Jơnau Pơnđik 2 - Sră Goh 2018

Bơta kwơ màng bơta jak chài dê

¹ Ơ kòn añ jê, dilah kòn dòp rò jơnau đơs añ jê, Mơ dòp prap ală bơta sồr lam añ jê tòm nùs kòn,

² Ai tồr iat loh jơnau jak chài, Mơ wèt nùs kòn hơ bơta git wă;

³ Ngan, dilah kòn driau dờng dan bơta àng loh. Mơ ai sap đơs dờng dan bơta git wă,

⁴ Dilah kòn jòi gơ kung be jòi priă, Mơ jòi jat gơ kung be jòi jat phan màng pồn ndơp,

⁵ Gen kòn rơp git wă bơta duh rngòt di Yàng Jehôwa, Mơ jòi bàn bơta git wă Yàng Tom Trồ dê.

⁶ Bơh Yàng Jehôwa ai gòi bơta jak chài. Bơh di bơr Kơnràñ tus bơta git jak mơ bơta git wă.

⁷ Kơnràñ prap lòi bơta jak chài ngan cau song ngan in, Kơnràñ la khèl đo cau ò gơs tiah geh lah pơrhơng in,

⁸ Sền gàr ală gùng dà cau song ring dê, Mơ rcang gàr gùng lòt ală cau dòn song Kơnràñ dê.

⁹ Gen kòn rơp git wă bơta song ring mơ bơta cahrña song, Bơta ring bal, mơ kòp nơm gùng dà niam.

¹⁰ Bơh bơta jak chài rơp mut tòm nùs kòn, Mơ hwềng soàn kòn rơp niam nùs bơh bơta git jak.

¹¹ Bơta git kơrhia rơp sền gàr kòn, Bơta git jak rơp ê gàr kòn.

¹² Nàng dong kòn klàs bơh gùng cau iơh, Mơ bơh ală cau đơs ală jơnau ma blac.

¹³ La ală cau sang ală gùng dà song ngan, Nàng lòt jat ală gùng klam jơngo,

¹⁴ La ală cau hòn chò tòm tŭ lơh broă iơh bơsak, Mơ gơboh gơbài di bơta gơlềng gơlàng cau iơh bơsak dê.

¹⁵ Ală gùng dà bol khai dê la rkwet rkwe, Mơ bol khai tìs nrah tòm ală gùng bol khai dê.

¹⁶ Kòn rơp geh dong klàs bơh di cau ùr gơlềng gơlàng, klàs di bơta rềs àr bơrnàn bơh ală jơnau bơkah lơngồt khai dê,

¹⁷ Khai sang lòi cau lơh bơyô mơ khai tòm tŭ gam pơnu, Mơ hŭi jơnau ho pơgon sàng goh khai dê.

¹⁸ Bơh gùng dà khai dê la gùng lam mù hơ bơta chơt, Mơ ală gùng dà khai dê cèng tus hơ tiah lơgar làng ƀồc;

¹⁹ Ală cau lòt tus hơ khai gen ò gơs tŭ lơi rê wơl, Hala rgơi lòt wơl tòm ală gùng bơta kis.

²⁰ Behơ̆ gen lòt tĕ tòm gùng cau niam, Mơ prap gàr să tòm tòm ală gùng cau song ring dê.

²¹ Bơh cau song ngan rơp geh ơm tòm lơgar, Mơ cau ò gơs glài rơp ơm sùm tòm hơ̆;

²² Mơya cau iơh bơsak rơp kong tă tơlik bơh di lơgar, Mơ cau tồi glài rơp kong dus bơh di tiah hơ̆.