Jơnau Pơnđik 11 - Sră Goh 2018

¹ Dô nơm kơr ma blac la dô bơta cù kìr Yàng Jehôwa in; Mơya plai kơr tòm toh geh niam nùs Kơnràñ.

² Tŭ pơnhừ să tus, bơrsèl tơnhial kung tus sơl; Mơya bơta jak chài gam ơm mơ cau pơndêt să.

³ Bơta song ring ală cau song ring dê tề lam bol khai; Mơya bơta rkwet rkwe ală cau ò dòn song tơnroh bol khai.

⁴ Tòm ngai gơjrañ dờng, phan mơna ò kwơ dô êt lơi, Mìng bơta song ring dong klàs bơh bơta chơt.

⁵ Bơta song ring cau wil tơl dê pơnsong gùng lòt khai; Mơya cau rhung rhang rơp gơpừ bơh bơta iơh bơsak bol khai dê.

⁶ Bơta song ring cau song ngan dê rơp dong klàs bol khai; Mơya cau ò dòn song gơkòl kơt tòm bơta iơh bơsak bol khai dê.

⁷ Tŭ cau iơh chơt, bơta gơn kơnòm khai roh; Mơ bơta kơp kòñ cau ò gơs Yàng rơp ò gơs phan lơi.

⁸ Cau song ring geh dong klàs bơh bơta gơlòng bòl glar, Mơ cau rhung rhang gơdùh tềng hơ̆ ala khai in.

⁹ Cau ò duh rngòt ai jơnau đơs mơ lơh roh gơprah cau ơm rềp mơ khai; Mơya kơnòm di bơta git wă ală cau song ring geh dong klàs.

¹⁰ Jơh ƀòn chò hòp bơh bơta bơtoah bơtoài cau song ring dê; Mơya tŭ cau iơh roh rui, gen gơs jơnau hòn chò driau dờng.

¹¹ Kơnòm cau song ngan ai lơngai, gen ƀòn dờng geh jòng màng; Mơya tài bơh bơr cau iơh rmơh, gơ kong tơnroh.

¹² Cau lơi sền òsơp cau gơp ƀòn he siơ̆u bơta git wă; Mơya cau àng jak kư̆ ơm mŏ.

¹³ Cau đơs joh yal tơlik bơta ndơp ndơr; Mơya cau di pal dòn kơnòm prap tòm nùs bơta dòn kơnòm.

¹⁴ Tiah lơi ò gơs cau at bồ gen lơgar gơplơ̆, Mơya dilah gơs oă cau git kơlôi bơyai, gen geh lơngap lơngai.

¹⁵ Cau lơi dòp leng ala cau ndai, ngan kong sơbơng roh; Mơya cau ò bài dòp leng ala, gen geh lơngap lơngai.

¹⁶ Cau ùr lơbơn niam geh sền dờng màng; Ai cau ùr ò kòñ bơtê jat nùs nhơm niam gơkòl ƀàssìl, Cau alah gơlik siơ̆u siar, Mơya cau tơryang tơryồng rơp geh pas sơm.

¹⁷ Cau lơbơn niam geh kwơ hwềng soàn he in; Ai cau rhung rhang lơh iơh să tòm he in.

¹⁸ Cau iơh dòp geh cồng nha roh lơm; Mơya cau sih bơta song ring dòp geh jền tơngai ngan.

¹⁹ Cau lơi kơ̆ nùs ơm song ring gen rơp kis; Ai cau ting jat bơta iơh rơp chơt.

²⁰ Cau gơs nùs ma blac ai lơh cù kìr Yàng Jehôwa in; Mơya cau lơi ò lơh tìs gen geh niam nùs Kơnràñ,

²¹ Di ngan cau iơh bơsak ò tŭ lơi klàs bơta lơh glài; Mơya jơi bơtiàn cau song ring rơp geh dong klàs.

²² Dô nă cau ùr hàng mơnĕ mơ siơ̆u bơta git kơrhia, Ò gơkrơi be dô nơm kòng màh dò di muh sur.

²³ Bơta kơp kòñ cau song ring dê mìng la bơta niam; Ai bơta kơp gơn cau iơh dê la bơta gơjrañ dờng.

²⁴ Gơs cau rsìh phan mơna he dê, sơlo gơlik pas sơm; Kung gơs cau sềt pơniă kong bơta siơ̆u siar lơm.

²⁵ Cau gơs nùs dờng ơnàng rơp geh hòm lai; Ai cau chò nùs pà gòi rơp geh pà gòi.

²⁶ Cau lơi pồn prap kòi mbo, kong làng bol srat rma; Mơya bơta lơngai mù hơđang bồ cau tac gơ.

²⁷ Cau lơi jòi jat bơta niam, jòi jat bơta nđàc; Mơya cau lơi jòi bơta iơh, gen bơta iơh rơp tus mơ khai.

²⁸ Cau lơi dòn kơnòm bơta pas sơm bol khai dê rơp gơkòl ro rañ; Ai cau song ring rơp be nha chi tơlir niam.

²⁹ Cau lơi lơh sơlồng sơlàng hìu nhă bol khai rơp geh càl lơh gơs sre brê; Mơ cau lu sơnrang gơlik dĭ gơna cau jak chài in.

³⁰ Cồng nha cau song ring la chi bơta kis; Mơya bơta iơh bơsak tơnroh bơta kis.

³¹ Dilah cau song ring geh tơm wơl hơđang ù; Ngan kung behơ̆ cau iơh bơsak mơ cau glài kong sal tê!