Jơnau Pơnđik 3 - Sră Goh 2018

Bơto sồr pal dòn kơnòm mơ dòn duh Yàng Tom Trồ

¹ Ơ kòn añ jê, bañ hŭi jơnau añ bơto, Mơya nùs kòn pal prap gàr ală bơta sồr lam añ jê;

² Bơh gơ rơp ai bơtơl kòn in ală ngai kis jŏ jòng, Mơ bơta lơh lòt ngui sa tơngkah tơngkañ.

³ Bơta dòn song mơ bơta lơh jat jơnau ho pơgon, kòn bañ lòi hŭi, Kơt tĕ gơ gùt dar ngko kòn, Cih tĕ gơ hơđang mpàn nùs kòn dê;

⁴ Behơ̆, di đap Yàng Tom Trồ mơ kòn mơnus, Kòn rơp geh bơta nđàc mơ tiơng pơnro niam.

⁵ Jơh nùs dòn kơnòm tĕ di Yàng Jehôwa. Bañ dòn kơnòm di bơta àng loh kòn dê;

⁶ Tòm jơh ală gùng dà kòn dê, dòp git tĕ Kơnràñ, Gen Kơnràñ rơp bơsong ală gùng dà kòn dê.

⁷ Bañ jak chài jat mat tòm he dê. Duh rngòt tĕ di Yàng Jehôwa, mơ pleh ngài bơh di bơta iơh;

⁸ Bơta hơ̆ rơp la bơta sơmbòi poac să kòn, Mơ la bơta lơh pràn wơl să jan kòn dê.

⁹ Ơn tĕ phan mơna kòn dê bal mơ ală plai đo bồ sơnam Nàng jòng ro Yàng Jehôwa;

¹⁰ Gen ală đam jàr kòn dê rơp geh bềng lìu tơngkah tơngkañ. Mơ ală yang kòn dê geh bềng lìu tơrnòm.

¹¹ Ơ kòn añ jê, bañ sền òsơp di bơta lơh glài tơmàl Yàng Jehôwa dê, Bañ gơplơ̆ nùs tòm tŭ Kơnràñ lah pơrhơng.

¹² Bơh Kơnràñ lơh glài tơmàl di cau lơi mơ Kơnràñ kòñ gơboh, Kung be bèp gơwèt mơ kòn klau kòñ gơboh he dê.

Phan mơna ngan

¹³ Lơngai cau lơi in jòi bàn bơta jak chài. Mơ dòp geh bơta git wă.

¹⁴ Bơh bơta gơlik gơs bơh gơ la niam rlau mơ priă. Mơ cồng nha gơ la niam rlau mơ màh.

¹⁵ Bơta jak chài la màng rlau mơ ală lŭ màng, Ò gơs phan lơi kòn kòñ mơ rgơi pơndròm mơ gơ.

¹⁶ Tê ma gơ at bơta kis jŏ, Ai tòm tê kiau gơ gơs bơta pas sơm mơ bơta ryŭ ryơm.

¹⁷ Ală gùng lòt gơ dê la gùng hòn chò hừh hơh, Mơ jơh ală gùng hơ̆ la lơngap lơngai.

¹⁸ Gơ kung be la chi bơta kis cau lơi in sơmbat geh gơ, Cau lơi at kơ̆ di gơ, hơ̆ la cau geh lơngai.

Bơta jak chài Yàng Tom Trồ dê tòm bơta crơng gơs

¹⁹ Yàng Jehôwa ngui bơta jak chài bơt bơtào plai ù; Ngui bơta git wă nàng lơh gơs ală tap trồ.

²⁰ Bơh bơta git jak Kơnràñ dê, ală tiah jrô pò tơlik, Mơ ală mhwal gơdùh dà tŭ.

Bơta lơngap lơngai ngan

²¹ Ơ kòn añ jê, prap gàr tĕ bơta jak chài mơ bơta git kơrhia, Bañ lòi ală bơta hơ̆ ngài bơh di mat kòn.

²² Gen bol gơ rơp la bơta kis hwềng soàn kòn dê, Mơ kung be la phan bơka di ngko kòn.

²³ Kòn rơp cơnđòa lòt kơ̆ cê tòm gùng kòn dê, Mơ jơng kòn rơp ò gơtup pừ.

²⁴ Dilah kòn bic rlô, kòn rơp ò rngòt; Tòm tŭ kòn bic, kòn rơp bic lơhă.

²⁵ Bañ rngòt di bơta rngòt rngơt nisơna gơtơntus, Hala di bơta rung rài gơdùh hơđang cau iơh bơsak.

²⁶ Bơh Yàng Jehôwa la tiah gơn kơnòm kòn dê, Kơnràñ rơp ê gàr jơng kòn klàs yar dă.

²⁷ Bañ sang lòi lơh bơta niam cau lơi in di pal, Tòm tŭ tê kòn gơs gơnoar lơh bơta hơ̆.

²⁸ Dilah kòn gơs tòm hìu kòn dê, phan mơ cau ơm rềp mơ kòn pal càng, Gen bañ đơs mơ khai lah: “Lòt tĕ mơ rê wơl ngai hìng añ rơp ai phan hơ̆ mê in.”

²⁹ Bañ jòi kai nàng lơh iơh di cau ơm rềp mơ kòn, La cau ơm kis ring niam di gah kòn.

³⁰ Bañ tòmđơs tòmlah ò bồ mơ dô nă cau lơi, Dilah ò gơs bơta lơi lơh iơh di kòn.

³¹ Bañ ƀoah gơjrañ mơ cau iơh bơsak, Kung bañ sac rwah gùng lơi tòm ală gùng khai dê.

³² Bơh cau rkwet rkwe la cù kìr di mat Yàng Jehôwa, Mơya cau song ring geh Kơnràñ dòn kơnòm.

³³ Bơta srat sơntơm Yàng Jehôwa dê ơm hơđang hìu cau iơh bơsak, Mơya Kơnràñ ai lơngai tiah ơm cau song ring dê.

³⁴ Kơnràñ dơñŏ tơnhial dê cau jak bơrsèl tơnhial, Mơya Kơnràñ ai bơta nđàc cau tơnliah să in.

³⁵ Cau jak chài rơp dòp geh bơta ryŭ ryơm, mơya ală cau bơrngơl gơla kơldang bồ rơp kong bơta ƀàssìl ƀàsso.