.