Jơnau Pơnđik 5 - Sră Goh 2018

Jơnau bơto tơngkah pal pleh ngài di cau ùr rềs àr

¹ Ơ kòn añ jê, ơn tĕ nùs bơh bơta jak chài añ jê, Wèt tĕ tồr nàng iat bơh bơta git wă añ jê.

² Tồ kòn rgơi prap gàr bơta git kơrhia, Mơ sơndồi kòn sền gàr bơta git jak.

³ Bơh sơndồi cau ùr rềs àr hòr lik dà lơwe, Mơ jơnau đơs khai dê ntiar be mơñà.

⁴ Mơya lồi dut gen gơ la bơtang be plai mat bơtang. Sồt be đào bàr đah mat.

⁵ Jơng khai mù tòm tiah bơta chơt, Cơnđòa khai lòt jat gùng tus hơ tiah brah lơgar làng ƀồc.

⁶ Khai ò lòt jat song tòm gùng bơta kis; Ală gùng dà khai dê tìs nrah, mơya khai ò git.

⁷ Behơ̆ tŭ do, ơ ală kòn, iat tĕ añ, Bañ sang lòi ală jơnau đơs añ jê.

⁸ Pleh tĕ gùng kòn ngài bơh di khai, Bañ tus rềp di mpồng hìu khai dê.

⁹ Rngòt kòn jào phi bơta tiơng pơnro niam kòn dê ală cau ndai in, Mơ ală sơnam rài kis kòn dê cau iơh rmơh in.

¹⁰ Rngòt ală cau crih mat rơp geh hòm lai bơh phan mơna kòn dê, Mơ cồng nha broă lơh bòl glar kòn dê gơrê tòm hìu cau lơgar bơdìh.

¹¹ Mơ rngòt tus di lồi dut rài, kòn rơp ñìm rac, Tòm tŭ poac mơ să jan kòn kong ồs sa roh jơh,

¹² Mơ kòn đơs lah: “Ôih, ñchi bơh tài añ gơjrañ di bơta lơh glài tơmàl, Mơ nùs añ sền òsơp di bơta lah pơrhơng taih?

¹³ Añ ò bài iat jơnau ală cau bơto añ jê, Hala wèt tồr ơm iat ală cau bơto sơnio añ.

¹⁴ Tŭ do, digùl mpồl jơnum làng bol dê, Añ mòr tus di lồi dut bơta roh rui.”

¹⁵ Hùc tĕ dà tòm tơnau tòm kòn dê, La dà hòr bơh tơrlung tòm kòn dê.

¹⁶ Ală croh dà kòn dê, lòi gơhòr lềng, Ală tồ dà cat kòn dê, lòi gơhòr tòm gùng lòt sơl ơ?

¹⁷ Lòi tĕ gơrê bal mơ mìng dô nă kòn lơm, Ò di tòmpà mơ cau crih mat ò.

¹⁸ Dan tồ dà kòn dê geh lơngai lơngò; Mơ kòn geh hòn chò di bau ùr mơ kòn neh bau tòm tŭ gam pơnu.

¹⁹ Kung be dô nơm jùn me kòñ gơboh, dô nơm keh hàng mơnĕ, Dan ntơh khai dê lơh kòn in hừh nùs sùm sùm, Mơ dan bơta kòñ gơboh khai dê lơh kòn in đềt mềr mơ khai ò lồi.

²⁰ Ơ kòn añ jê, ñchi bơh tài kòn hàm kòñ dô nă cau ùr ndai; Mơ koar di ntơh dô nă cau ùr rềs àr taih?

²¹ Bơh ală gùng dà kòn mơnus dê ơm di đap mat Yàng Jehôwa, Mơ Kơnràñ sền sơwì jơh ală gùng lòt bol khai dê.

²² Ală cau iơh bơsak rơp kòl tồi glài bol khai dê kup bol khai kung be yar dă; Mơ bol khai kòl kơt bơh bơta bòl glar ală tồi glài bol khai dê.

²³ Bol khai chơt tài bơh ò gơs bơta lơh glài tơmàl, Mơ bol khai kong roh rui tài bơh bơta bơrngơl gơla dờng bol khai dê.