Jơnau Pơnđik 12 - Sră Goh 2018

¹ Cau lơi kòñ gơboh bơta lơh glài tơmàl kòñ gơboh bơta git jak; Mơya cau lơi gơjrañ di bơta lah pơrhơng la bơrngơl gơla.

² Cau niam geh bơta nđàc Yàng Jehôwa dê; Mơya Yàng Tom Trồ lơh nền glài cau lơi kòñ jòi kai iơh.

³ Kòn mơnus ò di bơh rhung rhang mơ geh bơt bơtào kơ̆ nền; Mơya ryas cau song ring ò gơkòl wañ lơnggơh.

⁴ Bau ùr kơ̆ dơn la sơgơn bơtau bau klau khai in; Ai bau ùr lơh ƀàssìl ƀàsso ò gơkrơi be bơta ồm lề tòm ntìng khu khai.

⁵ Bơta kơlôi sơnơng cau song ring dê la di pal; Mơya bơta kơlôi bơyai cau iơh la ma blac.

⁶ Ală jơnau cau iơh bơsak kơp mòc lơh gơhòr mhàm; Mơya jơnau đơs cau song ring dong klàs bol khai.

⁷ Cau iơh bơsak kòl tuh tơlup gen bol khai ò gam tai; Mơya hìu cau song ring gam ntào kơ̆.

⁸ Cau geh jòng ro bơh bơta jak chài; Ai cau gơs nùs rkwet rkwe gơkòl sền òsơp.

⁹ Chan la dô nă cau òs mơ geh cau dong broă, Rlau mơ cau sền dờng màng is să he mơ siơ̆u phan sa.

¹⁰ Cau song ring sền gàr bơta kis phan poan jơng he; Ai bơta sơnđàc sơngit cau iơh dê la iơh rmơh.

¹¹ Cau lơi lơòr ù tiah he dê rơp geh phan sa tơngkah tơngkañ; Ai cau jat cau ơm alah siơ̆u bơta git wă.

¹² Cau iơh bơsak hàm hà phan ò di pal; Mơya ryas cau song ring dê tơnggơs plai đo.

¹³ Cau iơh bơsak gơkòl tòm dă bơh di bơta tìs sơndồi bol khai dê; Mơya cau song ring geh klàs bơh bơta bòl glar.

¹⁴ Bơh cồng nha bơr sơndồi cau dê geh bềng ală phan niam; Mơ cau lơh broă bòl glar geh jền tơngai gơ dê.

¹⁵ Gùng dà cau bơrngơl gơla dê song jat mat khai; Ai cau jak chài iat jơnau bơto tơngkah.

¹⁶ Cau tùl gơla yal tơlik bơta gơjrañ dờng bol khai dê mo; Ai cau git kơrhia pồn ndơp bơta sền òsơp he.

¹⁷ Cau lơi đơs song, bơto yal bơta song ring; Ai cau lơh cơng ma blac yal tơlik bơta blac chừt.

¹⁸ Jơnau ò git kơrhia srơp bluh be đào; Mơya lơmpiat cau jak chài cèng bơta sơmbòi.

¹⁹ Sơndồi song ngan geh kơ̆ wền sùm sùm; Ai lơmpiat ma blac mìng gam dô êt jŏ lơm.

²⁰ Bơta pơrlồm ơniai ơm tòm nùs cau kòñ lơh kai iơh; Mơya ală cau bơyai bơta ring lơngai geh hòn chò.

²¹ Ò gơs dô bơta rung rài gơlik tus cau song ring in; Mơya cau iơh bơsak rơp kong bềng bơta bòl glar.

²² Bơr sơndồi đơs lac lèo ai lơh cù kìr Yàng Jehôwa in; Mơya cau lơi lơh lòt dòn song geh niam nùs Kơnràñ.

²³ Cau chài rgơi pồn bơta he git; Mơya nùs cau tùl gơla yal tơlik bơta lu sơnrang.

²⁴ Tê cau ngac ngar rơp at bồ; Mơya cau lơh alah pal kong duh broă.

²⁵ Bơta moat jrùng lơh kơnjơ̆ nùs; Mơya dô jơnau đơs niam lơh nùs chò hòp.

²⁶ Cau song ring bơto gùng niam cau gơp ƀòn in; Mơya ală gùng cau iơh lơh tìs nrah bol khai.

²⁷ Cau lơh alah ò gơm poac he neh mòc; Mơya cau tơryang tơryồng geh phan mơna kas màng.

²⁸ Tòm gùng cau song ring gơs bơta kis; cơnđòa lòt tòm gùng hơ̆ ò gơs bơta chơt.