Jơnau Pơnđik 8 - Sră Goh 2018

Jơnau hòi jà bơta jak chài dê

¹ Ngan bơta jak chài ò hòi driau ơ? Ngan bơta àng loh ò yal tơlik jơnau he ơ?

² Bơta jak chài ntào hơđang ală tiah jơnhoa, Di gah gùng di sơnah poan.

³ Rềp di mpồng dờng, di gùng mut tòm dơlam ƀòn, Bơh gùng mut mpồng dờng, bơta jak chài hòi driau lah:

⁴ “Ơ jơi kòn mơnus, añ hòi jà bol mê, Añ hòi jà jơh kòn mơnus!

⁵ Ơ ală cau tùl gơla, bơtê tĕ bơta git kơrhia; Ơ cau siơ̆u bơta jak chài, jòi jat tĕ gơ.

⁶ Iat tĕ, bơh añ rơp đơs bơta màng ryŭ, Bơh sơndồi añ rơp gơlik bơta song ngan.

⁷ Bơh bơr añ rơp đơs jơnau song; Ai sơndồi añ gơjrañ di bơta iơh rmơh.

⁸ Ală jơnau bơr añ đơs la song ring, Ò gơs bơta rkwet rkwe hala lac lèo tòm gơ.

⁹ Jơh ală bơta song ngan cau lơi in git wă, Mơ di ngan cau lơi in jòi geh bơta git jak.

¹⁰ Dòp tĕ bơta bơto sồr añ, bañ dòp leng jền priă, Bơta git jak rlau mơ sac rwah màh;

¹¹ Bơh bơta jak chài la niam rlau mơ lŭ màng, Mơ ală phan mê kòñ gơboh rlau ò rgơi pơndròm mơ gơ.

¹² Añ, la bơta jak chài ơm bal mơ bơta git kơrhia, Añ geh bơta git wă mơ bơta chài rgơi.

¹³ Bơta duh rngòt di Yàng Jehôwa, hơ̆ la gơjrañ di bơta iơh; Añ gơjrañ bơta pơnhừ să, tràl sơrbil, Añ gơjrañ gùng dà iơh mơ jơnau đơs lac lèo.

¹⁴ Añ gơs bơta kơlôi bơyai niam mơ bơta jak chài ngan; Añ gơs bơta àng loh; añ gơs gơnoar pràn.

¹⁵ Kơnòm di añ, ală cau bơtau at bồ, mơ ală cau at bồ tơlik gơnoar sồr song ngan.

¹⁶ Kơnòm di añ, ală cau kwang at bồ, ală cau màng ryŭ mơ tơl nă cau at bồ dô bă song ring.

¹⁷ Añ kòñ gơboh ală cau kòñ gơboh añ, Ngan cau lơi jơh nùs jòi añ rơp bàn añ.

¹⁸ Bơta pas sơm mơ bơta ryŭ ryơm la bal mơ añ, Phan mơna jŏ jòng, bơta bơtào tơngguh ơm bal mơ añ.

¹⁹ Plai đo añ niam rlau mơ màh, niam rlau mơ màh ngan; Cồng nha añ màng rlau mơ priă ngan.

²⁰ Añ lòt tòm gùng song ring, Digùl ală gùng song ngan.

²¹ Nàng pà phan mơna ală cau in kòñ gơboh añ, Mơ lơh bềng ală đam jàr bol khai dê.

Pơnah broă bơta jak chài dê tòm bơta crơng gơs

²² Yàng Jehôwa crơng gơs añ bơh sơnròp tòm jơh ală bơta, Broă lài ngan Kơnràñ neh lơh bơh yau òr.

²³ Añ neh geh bơtào jŏ ngan bơh yau òr, Bơh sơnròp, lài mơ tŭ crơng gơs plai ù.

²⁴ Tŭ òhềt gơs cìr jrô, òhềt gơs tồ dà hòr oă, Gen añ geh tơnggơs rau.

²⁵ Lài mơ tŭ kơh mơnơm geh bơtào, Mơ gơs ală dòr, gen neh gơs añ rau.

²⁶ Lài mơ tŭ Yàng Jehôwa crơng gơs ù, ƀlàng sre, Mơ kơmbuh ù sơnròp ngan lơgar dunnia dê.

²⁷ Tŭ Yàng Tom Trồ bơt bơtào ală tap trồ, Mơ lơh nhàr jơng trồ hơđang dàlềng, tềng hơ̆ gơs añ rau.

²⁸ Tŭ Kơnràñ lơh gơs ală tap trồ hơđang, Tŭ Kơnràñ bơtào nền ală tồ dà tiah cìr jrô dê,

²⁹ Lơh nền nhàr dàlềng in, Nàng dà ò ngơr lơh tìs gơnoar sồr Kơnràñ dê, Mơ tŭ Kơnràñ bơtào mơnàng plai ù,

³⁰ Gen añ ơm di gah Kơnràñ lơh gơs cau tòm at bồ cau lơh broă, Kòp ngai añ la bơta hòn chò Kơnràñ in, Mơ òs chò hòp di đap mat Kơnràñ.

³¹ Chò hòp bơh ală cau ơm hơđang plai ù Kơnràñ dê, Mơ hừh hơh gơwèt hơ jơi kòn mơnus.

³² Behơ̆ tŭ do, ơ ală kòn! Iat tĕ añ; Lơngai cau lơi in prap gàr gùng dà añ,

³³ Iat tĕ jơnau bơto sồr, mơ geh jak chài, Bañ sang lòi gơ.

³⁴ Lơngai cau lơi in iat jơnau añ, Kòp ngai drơng kơp di bơr mpồng añ, Mơ gơn di gah ală jrong mpồng añ.

³⁵ Bơh dilah cau lơi jòi bàn añ gen bàn bơta kis, Mơ dòp geh bơta nđàc bơh Yàng Jehôwa;

³⁶ Mơya cau lơi hŭi añ, lơh iơh is di hwềng soàn bol khai dê; Ai cau lơi gơjrañ añ, ngan kòñ gơboh bơta chơt.”