Jơnau Pơnđik 25 - Sră Goh 2018

Dap dơ̆ bàr tơrgòm ală sră pơnđik Salômôn dê

¹ Do kung la ală sră pơnđik Salômôn dê, mơ ală cau kwang Ejekia dê, bơtau Juda cih wơl.

² Pồn ndơp bơta lơi hơ̆ la bơta gơklŏ Yàng Tom Trồ dê; Mơya sền sơwì bơta lơi, hơ̆ la gơklŏ ală cau bơtau dê.

³ Cau ò rgơi was sơnoa đah jơnhoa tap trồ dê, đah jrô plai ù hala nùs ală cau bơtau dê.

⁴ Tă tĕ è bơh di priă, gen cau chài lơh priă geh dô nơm phan ngui;

⁵ Pơndut tĕ cau iơh klàs bơh di đap cau bơtau, gen sơbàn khai rơp geh bơt bơtào kơ̆ nền tòm bơta song ring.

⁶ Bañ jòng să he di đap cau bơtau, mơ bañ ntào di tiah cau dờng màng.

⁷ Bơh chan cau đơs mơ kòn lah: Guh tĕ hơ do, niam rlau mơ cau tơmù kòn di đap cau kwang bơtau, mơ mat kòn neh gŏ.

⁸ Bañ sơrbac tơnggơs bơta tòm pơndang bal, rngòt tŭ lồi dut cau ơm rềp mơ kòn neh lơh kòn in ƀàssìl, kòn rơp ò git lơh mbe lơi.

⁹ Tòm yal tĕ tơnggume broă kòn mơ cau ơm rềp mơ kòn, mơya bañ yal tơlik bơta ndơp ndơr cau ndai dê;

¹⁰ Rngòt tŭ khai kơno bơta hơ̆ rơp lah sơrpah kòn, mơ bơta dơñŏ tơnhial rơp ò geh jùt jơh mòn.

¹¹ Jơnau đơs di di tŭ, ò gơkrơi be plai klac màh ƀềp priă.

¹² Cau jak chài lah pơrhơng trồm tồr jak iat, ò gơkrơi be dô dơwàng kòng màh, dô nơm phan bơka să mơ màh ngan sơl.

¹³ Cau kong sồr lòt dòn song mơ cau sồr lòt, tòm toh be dà piar gơkơnhồl ngềt tòm ngai kơnhai toès; bơh khai bơtơl pràn hwềng soàn cau tòm he dê.

¹⁴ Cau lơi jòng să phan ơn he òhềt ơn, ò gơkrơi be mhwal gơs càl, mơ ò gơs mìu.

¹⁵ Sùm sùm òbat gơhào gơjrañ gen sồng bơto pơndòm nùs cau kwang at bồ dê; ai lơmpiat lơbơn niam tơrpă ală ntìng.

¹⁶ Dilah kòn jòi bàn dà lơwe, sa tĕ dimơ, rngòt tŭ sa hòm dil, kòn gơbruh hă.

¹⁷ Bañ òs cơnđòa tus hơ hìu cau ơm rềp mơ kòn, rngòt khai dil kòn, mơ tòmgơl nùs gơjrañ kòn mòn.

¹⁸ Cau lơi đơs jơnau lơh cơng blac di cau ơm rềp he, ò gơkrơi be dô nơm mut, dô nơm đào, dô nơm kam sơmplàñ.

¹⁹ Dòn kơnòm di cau ò dòn song tòm ngai gơlòng bòl glar, tòm toh be sề pơh, hala jơng kwet gơlte.

²⁰ Cau lơi đơs chò nùs moat jrùng in iat, ò gơkrơi be cau hồ ào he tòm ngai noat mrềt, mơ be dà sràt tuh hơđang tiah sồt.

²¹ Dilah cau sò tơm kòn jơgloh, ai tĕ khai in sa; dilah tơhìr dà, ai tĕ khai in hùc;

²² Bơh lơh behơ̆ kòn ơn ồs rnga hơđang bồ khai, mơ Yàng Jehôwa rơp tơm wơl kòn in.

²³ Càl tồ đah đang tơnggơs mìu; ai lơmpiat đơs òm ndơp ndơr lơh muh mat in gơhào gơjrañ.

²⁴ Chan ơm dô mum hơđang rkàng hìu, niam rlau mơ ơm bal hìu mơ cau ùr jak tòmlah.

²⁵ Jơnau niam bơh lơgar ngài tus, tòm toh be dà mrềt cau tơhìr in.

²⁶ Cau song ring gơsèng di đap cau iơh bơsak, ò gơkrơi be dô croh dà gơkòl lơh sơngkal, dô tồ dà ồm.

²⁷ Sa dà lơwe oă ò niam; mơ kư̆ jòi jat bơta gơklŏ he in, kung ò niam.

²⁸ Cau lơi ò kơryan nùs he, ò gơkrơi be dô nơm ƀòn tơrlah, ò gơs dơrñang.