Jơnau Pơnđik 18 - Sră Goh 2018

¹ Cau lơi ơm is dô nă jòi bơta să tòm he kòñ; Khai pơndang sang ală bơta jak chài ngan.

² Ală cau tùl gơla ò kòñ bơta àng loh; Mơya mìng kòñ ràng tơlik bơta kơlôi sơnơng bol khai dê.

³ Tŭ bơta iơh bơsak tus bơta sền òsơp kung tus tai sơl; mơ bơta bơrsèl tơnhial tus bal mơ bơta ƀàssìl ƀàsso.

⁴ Jơnau đơs bơr kòn mơnus dê be dà jrô; Tòm ryas bơta jak chài ò gơkrơi be dô nơm croh hòr dà.

⁵ Ai lơh ò niam ki ngàm di cau iơh, Mơ sang lòi cau song ring tòm bơta cahrña.

⁶ Sơndồi cau tùl gơla cèng bơta tòm pơndang bal; Mơ bơr khai hòi jà bơta pù lơh.

⁷ Bơr ală cau tùl gơla la bơta roh rui bol khai dê; Sơndồi bol khai ngan la dô nơm dă pơt hwềng soàn bol khai dê.

⁸ Jơnau cau đơs gơtrềng gơtràng be phan sa bơkah, Gơ mut tus tòm klung klòm.

⁹ Cau sang lòi broă lơh he dê, Kung la oh mi cau phà tơnroh dê.

¹⁰ Sơnđan Yàng Jehôwa ngan la dô nơm theng kơ̆ cê; Cau song ring ntoat tus tềng hơ̆, geh lơngap lơngai.

¹¹ Phan mơna cau pas la dô nơm ƀòn dờng kơ̆ cê bol khai dê, Tòm nùs bol khai kơlôi gơ la dô nơm dơrñang jơnhoa.

¹² Bơta jòng să lòt lài mơ bơta roh gơprah; Mơya bơta pìn pơndêt să lòt lài mơ bơta màng ryŭ.

¹³ Ho wơl lài mơ tŭ iat, Hơ̆ la bơrngơl gơla mơ ƀàssìl ƀàsso.

¹⁴ Hwềng nùs cau yò tơngguh să jan kòp jê; Mơya hwềng nùs gơhuc gơplơ̆ ñcau kong jai taih?

¹⁵ Nùs cau àng loh jòi lùp bơta git jak; Mơ tồr cau jak chài jòi jat bơta git wă.

¹⁶ Phan pà cau dê pò mpồng khai in, Lam khai tus di đap cau dờng ryŭ.

¹⁷ Cau sơnròp yă wơn gơlơh be di pal; Mơya tŭ đah ne tus gen sồng git cau lơi di hala tìs.

¹⁸ Bơta tă khà tơnroh tòm pơndang bal, Pơnring digùl ală cau gơs gơnoar pràn.

¹⁹ Dô nă cau kong cau lơh moat jrùng Kalke geh gơtòmsòr wơl rlau mơ tòmpìt dô nơm theng kơ̆ cê; Bơta tòmpìt tòmhà behơ̆ ò gơkrơi be ală kai mpồng hìu gơlang.

²⁰ Kơndul geh hòm lai bơh plai đo bơr he dê; Cồng nha sơndồi lơh hừh hơh.

²¹ Kis, chơt ơm hơđơm gơnoar lơmpiat dê; Cau kòñ gơboh gơ rơp sa plai đo gơ dê.

²² Cau lơi jòi geh dô nă bau ùr, hơ̆ la jòi bàn dô bơta lơngai, Mơ dòp geh bơta nđàc Yàng Jehôwa dê.

²³ Cau rƀah ngui jơnau lùp dan; Ai cau pas ho wơl dô bă sràt bơtang.

²⁴ Gơlơh be geh oă bơyô rơp lơh iơh he in; Mơya gơs mìng dô nă bơyô ngan đềt mềr rlau mơ oh mi tòm.