Jơnau Pơnđik 21 - Sră Goh 2018

¹ Nùs bơtau dê ơm tòm tê Yàng Jehôwa ò gơkrơi be hiòng dà hòr; Kơnràñ lơh sơrkềng đah lơi jat nùs kòñ Kơnràñ dê.

² Ală gùng dà kòn mơnus dê la di pal jat mat bol khai dê; mơya Yàng Jehôwa kơr was nùs bol khai.

³ Lơh jat bơta song ring mơ song ngan geh niam nùs Yàng Jehôwa rlau mơ phan ơn duh khoai.

⁴ Muh mat pơnhừ, nùs jòng să, mơ ồs đèng cau iơh dê la tồi glài.

⁵ Ală bơta kơlôi sơnơng ngac ngar lam tus bơta tơngkah tơngkañ; ai ală cau sơrbac ir tus hơ bơta siơ̆u siar.

⁶ Phan mơna geh bơh lơmpiat blac pơrlồm, hơ̆ la nhơm tă mhar jơh la dă pơt bơta chơt.

⁷ Bơta rhung rhang cau iơh dê rơp pơs bol khai ngài; tài bơh bol khai ò bài lơh bơta song ngan.

⁸ Gùng dà cau tồi glài dê la rkwet rkwe; ai broă lơh cau sàng goh ngan la song ngan.

⁹ Chan la ơm di mum rkàng hìu, rlau mơ ơm bal dô nơm hìu mơ dô nă ùr jak pơndang.

¹⁰ Nùs cau bơsak kơp kòñ bơta iơh; cau ơm rềp mơ khai ò geh nđàc di đap khai.

¹¹ Tŭ cau dơñŏ tơnhial kong lơh glài, gen cau bơrngơl gơla gơlik gơs jak chài; tŭ bơto sồr cau jak chài, khai dòp leng bơta git wă.

¹² Gơs dô bơtau song ring sền sơwì nền hìu cau iơh; Bơtau hơ̆ tơlo cau iơh mut tòm bơta rung rài.

¹³ Cau lơi sềt tồr ò bài iat jơnau hòi driau cau rƀah lơòi dê, cau hơ̆ hòi driau kung rơp ò gơs cau lơi ho wơl.

¹⁴ Phan ai ndơp ndơr lơh rài bơta gơjrañ; phan ơn loă lơh ngềt bơta gơjrañ dờng.

¹⁵ Tŭ bơta song ngan geh lơh, la dô nơm broă chò hòp cau song ring in; mơya bơta rngòt rngơt cau lơh iơh in.

¹⁶ Cau lơi tìs nrah bơh gùng àng loh, rơp ơm bal mơ mpồl cau chơt,

¹⁷ Cau lơi kòñ bơta kơnhơl chò hòp ngan rơp rƀah siơ̆u siar; ai cau lơi kòñ alak mơ mơñà rơp ò tŭ lơi pas gơs.

¹⁸ Cau iơh la khà priă tơwài cau song ring; mơ cau blac pơrlồm ala tiah cau song ngan in.

¹⁹ Chan ơm tòm tiah ngềt ngơt, rlau mơ ơm bal mơ dô nă bau ùr jak pơndang mơ mhar gơhào nùs.

²⁰ Phan màng kư̆ gam wơl tòm hìu cau jak chài; mơya cau tùl gơla loan gơ thit.

²¹ Cau lơi jòi jat bơta song ring mơ bơta kơ̆ dơn, rơp jòi bàn bơta kis, bơta song ring, mơ bơta dờng màng.

²² Cau jak chài hào hơđang theng cau ling pràn kơldang, mơ phà tơrlah theng kơ̆ cê la tiah bol khai gơn kơnòm.

²³ Cau lơi prap gàr bơr mơ lơmpiat he prap gàr hwềng soàn he klàs bơh bơta rung rài.

²⁴ Bơrsèl tơnhial, hơ̆ la sơnđan cau jòng să, pơnhừ să; khai lơh lòt iơh rmơh jat bơta pơnhừ să khai dê.

²⁵ Bơta kơp kòñ cau lơh alah dê tơnchơt khai; tài bơh tê khai ò bài lơh broă.

²⁶ Gơs cau jơh ngai hàm kòñ oă; mơya cau song ring ai gòi ò lơh kơnềs,

²⁷ Phan ơn duh khoai cau iơh dê la dô nơm phan cù kìr; tơ ài lah tŭ bol khai cèng tus bal mơ bơta kơlôi sơnơng iơh.

²⁸ Cau lơh cơng ma blac rơp roh rui; mơya cau jak kơno rơp lơh cơng dô bă cồng nha.

²⁹ Cau iơh lơh is muh mat kră kơldang be lŭ; ai cau song ngan lơh kơ̆ gùng dà he.

³⁰ Ò gơs bơta jak chài, bơta git jak, hala kai gơrmơ̆i, mơ rgơi tòmdră jai mơ Yàng Jehôwa.

³¹ Ơseh rcang sir ngai tòmlơh in; mơya bơta pha lin rlau gơrê bal mơ Yàng Jehôwa.