Jơnau Pơnđik 4 - Sră Goh 2018

Jơnau bơto sồr mè bèp dê

¹ Ơ ală kòn, iat tĕ jơnau bơto sồr dô nă bèp dê, Ơn tĕ nùs kơlôi di ală jơnau hơ̆ tồ geh bơta àng loh.

² Bơh añ ai ală kòn in ală jơnau sồr niam, Bañ sang lòi jơnau añ bơto.

³ Tòm tŭ añ la kơnòm klau, ơm mơ bèp añ, Mơ la kòn kòñ gơboh đềt mềr mè añ jê.

⁴ Bèp añ neh bơto añ, mơ đơs mơ añ lah: “Lòi tĕ nùs kòn prap kah ală jơnau añ đơs; Prap gàr ală bơta sồr lam añ jê, gen kòn rơp kis.

⁵ Dòp tĕ bơta jak chài, dòp tĕ bơta àng loh, Bañ hŭi, bañ pơrlac sang ală jơnau đơs bơr añ jê.

⁶ Bañ sang lòi bơta jak chài, gen gơ rơp sền gàr kòn, kòñ gơboh tĕ di gơ, gen gơ rơp dong gàr kòn.

⁷ Bơta jak chài la kas màng ngan, behơ̆ jòi jat tĕ bơta jak chài, Mơ kòñ dòp geh bơta lơi ndai, gen jòi tĕ bơta àng loh.

⁸ Sền gơ dờng màng gen gơ rơp yò tơngguh kòn, gơ rơp lơh kòn in ryŭ ryơm, dilah kòn koar di gơ.

⁹ Gơ rơp ơn ñòng bơkào niam hơđang bồ kòn, mơ tơndau kòn in dô nơm sơgơn hàng mơnĕ.”

Jơnau bơto tơngkah pal lòt tòm gùng song

¹⁰ Ơ kòn añ jê, iat tĕ mơ dòp ală jơnau đơs añ jê, Gen sơnam rài kis kòn dê rơp geh bơtơl oă.

¹¹ Añ neh bơto kòn git gùng bơta jak chài, Añ neh tề lam kòn tòm ală gùng song ring.

¹² Tòm tŭ kòn lòt gùng, cơnđòa jơng kòn rơp ò gơkòl, Mơ dilah kòn ntoat, gen kòn kung ò gơtup pừ.

¹³ Sơmbat kơ̆ tĕ ală jơnau bơto sồr, bañ sang lòi; Kơrmap gàr gơ, bơh gơ la bơta kis kòn dê.

¹⁴ Bañ mut tòm gùng cau rhung rhang, Mơ bañ cơnđòa lòt tòm gùng cau lơh iơh.

¹⁵ Pleh tĕ gùng hơ̆, bañ lòt tòm hơ̆; Pleh tĕ bơh di gơ, mơ kư̆ lòt.

¹⁶ Bơh dilah bol khai ò lơh tìs, gen ò rgơi bic; Dilah bol khai ò lơh dô nă cau in gơtup tìs, gen bơta bic mat kong tă tơlik bơh di bol khai.

¹⁷ Tài bơh bol khai neh sa piang lă bơta iơh bơsak dê, Mơ ñô tơrnòm ño bơta rhung rhang dê.

¹⁸ Mơya gùng lòt cau song ring dê la kung be bơta àng àng drim dê, Gơ pơnđàng sòl sơlo àng rlau tai jơl tus di trồ gùl ngai.

¹⁹ Ai gùng cau iơh bơsak dê la kung be bơta klam jơngo cik, Bol khai ò git bol khai gơtup pừ tài bơh ñchi lơi.

²⁰ Ơ kòn añ jê, ơn tĕ nùs kơlôi bơh ală jơnau añ đơs, Ai tồr iat tĕ ală jơnau đơs añ jê.

²¹ Bañ lòi ală jơnau hơ̆ dô ngài bơh di mat kòn, Prap gàr tĕ gơtòm dơlam nùs kòn.

²² Bơh ală jơnau hơ̆ la bơta kis ală cau lơi in jòi jat gơ, Mơ la bơta sơmbòi să jan bol khai in.

²³ Prap gàr tĕ nùs kòn dê dô bă kơrhia rlau jơh, Bơh ală croh dà bơta kis gơlik bơh di gơ.

²⁴ Sang lòi tĕ bơh di kòn jơnau đơs rkwet rkwe. Mơ tă tơlik ngài tĕ bơh di kòn jơnau tòmbơhbơr blac chừt.

²⁵ Lòi tĕ gar mat kòn dê sền tơnggòr song hơđap, Mơ bơta sền rmê kòn dê song di đap mat kòn.

²⁶ Prap gàr tĕ song gùng lòt jơng kòn dê, Mơ ală gùng dà kòn dê rơp geh kơ̆ cê.

²⁷ Bañ cah gùng mơ lòt đah ma hala đah kiau, Jơng kòn pleh tĕ ngài bơh di bơta iơh.